შოთა რუსთაველის სახელმწიფო უნივესიტეტმა დაიწყო ერთიანი ეროვნული გამოცდებისათვის მოსამზადებელი უფასო მოკლევადიანი პროგრამების განხორციელება. აბიტურიენტებს ორი თვის განმავლობაში უნივერსიტეტის პროფესორ-მასწავლებლები კონსულტაციებს გაუწევენ ყველა ძირითად და არჩევით დისციპლინაში.
ჰუმანტარულ მეცნიერებათა ფაკულტეტის სტუდენტებისა და პროფესორ-მასწავლებლებისათვის ოქსფორდის უნივერსიტეტის პროფესორმა, შოთა რუსთაველის სახელმწიფო უნივერსიტეტის საპატიო დოქტორმა მაიკლ ვიკერსმა საჯარო ლექცია წაიკითხა თემაზე: ,,ადრექრისტიანული და ებრაული სიძველეები რომის კატაკომბებიდან ოქსფორდში“.
შოთა რუსთაველის სახელმწიფო უნივერსიტეტის ქრისტიანული კულტურის კვლევის ცენტრმა რიგით მეორე რესპუბლიკური კონფერენცია ,,ჩვენი სულიერების ბალავარი“ უნივერსიტეტის 75 წლისთავს მიუძღვნა. ორდღიან კონფერენციაზე ბათუმელმა, თბილისელმა და ქუთაისელმა მკვლევრებმა მოხსენებები წაიკთხეს ქართული მართლმადიდებლური ეკლესიის ისტორიაზე, ქრისტიანული სარწმუნოების წიაღში განვითარებულ კულტურასა და ხელოვნებაზე.
საერთაშორისო სამეცნიერო-პრაქტიკული კონფერენცია "ინოვაციები ბიზნესში" რსუ-ს ეკონომიკური პოლიტიკისა და ბიზნესის ადმინისტრირების დეპარტამენტის ორგანიზებით ჩატარდა და უნივერსიტეტის 75 წლის იუბილეს მიეძღვნა. საქართველოს, აზერბაიჯანისა და სომხეთის უმაღლესი სასწავლებლების პროფესორ-მასწავლებლებმა და ექსპერტებმა ბიზნესთან დაკავშირებული პრობლემები, პერსპექტივები და გამოწვევები განიხილეს. ორდღიანი კონფერენცია რეზოლუციის მიიღებით დასრულდა.
ამერიკული საზღვაო ფრეგატის ,,ჯონ ჰოლის“ ეკიპაჟის წევრებისაგან შემდგარმა როკ-ჯგუფმა ,,ფლეგშიფმა“ უნივერსიტეტის სააქტო დარბაზში კონცერტი გამართა. სტუდენტებთან ერთად კონცერტს ამერიკის შეერთებული შტატების ელჩი საქართველოში ჯონ ბასი, კულტურის ატაშე საულ ჰერნანდესი და ქართველი და ამერიკელი სამხედრო პირები ესწრებოდნენ.
