ტყის საერთაშორისო დღე ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა ფაკულტეტმა ბოტანიკურ ბაღში გასვლით აღნიშნა. დალი ვარშანიძემ ბიოლოგიის საგანმანათლებლო პროგრამის სტუდენტებისათვის ლექცია წაიკითხა თემაზე: “ბოტანიკური ბაღის არსი და დანიშნულება“. ღონისძიების დასრულების შემდეგ, ახალგაზრდებმა ბოტანიკური ბაღი დაათვალიერეს და ბაღის თანამშრომლებთან ერთად, სხვადასხვა მცენარის ნერგები დარგეს. ტყის საერთაშორისო დღე გაეროს გენერალურმა ასამბლეამ 1971 წელს დააწესა.

დაუნის საერთაშორისო დღეს ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის ბიოლოგიის დეპარტამენტმა საინფორმაციო შეხვედრა მიუძღვნა. ღონისძიება მიზნად ისახავდა სტუდენტებში გენეტიკური დარღვევების შესახებ ცნობადობისა და თვითშეგნების გაზრდა. შეხვედრაზე გაიმართა დისკუსია თემებზე: არის თუ არა დაუნის სინდრომი განაჩენი, რა მთავარი გამოწვევების წინაშე დგანან დღეს დაუნის სინდრომის მქონე ადამიანები, როგორ ვიზრუნოთ დაუნის სინდრომის მქონე ბავშვების სოციალურ რეაბილიტაციაზე და დავეხმაროს მათ მშობლებს ინფორმაციის მოპოვებაში.

BSU Eco Club-ი ახალგაზრდებში გარემოსდაცვითი საკითხების შესახებ ცნობიერების ამაღლების მიზნით ახორციელებს პროექტს „მწვანე დღეები“, რომლის ფარგლებში 22 აპრილს იგეგმება კონფერენციის - „ნარჩენების მართვა და მისი გამოწვევები“ ჩატარება. საინფორმაციო ხასიათის შეხვედრები ჩატარდა აჭარის საჯარო და კერძო სკოლებში. ეკოკლუბის წევრები შეხვდნენ ბათუმის, ქედის, შუახევისა და ხულოს საჯარო სკოლებისა და საქართველოს საპატრიარქოს ხიჭაურის წმ. გრიგოლ ხანძთელის სახელობის სკოლის X-XII კლასის მოსწავლეებს. ვიზიტის ფარგლებში დაბა ქედის საჯარო სკოლაში ჩატარდა ლექცია ნარჩენების მართვის პრობლემების შესახებ. ინიციატივას BSU Eco Club–ი პროგრამის ნარჩენების მართვის ტექნოლოგიები რეგიონებში ფაზა II–ის (WMTR II) ფარგლებში ახორციელებს CENN USAID–ის მხარდაჭერით.

ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის დიპლომირებული მედიკოსის უცხოენოვანი პროგრამის სტუდენტებმა მონაწილეობა მიიღეს ქალაქ თბილისში, ახალგაზრდული სამეცნიერო გაერთიანების მიერ ორგანიზებულ კონფერენციაში - „ახალგაზრდული საერთაშორისო პროექტი ონკოლოგიაში ONCO-2017“. სესია ეძღვნებოდა ონკოლოგიის მნიშვნელოვან და აქტუალურ საკითხებს. კონფერენციის მონაწილეებს გადაეცათ სერტიფიკატები.

ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის ფარმაციის სპეციალობის სტუდენტებს შეხვდა ფარმაცევტული კომპანიის „იმპექსფარმი“-ს წარმომადგენელი, დასაქმების კოორდინატორი გვანცა კუჭავა. კომპანიის წარმომადგენელმა მომავალ ფარმაცევტებს სააფთიაქო ქსელში სტაჟირება და დასაქმება შესთავაზა. ღონისძიების დასასრულს, განისაზღვრა მომავალი შეხვედრის თარიღი და დასაქმების პირობები.