ახალი ამბები

დღეს, ბათუმის შოთა რუსთაველის სახელმწიფო უნივერსიტეტმა წმინდა მოწამე ეკატერინეს სახელობის სათნოების სავანეში საქველმოქმედო აქცია გამართა სახელწოდებით „ერთი დღე მოხუცთა თავშესაფარში“. კამპანიის ფარგლებში ბსუ-ს საბუნებისმეტყველო მეცნიერებათა და ჯანდაცვის ფაკულტეტის პროფესორებმა ბენეფიციარებს სამედიცინო მომსახურება გაუწიეს, ხოლო სტუდენტები მოწყალების დებთან ერთად, დღის განმავლობაში მოხუცებულებზე ზრუნავდნენ.აქციის ფარგლებში, უნივერსიტეტის ადმინისტრაციამ სათნოების სახლის მაცხოვრებლებს საჩუქრად ტკბილეული, საყოფაცხოვრებო და ჰიგიენური პროდუქცია გადასცა.

სასტუმრო „ეიფორიაში“ ბათუმის შოთა რუსთაველის სახელმწიფო უნივერსიტეტის საახალწლო წვეულება გაიმართა. წარმატებული და აქტიური სტუდენტები ბსუ-ს რექტორმა მერაბ ხალვაშმა, აჭარის ა.რ. განათლების, კულტურისა და სპორტის მინისტრის მოადგილემ მირიან ქათამაძემ უნივერსიტეტის შემოქმედებითი, კულტურული და სპორტული ცხოვრების განვითარებაში შეტანილი წვლილისათვის მადლობის სიგელებით დააჯილდოვეს. ღონისძიებაზე უნივერსიტეტის პოპულარიზაციისათვის და მხარდაჭერისათვის ღონისძიების მხარდამჭერი ორგანიზაციები დაჯილდოვდნენ.

ბსუ-ს რექტორის მერაბ ხალვაშის წარდგინებითა და აკადემიური საბჭოს გადაწყვეტილებით, ბათუმის შოთა რუსთაველის სახელმწიფო უნივერსიტეტში წარმატებული, ნაყოფიერი სამეცნიერო და პედაგოგიური მოღვაწეობისთვის პროფესორ გურამ ჩაგანავას მიენიჭა საპატიო ჯილდო – შოთა რუსთაველის სახელობის მედალი.

ბათუმის შოთა რუსთაველის სახელმწიფო უნივერსიტეტში საახალწლო კონცერტი გაიმართა. უმაღლესი საგანმანათლებლო დაწესებულების რექტორმა მერაბ ხალვაშმა სტუდენტებს დამდეგი ახალი წელი მიულოცა და წარმატებები უსურვა. მაყურებლის წინაშე პირველად წარსდგა უნივერსიტეტის ვოკალურ-ინსტრუმენტული ბენდი „ბსუ’’.

აჭარის ა.რ სოფლის მეურნეობის მინისტრმა ლაშა კომახიძემ ბათუმის შოთა რუსთაველის სახელმწიფო უნივერსიტეტში აჭარის სოფლის მეურნეობის განვითარების 2017-2020 წლების სტრატეგია წარადგინა. უწყების პირველმა პირმა უმაღლესი საგანმანათლებლო დაწესებულების რექტორს მერაბ ხალვაშს, რექტორის მოადგილეს ნათია წიკლაშვილს, აგრარული მიმართულების მეცნიერებსა და აკადემიურ პერსონალს დარგის განვითარების პერსპექტივები და სამომავლო გეგმები გააცნო. აჭარის სოფლის მეურნეობის განვითარების ოთხწლიანი სტრატეგია ითვალისწინებს სოფლის მოსახლეობის შემოსავლების ზრდას, ადგილობრივი წარმოების კონკურენტუნარიანობის ამაღლებას, რეგიონის ახალი სასოფლო სამეურნეო ფუნქციებით დატვირთვას, სასურსათო უსაფრთხოების უზრუნველყოფასა და სურსათის უვნებლობას ხელშეწყობას.