ქ. ბათუმის მერი გიორგი ერმაკოვი ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის სტუდენტებსა და პროფესორ-მასწავლებლებს შეხვდა და განხორცილებული პროგრამები და სამომავლო გეგმები გააცნო. შეხვედრის ფარგლებში ქ. ბათუმის მერიასა და ბსუ-ს ეკონომიკისა და ბიზნესის ფაკულტეტს შორის თანამშრომლობის მემორანდუმი გაფორმდა. დოკუმენტის თანახმად, ეკონომიკისა და ბიზნესის ფაკულტეტის სტუდენტები მერიის შესაბამის სამსახურებში გაივლიან სტაჟირებას, ხოლო უმაღლესი საგანმანთლებლო დაწესებულების პროფესორები, მერიის საფინანსო-ეკონომიკური სამსახურის თანამშრომლების კვალიფიკაციის ამაღლების მიზნით ტრენინგების ჩატარებას უზრუნველყოფენ. ფაკულტეტი ასევე მონაწილეობას მიიღებს მერიის მერ ჩატარებულ სოციალურ კვლევებში. შეხვედრა კითხვა-პასუხის რეჟიმში წარიმართა და ქ. ბათუმის მერმა სტუდენტების აქტუალურ შეკითხვებს უპასუხა.

ეკონომიკისა და ბიზნესის ფაკულტეტის პროფესორმა ვაჟა ვერულიძემ საჯარო ლექცია წაიკითხა თემაზე: „საქართველოს ეკონომიკის თანამედროვე გამოწვევები და განვითარების პერსპექტივები“ . ლექცია მიეძღვნა ისეთი მნიშვნელოვანი მაკროეკონომიკური ინდიკატორების ანალიზს, როგორიცაა დასაქმების დონე, მთლიანი შიდა პროდუქტის (მშპ) მოცულობა, საგადასახადო შემოსავლების სიდიდე, პირდაპირი უცხოური ინვესტიციების მოცულობა, საგადასახდელო ბალანსის მიმდინარე ანგარიში და საგარეო ვაჭრობის სალდო. შეფასდა საქართველოს ეკონომიკის განვითარების რეალური მდგომარეობა.

ეკონომიკისა და ბიზნესის ფაკულტეტის ასოცირებულმა პროფესორმა დავით ქათამაძემ ჩაატარა სამეცნიერო სემინარი თემაზე: „მაკროეკონომიკური სტაბილიზაციის პრობლემები ღია ეკონომიკის პირობებში“. სემინარი მიეძღვნა ისეთი მნიშვნელოვანი საკითხების განხილვას როგორიცაა: ეკონომიკური წონასწორობის პრობლემები ფიქსირებულ სავალუტო კურსთა სისტემის პირობებში; საბიუჯეტო და ფულად-საკრედიტო პოლიტიკის გავლენა საგადასახდელო ბალანსზე; ექსპანსიური საბიუჯეტო და ფულად-საკრედიტო პოლიტიკის გავლენა ეროვნულ შემოსავალზე მცურავ სავალუტო კურსთა სისტემის პირობებში.

ფინანსების, აღრიცხვისა და აუდიტის დეპარტამენტის ინიციატივით სტუდენტთა დასაქმების ხელშეწყობის მიზნით „თიბისი ბანკი კონსტანტას“ წარმომადგენლებმა შეხვედრა გამართეს ეკონომიკისა და ბიზნესის ფაკულტეტის სტუდენტებთან.„თიბისი ბანკი კონსტანტას“ მენეჯერმა ნეკა გიორგიძემ სტუდენტებს გამოცდილება გაუზიარა, თიბისი ბანკის ისტორია, მისია, მიზანი გააცნო და ახალგაზრდებს შესთავაზა ანაზღაურებადი სტაჟირების პროგრამა დასაქმების პერსპექტივით. დაიგეგმა ბათუმის შოთა რუსთველის სახელმწიფო უნივერსიტეტის ეკონომიკისა და ბიზნესის ფაკულტეტისა და „თიბისი ბანკ კონსტანტას“ ერთობლივი პროექტების განხორციელება.

ეკონომიკისა და ბიზნესის ფაკულტეტის ბიზნესის ადმინისტრირების დეპარტამენტის ხელმძღვანელმა, ასოცირებულმა პროფესორმა ბადრი გეჩბაიამ I საერთაშორისო სამეცნიერო-პრაქტიკული კონფერენციაში „უკრაინა - ევროკავშირი, თანამედროვე ტექნოლოგიები, ეკონომიკა და სამართალი“ მიიღო მონაწილეობა. საერთაშორისო ფორუმის ფარგლებში ბათუმის შოთა რუსთაველის სახელმწიფო უნივერსიტეტს, მიშელ ბალუდანსკის აკადემიურ საზოგადოებასა და ჩერნიგოვის ეროვნულ ტექნოლოგიურ უნივერსიტეტს შორის თანამშრომლობის მემორანდუმი გაფორმდა. ხელშეკრულება ითვალისწინებს Erasmus+ის პროგრამის ფარგლებში სტუდენტების, პროფესორ-მასწავლებლებისა და ადმინისტრაციული პერსონალის გაცვლითი პროგრამების განხორციელებას.