ბათუმის შოთა რუსთაველის სახელმწიფო უნივერსიტეტის ტექნოლოგიურმა ფაკულტეტმა „ღია კარის დღეების“ პროექტის ფარგლებში, 3-4 მაისს ბათუმის N1 და N2 საჯარო სკოლების მეთორმეტე კლასის მოსწავლეებს უმასპინძლა. ინოვაციების ცენტრში მეთორმეტე კლასელებს ლექცია ჩაუტარდათ შენობათა სტრუქტურული დიზაინისა და მშენებლობის დაპროექტების ავტომატიზებული სისტემების ძირითადი მეთოდების გამოყენებასა და დაპროექტების ავტომატიზებული სისტემების ძირითადი მეთოდებზე. ღონისძიების ფარგლებში მოსწავლეებმა დაათვალიერეს ფაბლაბ ლაბორატორია, სადაც საშუალება ჰქონდათ გაცნობოდნენ შენობის მოდელების აგებისა და სტრუქტურული დიზაინის მეთოდებს.

ბათუმის შოთა რუსთაველის სახელმწიფო უნივერსიტეტის ტექნოლოგიურმა ფაკულტეტმა ღია კარის დღეების ფარგლებში, ქობულეთის მუნიციპალიტეტის სოფელ დაგვას საჯარო სკოლის მეთორმეტე კლასის მოსწავლეებს უმასპინძლა. ინოვაციების ცენტრში აბიტურიენტებს ლექცია ჩაუტარდათ შენობათა სტრუქტურული დიზაინისა და მშენებლობის დაპროექტების ავტომატიზებული სისტემების ძირითადი მეთოდების გამოყენებით. მოსწავლეებმა, ასევე დაათვალიერეს ფაბლაბ ლაბორატორია, სადაც გაეცნენ სტრუქტურული მოდელების აგების სხვადასხვა მეთოდს.

ბსუ-ში სოფლის მეურნეობის ექსტენციის პროექტის ფარგლებში, აშშ-ის სოფლის მეურნეობის დეპარტამენტის წარმომადგენელმა (USDA), პროექტის მენეჯერმა ბენჟამენ კარინმა, აშშ-ის განათლების საერთაშორისო სპეციალისტმა ლიზა ლოქსმენმა, აშშ-ის Central State University-ს წარმომადგენელმა, საერთაშორისო ექსპერტმა პროსპერ დუამეკპორმა და აშშ-ის Prairie View A&M University-ის წარმომადგენელმა საერთაშორისო ექსპერტმა სინტია ფერფაქსმა სტუდენტებისათვის, ბათუმის N1, N28 საჯარო სკოლის მოსწავლეებისა და ახალგაზრდა ფერმერებისათვის ტრენინგები ჩაატარეს. სწავლება მიზნად ისახავდა ახალგაზრდების სოფლის მეურნეობაში ჩართულობას და დარგის პოპულარიზაციას.

ბათუმის შოთა რუსთაველის სახელმწიფო უნივერსიტეტის ტექნოლოგიური და საბუნებისმეტყველო მეცნიერებათა და ჯანდაცვის ფაკულტეტის ოცმა სტუდენტმა და კურსდამთავრებულმა აჭარის ა.რ. სოფლის მეურნეობის სამინისტროს 2022 წლის ქვეპროგრამის „საგანმანათლებლო და სამეცნიერო პრაქტიკის დანერგვის“ ფარგლებში, სამინისტროსა და მის საქვეუწყებო დაწესებულებებში ანაზღაურებადი, ცხრათვიანი სტაჟირება გაიარა. სტაჟიორებმა უნივერსიტეტში შემაჯამებელი პრეზენტაცია წარმოადგინეს და სასწავლო პრაქტიკის შესახებ ისაუბრეს. პროგრამაში მონაწილე სტუდენტებს სერტიფიკატები გადასცეს და წარმატებები უსურვეს აჭარის ა.რ. სოფლის მეურნეობის მინისტრმა ზაზა შავაძემ, ბსუ-ს რექტორმა, პროფესორმა მერაბ ხალვაშმა, ადმინისტრაციის ხელმძღვანელმა მერაბ დიასამიძემ, აჭარის ა.რ. სოფლის მეურნეობის მინისტრის მოადგილემ ირმა აფხაზავამ.

ბათუმის შოთა რუსთაველის სახელმწიფო უნივერსიტეტში ტექნოლოგიური ფაკულტეტის აგრარული მიმართულების პროფესორ-მასწავლებლებისათვის სტუდენტებისათვის, ექსტენციის სპეციალისტებისა და სხვა დაინტერესებული პირებისთვის ჩატარდა აგრარული ექსტენციის დისტანციური მოკლევადიანი კურსი. სწავლებას უძღვებოდნენ აშშ-ს სხვადასხვა უნივერსიტეტის წარმომადგენლები და მოდერატორობას უწევდა ბსუ-ს ჰუმანიტარულ მეცნიერებათა ფაკულტეტის ასისტენტ პროფესორი, FOF-ის ექსტენციის სპეციალისტი ლია დავითაძე. მოკლევადიანი კურსი „საქართველოს სოფლის მეურნეობის ექსტენციის მოდელი ახალგაზრდების განვითარებისთვის“ პროექტის ფარგლებში ჩატარდა, რომელსაც „მომავლის ფერმერი“ (FOF) ამერიკის შეერთებული შტატების სოფლის მეურნეობის დეპარტამენტის (USDA) ფინანსური მხარდაჭერით და აჭარის ავტონომიური რესპუბლიკის სოფლის მეურნეობის სამინისტროს ხელშეწყობით ახორციელებს.