ბსუ-ს ეკონომიკისა და ბიზნესის ფაკულტეტისა და ტურიზმის ფაკულტეტის პროფესორ-მასწავლებლებმა მონაწილეობა მიიღეს ლატვიის სიცოცხლის მეცნიერებათა და ტექნოლოგიების უნივერსიტეტში გამართულ საერთაშორისო სამეცნიერო კონფერენციაში „ეკონომიკური მეცნიერება სოფლის განვითარებისთვის“. მომხსენებლებმა სესიის მონაწილეებს გააცნეს ეკონომიკის დარგში მიმდინარე სიახლეები და ინდივიდუალური სამეცნიერო კვლევის შედეგები. კონფერენციის ფარგლებში გამოქვეყნდება ყველა სტატია, მათგან ორი არის მასპინძელი უნივერსიტეტის წარმომადგენლების ჩართულობით განხორციელებული კვლევა. სტატიები გამოქვეყნდება მაღალრეიტინგულ სამეცნიერო გამოცემაში.

ეკონომიკისა და ბიზნესის ფაკულტეტის დეკანი, პროფესორი ნათია წიკლაშვილი და დეკანის თანაშემწე, ასისტენტ-პროფესორი თამარ ფოლადაშვილი სამუშაო შეხვედრით იმყოფებოდნენ ტალინის ტექნოლოგიურ უნივერსიტეტში, ესტონეთში. ვიზიტის ფარგლებში დელეგაციის წევრები შეხვდნენ ბიზნესისა და მართვის სკოლის დეკანის მოადგილეს, პროფესორ ლაივი ლაიდროს და პარტნიორებთან და კურსდამთავრებულთა თანამშრომლობის სამსახურის უფროსს კადრი ანა მატსონს. ვიზიტის ფარგლებში განხილული იყო ერთობლივი პროგრამების შემუშავების, აკადემიური პერსონალის თანამშრომლობისა და სტუდენტთა გაცვლის საკითხები. დაიგეგმა მომავალი პარტნიორობის მიმართულებები.

2-6 მაისს ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის ასისტენტ-პროფესორი გიორგი ქათამაძე „ერაზმუს+“-ის გაცვლითი პროგრამის ფარგლებში, იმყოფებოდა რუმენეთში, შტეფან ჩელ მარეს უნივერსიტეტში. ვიზიტის ფარგლებში გიორგი ქათამაძემ შტეფან ჩელ მარეს უნივერსიტეტის ეკონომიკის ფაკულტეტის სტუდენტებს ჩაუტარა ლექციები შემდეგ თემატიკაზე: სახელმწიფო რეგულაციების გავლენა ბიზნეს სექტორზე, ბიზნესის თანამედროვე გამოწვევები, საქართველოში ბიზნეს სექტორის პოსტ პანდემიური მდგომარეობის ანალიზი და პანდემიის დადებითი ეფექტი ბიზნეს სუბიექტებზე.

ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის ასოცირებულმა პროფესორმა ბადრი გეჩბაიამ, ასისტენტ პროფესორებმა ქეთევან გოლეთიანმა და გიორგი ქათამაძემ მონაწილეობა მიიღეს 4-5 მაისს, რუმინეთში, ქალაქ სუჩავაში გამართულ საერთაშორისო ეკონომიკურ კონფერენციაში „გამოწვევები და შესაძლებლობები მდგრადი განვითარებისთვის“. ბადრი გეჩბაიამ სესიაზე მოხსენება წარადგინა თემაზე: „საქართველოს რეგიონების მდგრადი განვითარების პოლიტიკა: არსებული რეალობის ანალიზი“, ასისტენტ პროფესორმა ქეთევან გოლეთიანმა - „ლოგისტიკური სერვისების განვითარების ტენდენციები აჭარის რეგიონის ტურიზმის სექტორში“ და ასისტეტნტ პროფესორმა გიორგი ქათამაძემ - „კრიზისი როგორც ბიზნეს სუბიექტების დაჩქარებული განვითარების შესაძლებლობა“.

ბსუ-ს ეკონომიკისა და ბიზნესის ფაკულტეტისა და ბათუმის ტექნოპარკის მხარდაჭერით მენეჯმენტის სპეციალობის III კურსის სტუდენტებთან სასწავლო კურსის „ინოვაციური მენეჯმენტის“ ფარგლებში (ხელმძღვანელი, ასოც. პროფესორი ირმა ჩხეიძე) შეხვედრა გაიმართა. ღონისძიება მიზნად ისახავდა სტუდენტურ გუნდებში შემუშავებული ინოვაციური ბიზნესიდეების განხილვა-გაანალიზებას. შემდგომი მოქმედების სტატეგიულ გეგმად დაისახა ბათუმის ტექნოპარკის ლაბორატორიებში სტუდენტური ინოვაციური ბიზნესიდეების პროტოტიპების შექმნა, რაც ხელს შეუწყობს სტუდენტების პრაქტიკული უნარ-ჩვევების რეალიზებასა და ჩამოყალიბებას.