ბათუმის შოთა რუსთაველის სახელმწიფო უნივერსიტეტის ზუსტ მეცნიერებათა და განათლების ფაკულტეტის „პროფესიული და უწყვეტი განათლების“ სამაგისტრო საგანმანათლებლო პროგრამამ მოიპოვა აკრედიტაცია. ვულოცავთ სტუდენტებსა და პროფესორ-მასწავლებლებს ამ მნიშვნელოვან წარმატებას!
საერთაშორისო კონფერენციის „ჰუმანიტარული მეცნიერებები ინფორმაციულ საზოგადოებაში - 4“ ფარგლებში მასობრივი კომუნიკაციებისა და მედიის კვლევების სექციაში საქართველოში აშშ-ს საელჩოს მედია განათლების პროგრამის ფარგლებში გაიმართა შეხვედრა ილინოისის სახელმწიფო უნივერსიტეტის (აშშ) მასობრივი კომუნიკაციების სკოლის აღმასრულებელ დირექტორთან სტივენ ჰანტთან და კონვერგენტული მედიის დირექტორთან ნათან კარპენტერთან და TV-10 News დირექტორთან ლორა ტრენდლ პოლუსთან, ასევე ჩიკაგოს დეპოლის უნივერსიტეტის პროფესორ და მედია განათლების პროგრამის დირექტორთან დენის მეტსონთან.
ბსუ-ს ხარისხის უზრუნველყოფის სამსახურის ხელმძღვანელმა, პროფესორმა ვლადიმერ ღლონტმა, ეკონომიკისა და ბიზნესის ფაკულტეტის ხარისხის უზრუნველყოფის სამსახურის უფროსმა, პროფესორმა ასიე ცინცაძემ და ბსუ-ს ხარისხის უზრუნველყოფის სამსახურის სამდივნოს უფროსმა, ასისტენტ პროფესორმა თამარ ღოღობერიძემ მონაწილეობა მიიღეს ქალაქ პრაღაში გამართულ საერთაშორისო სამეცნიერო კონფერენციაში „გლობალურ ეკონომიკაში ბიზნესის, მენეჯმენტის, სოციალური და ჰუმანიტარული მეცნიერებების პერსპექტივა“. კონფერენციაზე წარდგენილი იყო ბსუ-ს მიზნობრივი კვლევითი პროექტის „დაგროვებითი საპენსიო სისტემით მისაღები სოციალური სარგებლის ღირებულების პროგნოზირება“ კვლევის შედეგების ამსახველი ორი ნაშრომი: „სადეპოზიტო დანაზოგები და მათ სარგებლიანობაზე მოქმედი ფაქტორები“ და „დემოგრაფიული დივიდენდი და საპენსიო სისტემა საქართველოში“. ნაშრომები გამოქვეყნდება ჟურნალში „Special Education“, რომელიც ინდექსირებულია Scopus-ის ბაზაში.
ვირჯინიის უნივერსიტეტის სამეცნიერო საქმიანობის კომერციალიზაციის ცენტრის დირექტორმა, უნივერსიტეტის ვიცე პრეზიდენტმა რიჩარდ ნადარმა ბსუ-ში ოთხდღიანი ტრენინგი ჩაატარა. ტრენინგი მოიცავდა ისეთ აქტუალურ საკითხებს, როგორიცაა: კვლევის სტრატეგიული დაგეგმვის ჩარჩო დოკუმენტი, ტრანსდისციპლინური, ინტერდისციპლინური, მულტიდისციპლინური კვლევა, კვლევის ზეგავლენა, კვლევის პორტფოლიოს შექმნა (ინდივიდუალური და ინსტიტუციური პერსპექტივები). პროფესორმა რიჩარდ ნადარმა მსმენელებს გაუზიარა ამერიკული საერთაშორისო სამეცნიერო ცენტრებისა და დაფინანსების წყაროების გამოცდილება, ესაუბრა პარტნიორობის შემადგენელ ელემენტებზე, კვლევის პრიორიტეტულ მიმართულებებსა და კომერციალიზაციაზე.
10-12 ოქტომბერს, ივანე ჯავახიშვილის სახელმწიფო უნივერსიტეტში გამართულ სემინარში - „ხარისხის შიდა უზრუნველყოფა, პერსპექტივები და გამოწვევები" მონაწილეობა მიიღეს ბსუ-ს ხარისხის უზღუნველყოფის სამსახურის წარმომადგენლებმა. სემინარზე მონაწილეებმა განიხილეს ირლანდიის ხარისხის შიდა უზრუნველყოფის მოდელი, სადოქტორო განათლების ხარისხის უზრუნველყოფისა და ონლაინ სწავლების ხარისხის უზრუნველყოფის საკითხები. სემინარის სამუშაო ფორმატში მოხსენებები წაიკითხეს ირლანდიის ოთხი უნივერსიტეტის წარმომადგენელმა (University of Limerick, Dublin City University, Mary Immaculate College, South East Technological University), ევროპის უნივერსიტეტების ასოციაციისა და სადოქტორო განათლების საბჭოს (EUA-CDE) წარმომადგენლებმა, უკრაინის უნივერსიტეტების ხარისხის უზრუნველყოფის სამსახურების, ასევე, ქართული უნივერსიტეტების წარმომადგენლებმა.
