ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტში ჩატარდა ისტორიისა და არქეოლოგიის განყოფილების უფროსი მეცნიერ-თანამშრომლის ირინე ვარშალომიძისა და ბათუმის არქეოლოგიური მუზეუმის მეცნიერ-თანამშრომლის ნინო ძნელაძის ონლაინ სემინარი, თემაზე: „ხარიტონ ახვლედიანის სახელობის აჭარის მუზეუმში დაცული მონეტების კატალოგი“. მომხსენებლებმა წარადგინეს ორენოვანი კატალოგი, რომელიც მომზადდა შოთა რუსთაველის ეროვნული სამეცნიერო ფონდის ფუნდამენტური კვლევებისათვის სახელმწიფო სამეცნიერო გრანტების კონკურსში გამარჯვებული პროექტის ფარგლებში.

ბსუ-ს ნიკო ბერძენიშვილის ინსტიტუტის, რუმინეთის მეცნიერებათა ეროვნული აკადემიისა და კონსტანცას ოვიდიუსის უნივერსიტეტის რელიგიისა და კანონიკური მიმართულების კვლევის ცენტრის ორგანიზებით, ონლაინ რეჟიმში ჩატარდა საერთაშორისო სამეცნიერო კონფერენცია „რელიგია და სამართალი“. ორდღიანი კონფერენციის მუშაობაში მონაწილეობდა ორი ქვეყნის 40-ზე მეტი მონაწილე. სამეცნიერო სესიაზე წარდგენილ მოხსენებებს განიხილავს შესაბამისი სამეცნიერო კომიტეტი, რომლის შემდეგაც სამეცნიერო ნაშრომები დაიბეჭდება რუმინეთის მეცნიერებათა ეროვნული აკადემიის გამომცემლობის მიერ.

ცნობილი მეცნიერის, საზოგადო მოღვაწის, ბათუმის შოთა რუსთაველის სახელმწიფო უნივერსიტეტის ემერიტუს პროფესორის, ქრისტიანული კულტურის კვლევის ცენტრის ხელმძღვანელისა და ნიკო ბერძენიშვილის ინსტიტუტის ისტორიისა და არქეოლოგიის განყოფილების ხელმძღვანელის ბიჭიკო დიასამიძის მემორიალური დაფა გაიხსნა. მკვლევარ ბიჭიკო დიასამიძის სამეცნიერო ინტერესის სფერო გახლდათ საქართველოს მართლმადიდებლური ეკლესიის ისტორია, რომელთაც მკვლევარმა 70-ზე მეტი სამეცნიერო ნაშრომი და 10 მონოგრაფია მიუძღვნა.

ბსუ-ს ნიკო ბერძენიშვილის ინსტიტუტს ყაზახეთის მუსტაფა ჩოგაის კვლევითი ცენტრის დირექტორი ბაკირ აბდიჟალელი ეწვია. ვიზიტის ფარგლებში პროფესორი ბაკირი გაეცნო ინსტიტუტის საქმიანობას და ფონდებში დაცულ უნიკალურ მასალებს. შეხვედრისას საუბარი შეეხო სამომავლო თანამშრომლობის პერსპექტივებს და ერთობლივი სამეცნიერო ღონისძიებების ორგანიზებას. დაიგეგმა თანამშრომლობის მემორანდუმის გაფორმებაც.

ბსუ-ს ნიკო ბერძენიშვილის ინსტიტუტის ისტორიისა და არქეოლოგიის განყოფილების მთავარმა მეცნიერ თანამშრომელმა უჩა ოქროპირიძემ სემინარი ჩაატარა თემაზე: პროფესორ დენიზა სუმბაძის ზოგიერთი ორიგინალური ხედვის გააზრებისათვის. მომხსენებელმა განიხილა პროფესორ დენიზა სუმბაძის წერილები და მათში წარმოჩენილი აქტუალური საკითხები. ასევე ყურადღება გაამახვილა იმ პარალელური აზრებზე, რომლებსაც ქ-ონ დენისა სუმბაძის ნაწარმოებებმა მათი გაცნობა-განხილვისას წარმოიშვა.