ცნობილი ქართველი პოეტი, საზოგადო მოღვაწე, რუსთაველის პრემიის ლაურეატი ფრიდონ ხალვაში ბათუმის შოთა რუსთაველის სახელმწიფო უნივერსიტეტის სტუდენტებმა და პროფესორ-მასწავლებლებმა გაიხსენეს. ბათუმის ღვთისმშობლის შობის სახელობის საკათედრო ტაძრის ეზოში მწერლის საფლავთან შეკრებილებმა მის ცხოვრებაზე, შემოქმედებაზე ისაუბრეს და ლექსები წაიკითხეს. პატივი მიაგეს ღვაწლმოსილი პოეტის ხსოვნას და განსასვენებელი ყვავილებით შეამკეს. 17 მაისს ფრიდონ ხალვაში 87 წლის გახდებოდა.
ტემპუსის საგრანტო პროექტებისა და ტექნოლოგიების გადაცემის საკითხისადმი მიძღვნილი რეგიონული სემინარის შედეგების წარდგინება გაიმართა. მენეჯერმა, ასოცირებულმა პროფესორმა ლელა თურმანიძემ პროექტების ,,ინტერნაციონალიზაციისა და უმაღლეს განათლებაში ხარისხის უზრუნველყოფის შედარებითობის ხელშეწყობა” (PICQA) და ”უნივერსიტეტისა და საწარმოს თანამშრომლობის გაძლიერება კომპეტენციებზე დაფუძნებული სწავლების გზით სომხეთში, საქართველოსა და უკრაინაში cap4com” მიზნებზე და განხორციელების პირობებზე ისაუბრა. რექტორის მოადგილემ, პროფესორმა ნათია წიკლაშვილმა და სტრატეგიული განვითარებისა და საგარეო ურთიერთობათა დეპარტამენტის წამყვანმა სპეციალისტმა ლილით მელოიან-ფუტკარაძემ ინტელექტუალურ საკუთრებაზე იმსჯელეს. ყურადღება გაამახვილეს უნივერსიტეტსა და ინდუსტრიას შორის მჭიდრო ურთიერთობის დამყარებისა და ინტლექტუალური საკუთრების მსოფლიო ორგანიზაციის უნივერსიტეტების საინიციატივო პროგრამაში გაწევრიანების აუცილებლობაზე.
ბათუმის შოთა რუსთაველის სახელმწიფო უნივერსიტეტში სტუდენტთა საუნივერსიტეტო სამეცნიერო კონფერენცია გაიხსნა. ერთი კვირის განმავლობაში ყველა ფაკულტეტის სხვადასხვა სპეციალობის 180 სტუდენტი სამეცნიერო მოხსენებებს ოცდაერთი სექციის მიმართულებით წარმოადგენს. სტუდენტთა სამეცნიერო ცენტრის მიერ ორგანიზებული კონფერენციის მიზანია ხელი შეუწყოს ახალგაზრდების სამეცნიერო საქმიანობაში ჩართვას, მეცნიერული უნარ-ჩვევების ჩამოყალიბებასა და განვითარებას. სტუდენტებს მონაწილეობისათვის სერტიფიკატები გადაეცემათ, ხოლო საუკეთესო ნაშრომები უნივერსიტეტის სტუდენტთა და ახალგაზრდა მეცნიერთა კრებულში დაიბეჭდება. კონფერენციის გახსნაზე სტუდენტთა რეფერატულ ნაშრომთა კონკურსში გამარჯვებულები სერტიფიკატებით დაჯილდოვდნენ.
შოთა რუსთაველის დარბაზში ცნობილი მათემატიკოსის, ქართული მათემატიკური სკოლის ღირსეული წარმომადგენლის, პროფესორ ონისე სურმანიძის 70 წლისადმი მიძღვნილი საიუბილეო შეხვედრა გაიმართა. ბათუმის შოთა რუსთაველის სახელმწიფო უნივერსიტეტის რექტორმა, პროფესორმა ალიოშა ბაკურიძემ, აჭარის უმაღლესი საბჭოს თავმჯდომარემ, პროფესორმა მიხეილ მახარაძემ, პროფესორ-მასწავლებლებმა, სტუდენტებმა, საზოგადოების წარმომადგენლებმა და მეგობრებმა ღვაწლმოსილი მეცნიერის ცხოვრებასა და მიღწევებზე ისაუბრეს. იუბილარს მნიშვნელოვანი თარიღი მიულოცეს და სამახსოვრო საჩუქრები გადასცეს. საქართველოს მათემატიკოსთა კავშირმა პროფესორი ონისე სურმანიძე ხანგრძლივი და ნაყოფიერი პედაგოგიური მოღვაწეობისათვის სიგელით დააჯილდოვა.
სტუდენტებმა პროექტის "გახდი მენეჯერი სათამაშო მაგიდასთან" პრეზენტაცია გამართეს. პროექტი ბიზნეს-ეკონომიკური, ინტელექტუალური თამაშის ჩატარებას ითვალისწინებს და საბანკო, საფინანსო, სადაზღვევო საქმის, საბუღალტრო საგადასახადო საქმის, მენეჯმენტისა და ადმინისტრირების სპეციალობის სტუდენტებს გამოცდილების მიღებაში დაეხმარება. თამაში “მენეჯერი” მოიცავს ვაჭრობას, საქმიანობის დაგეგმვას, უძრავი ქონების მართვას, განკარგვას, სტრატეგიული ხედვის განვითარებას, კონკურენტებთან ურთიერთობას და საბაზრო ეკონომიკისათვის დამახასიათებელ სხვა ელემენტებს. რვადღიანი ტურნირი 2 ივნისს ბათუმის შოთა რუსთაველის სახელმწიფო უნივერსიტეტის სტუდენტების ინიციატივით, აჭარის სპორტისა და ახალგაზრდობის საქმეთა დეპარტამენტისა და ბიზნეს ორგანიზაციების მხარდაჭერით დაიწყება.
