ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის 27 სტუდენტი სასწავლო პრაქტიკას გერმანიაში, კუნძულ უსედომსა და რუგენზე ტურიზმის ინდუსტრიის ორგანიზაციებში გადის. ახალგაზრდებს საშუალება ექნებათ 2 თვის განმავლობაში გაეცნონ სასტუმროს ყველა ძირითადი სტრუქტურული ერთეულის ფუნქციონირებას. სტუდენტები თეორიული ცოდნის მიღებასთან ერთად, აქტიურად ჩაერთვებიან სასტუმროს ყოველდღიურ საქმიანობაში. სასწავლო პრაქტიკა გერმანიის შვერინის ბალტიკის კოლეჯთან გაფორმებული მემორანდუმის ფარგლებში ხორციელდება.

წარმატებით გაიარა აკრედიტაცია ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის ახალმა საგანმანათლებლო პროგრამამ „ტურიზმისა და მასპინძლობის მენეჯმენტი“, მისანიჭებელი კვალიფიკაცია „ბიზნესის ადმინისტრირების მაგისტრი მენეჯმენტში“. აღნიშნული პროგრამა 2015-2016 სასწავლო წლიდან განხორციელდება.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტმა 2014-2015 სასწავლო წელი წარმატებით დაასრულა. მიმდინარე სასწავლო წელს ტურიზმის ფაკულტეტის 124 სტუდენტს მიენიჭა ბიზნესის ადმინისტრირების ბაკალავრის აკადემიური ხარისხი ტურიზმში. ტურიზმის ფაკულტეტის დეკანმა, პროფესორმა როსტომ ბერიძემ კურსდამთავრებულებს სწავლის დასრულება მიულოცა, წარმატებები უსურვა და წარმატებულებს სერტიფიკატები გადასცა.

ტურიზმის ფაკულტეტის 70-მა სტუდენტმა პრომეთეს მღვიმე, დადიანების საზაფხულო რეზიდენცია - სალხინო და დადიანების სასახლე მოინახულა. ექსკურსია სასწავლო-პრაქტიკულ ხასიათს ატარებდა, რაც ხელს შეუწყობს შემდგომში ახალგაზრდებში კულტურულ ტურიზმსა და საექსკურსიო საქმეში პროფესიული უნარ-ჩვევების გამომუშავებას.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტისა და გერმანიის ევროპული ბიზნესის სკოლის ორგანიზებით I საერთაშორისო საზაფხულო სკოლა ,,ტურიზმი: ეკონომიკა და ბიზნესი“ ტარდება. ხუთდღიანი სწავლება მიზნად ისახავს ტურიზმის ინდუსტრიის სიახლეების გაცნობასა და გერმანელი კოლეგების გამოცდილების გაზიარებას. საერთაშორისო საზაფხულო სკოლის 30-მდე მონაწილე ისეთ მნიშვნელოვან საკითხებს განიხილავენ, როგორიცაა: ტურიზმის განვითარების ხედვა და სტრატეგია, ტურიზმის ინდუსტრიის განვითარების ტენდენციები, ტურიზმი და ეკოლოგია და ტურიზმი გლობალურ დონეზე. ქართველი და გერმანელი სტუდენტები პროფესორ-მასწავლებლებთან ერთად მტირალას ეროვნულ პარკში ვორკშოფებს მოაწყობენ და აჭარის მუნიციპალიტეტებში გაემგზავრებიან აგრო, ეთნო და ეკო ტურიზმის პოტენციალის გასაცნობად.