ახალი ამბები

ბათუმის შოთა რუსთაველის სახელმწიფო უნივერსიტეტში ქართველოლოგიის ინსტიტუტის სამეცნიერო კონფერენცია „მუჰაჯირები“ გაიხსნა. ორდღიანი სამეცნიერო სესია „საზღვარგარეთ მცხოვრებ ქართველთა დასახლებებისა და ყოფის კვლევის“ პროგრამის ფარგლებში იმართება და მიზნად ისახავს ცენტრის მიერ, ბოლო ერთი წლის განმავლობაში წარმოებული კვლევა-ძიების შედეგების გაცნობას. განხილული იქნება მე-19 საუკუნეში სამხრეთ საქართველოდან თურქეთის შიდა პროვინციებში გადასახლებული ქართველების (მუჰაჯირების) ისტორია და მათ შთამომავალთა თანამედროვე ყოფა. ასევე შედგება ნიკო მარის წიგნის "შავშეთსა და კლარჯეთში მოგზაურობის დღიურების" ქართული თარგმანის წარდგინება. კონფერენციის მუშაობაში მონაწილეობას ღებულობენ როგორც საქართველოს, ასევე უცხოეთის სამეცნიერო ცენტრის მკვლევრები და პროფესორ-მასწავლებლები.

საფრანგეთის სრულუფლებიანი ელჩი საქართველოში რენო სალენსი დიპლომატიური კორპუსის წარმომადგენლებთან ერთად ბათუმის შოთა რუსთაველის სახელმწიფო უნივერსიტეტის რექტორს, პროფესორ ალიოშა ბაკურიძეს, დეკანებსა და ტურიზმის ფაკულტეტის პროფესორ-მასწვლებლებს შეხვდა. დიპლომატი უმაღლესი საგანმანათლებლო დაწესებულების საგანმანათლებლო პროგრამებით, სტრუქტურით, ტურიზმის ფაკულტეტითა და მისი მიღწევებით დაინტერესდა. მხარეებმა შეხვედრაზე სამომავლო თანამშრომლობის გეგმებზე ისაუბრეს და ერთობლივი პროექტების განხორციელებაზე შეთანხმდენენ.

საქართველოს მთავრობა და ათასწლეულის გამოწვევის კორპორაცია (MCC) პროფესიული განათლების განვითარების ხელშეწყობისათვის, მეორე კომპაქტის ფარგლებში განიხილავენ 12-15 მილიონი აშშ დოლარის ოდენობის ინვესტიციის გამოყოფას, რომელიც გაიცემა ღია და გამჭირვალე საგრანტო კონკურსის გზით. კონკურსის ფარგლებში, პირველ ეტაპზე წარიმართება პროფესიული განათლების სექტორში არსებული მდგომარეობის ანალიზი, პრობლემების შესწავლა და საჭიროების გამოვლინება. მეორე ეტაპზე მოხდება პროექტების დეტალური წარდგენა, შეფასება და დაფინანსება. საკონკურსო წინადადების პირველი ეტაპის განხორციელებისთვის, ათასწლეულის გამოწვევის ფონდი-საქართველო MCA-Georgia პროფესიული განათლების სფეროში არსებული პრობლემებისა და გამოწვევების განსაზღვრის მიზნით იწყებს განცხადების მიღებას.

ეროვნულ-დემოკრატიული ინსტიტუტის - NDI-ის ორგანიზებით, ბათუმის შოთა რუსთაველის სახელმწიფო უნივერსიტეტში საკონსტიტუციო ცვლილებების საჯარო განხილვა მოეწყო. საყოველთაო-სახალხო განხილვის საორგანიზაციო კომისიის წევრებმა სტუდენტებს, პროფესორ-მასწავლებლებს, საპარლამენტო უმრავლესობის, ოპოზიციური ფრაქციების, არასამთავრობო ორგანიზაციებისა და საზოგადოების წარმომადგენლებს საკანონმდებლო ინიციატივა გააცნეს და საკუთარი მოსაზრებები წარუდგინეს. საკონსტიტუციო ცვლილების პირველი პროექტი საქართველოს საკანონმდებლო ორგანოს ადგილსამყოფელს ეხება, ხოლო მეორე - პრეზიდენტის უფლებამოსილებებს. 4 თებერვალს, საჯარო-საყოველთაო განხილვების დასრულების შემდეგ, საკონსტიტუციო ცვლილების პროექტები განსახილველად პარლამენტს წარედგინება.

შპს „ბათუმის წყლისა“ და ბათუმის მერიის საკონსულტაციო კომპანიის წამომადგენლები ბათუმის შოთა რუსთაველის სახელმწიფო უნივერსიტეტის აგრარული და საინჟინრო ტექნოლოგიების ფაკულტეტის სტუდენტებს შეხვდნენ და საწარმოო პრაქტიკის განხორციელების დეტალები გააცნეს. პრაქტიკანტები კონსულტანტების დახმარებით რამდენიმე თვის განმავლობაში საინჟინრო პროექტირების, პროექტის განხორციელებისა და მშენებლობის ზედამხედველობის საკითხებს შეისწავლიან. სასწავლო პრაქტიკის მონაწილეები კონკურსის წესით შეარჩევიან, უპირატესობა III-IV კურსის კარგი აკადემიური მოსწრებისა და უცხო ენის მცოდნე სტუდენტებს მიენიჭებათ. პროექტი KfW-ის მხარდაჭერით ბათუმის მუნიციპალური ინფრასტრუქტურის რეაბილიტაციისა და 516613-TEMPUS-1-2011-1-BE-TEMPUS-JPHES - University & enterprise cooperation for competency-based training in Armenia, Georgia and Ukraine.Cap4Com პროგრმების ფარგლებში ხორციელდება.