USAID-ის სოფლის მეურნეობის პროგრამისა და სურსათის ეროვნული სააგენტოს მიერ დაფინანსებულ კვლევაში „ახალი ინვაზიური მავნებლები ეროვნული გამოწვევა’’ ჩართული იყვნენ ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის სტუდენტები - სალომე კალანდაძე, ნანა მამულაიშვილი და მარიკა ბერიძე (კოორდინატორი ასოცირებული პროფესორი ლალი ჟღენტი). კვლევა მოიცავდა დასავლეთ საქართველოში ინვაზიური მავნებლების, კერძოდ, Drosophila suzukii-სა და Popillia japonica-ს მონიტორინგს.

შავი ზღვის დაცვის საერთაშორისო დღე ბსუ-ს საბუნებისმეტყველო მეცნიერებათა და ჯანდაცვის ფაკულტეტის სტუდენტებმა რამდენიმე ღონისძიებით აღნიშნეს. ბიოლოგიის დეპარტამენტის ორგანიზებით, მოეწყო ეკოტური ბათუმის შავი ზღვისპირა ზოლის ეკოლოგიური მდგომარეობის გასაცნობად. ეკოლოგიის, ქიმიისა და ბიოლოგიის საგანმანათლებლო პროგრამების პირველი კურსის სტუდენტები ასევე იმყოფებოდნენ შავი ზღვის ფლორისა და ფაუნის შემსწავლელ სამეცნიერო-კვლევითი ცენტრში. 30 ოქტომბერს გეოგრაფიის საგანმანათლებლო პროგრამის სტუდენტებს ZOOM-ის პლატფორმის საშუალებით სემინარი ჩაუტარდათ.

ბსუ-ს ეკოლოგიის სპეციალობის პირველი კურსის სტუდენტებმა ხის დარგვის საერთაშორისო დღისადმი მიძღვნილ ღონისძიებაში მიიღეს მონაწილეობა. გარემოს დაცვისა და ბუნებრივი რესურსების აჭარის სამმართველოსა და აჭარის სატყეო სააგენტოს ორგანიზებით ქობულეთის მუნიციპალიტეტის სოფელ თიკერში მცენარეთა დარგვის აქცია გაიმართა. სტუდენტებმა ველზე მოისმინეს ლექცია ნერგის დარგვის, მოვლისა და მნიშვნელობის შესახებ და დარგეს 100 ძირი წიწვოვანი მცენარე.

საბუნებისმეტყველო მეცნიერებათა და ჯანდაცვის ფაკულტეტის ბიოლოგია-ეკოლოგიის სპეციალობის სტუდენტებმა ცხოველთა დაცვის საერთაშორისო დღე აღნიშნეს. ახალგაზრდების ასოცირებულ პროფესორ ლალი ჟღენტის ხელმძღვანელობით ბათუმის ხარიტონ ახვლედიანის სახელობის მხარეთმცოდნეობის მუზეუმსა და შავი ზღვის ფლორისა და ფაუნის სამეცნიერო კვლევით ცენტრს ეწვივნენ. სტუდენტები გაეცნენ ბუნების განყოფილებაში აჭარის ფაუნას, ცხოველთა ექსპონატებს, ფრინველების, თევზების, ძუძუმწოვრების სისტემატიკურ ჯგუფებს და ბათუმის სადემონსტრაციო აკვარიუმში არსებულ თევზთა სახეობებს. ასევე დააკვირდნენ კორელაციას თევზების აგებულებასა და საცხოვრებელ გარემოს შორის. გაამახვილეს ყურადღება იშვიათ და გადაშენების პირას მყოფ სახეობებზე, პელაგიასა და ფსკერულ ფორმებზე, სხვადასხვა უხერხმლო ცხოველებზე, რომლების არიან ფილტრატორები დაბინძურების პროცესში.

სეზონური სკოლის „ეკოლოგიური პრობლემები და გარემოსდაცვითი განათლება“ ფარგლებში 25-28 სექტემბერს მონაწილეებს პრაქტიკული მეცადინეობები ჩაუტარდათ სხვადასხვა დაწესებულებაში. 25 სექტემბერს სტუდენტები და მოსწავლეები მდინარე მეჯინისწყლის და შავი ზღვის დაბინძურების მონიტორინგის მეთოდები და სარფის მიმდებარე ტერიტორიაზე ზღვის დაბინძურების გარემოებები შეისწავლეს. 26 სექტემბერს მონაწილეები გაეცნენ კოლხეთისა და მტირალას ეროვნული პარკების და კინტრიშის დაცული ტერიტორიების ბიომრავალფეროვნებას.