ბათუმის შოთა რუსთაველის სახელმწიფო უნივერსიტეტის იურიდიული ფაკულტეტის სტუდენტებმა თამარ გვარიშვილმა და ნიკა ცეცხლაძემ აჭარის დებატების ტურნირში გაიმარჯვეს. პირველობა საპარლამენტო და ღირებულებითი ფორმატის დებატებში 9-10 ივნისს მიმდინარეობდა და შეჯიბრში სტუდენტებთან ერთად, მოსწავლეებიც მონაწილეობდნენ. ტურნირის გამართვამდე 150 სტუდენტსა და მოსწავლეს ტრენინგები ჩაუტარდათ, როგორც ბათუმში ასევე სხვადასხვა მუნიციპალიტეტში. პროექტი აჭარის ა.რ. განათლების, კულტურისა და სპორტის სამინისტროს სპორტისა და ახალგაზრდობის საქმეთა დეპარტამენტის ორგანიზებით განხორციელდა. უნივერსიტეტი ულოცავს სტუდენტებს გამარჯვებას და უსურვებს წარმატებებს.

საქართველოს დამოუკიდებლობის აღდგენის 100 წლის იუბილეს მიეძღვნა ბათუმის შოთა რუსთაველის სახელმწიფო უნივერსიტეტში გამართული საჯარო ლექცია თემაზე: „ოჯახში ძალადობა“. ბათუმის რაიონული პროკურატურის პროკურორებმა იურიდიული ფაკულტეტის სტუდენტებს გააცნეს ოჯახური ნიშნით ჩადენილი დანაშაულის აღმოფხვრაზე ორიენტირებული საქართველოს პროკურატურის სტრატეგია და სტატისტიკური ინფორმაცია აჭარის რეგიონში ოჯახური ნიშნით ჩადენილი დანაშაულის შესახებ. ღონისძიების ფარგლებში ასევე შედგა საქართველოს პროკურატურის სტაჟირების სისტემის წარდგენა. პროკურორებმა მომავალ სამართალდამცავებს სტაჟიორთა მიღების წესსა და საქართველოს პროკურატურის საქმიანობის სპეციფიკაზე ესაუბრენ.

ბათუმის შოთა რუსთაველის სახელმწიფო უნივერსიტეტსა და ილიას სახელმწიფო უნივერსიტეტს შორის დადებული თანამშრომლობის მემორანდუმის ფარგლებში, იურიდიული ფაკულტეტის სტუდენტებისათვის ნაფიც მსაჯულთა თემაზე საჯარო ლექცია გაიმართა. ნაფიც მსაჯულთა სასამართლოს მიზანი მართლმსაჯულების სისტემის მიმართ ნდობის ამაღლება და საზოგადოების ჩართულობის ზრდაა მართლმსაჯულების განხორციელების პროცესში. 2007 და 2009 წლებში ჩატარებულმა კვლევებმა როგორც აჩვენა, საზოგადოების ნაწილს ჰქონდა ინფორმაცია ნაფიც მსაჯულთა სისტემის შესახებ და პოზიტიური მოლოდინიც გააჩნდა, ხოლო ბევრისთვის უცნობი დარჩა საკითხები კონკრეტული პროცედურის შესახებ. აღნიშნული საკითხების შესახებ სტუდენტების ინფორმირებას ითვალისწინებს საჯარო ლექციების სერია, რომელიც საქართველოს სხვადასხვა ქალაქში იმართება.

ბათუმის შოთა რუსთაველის სახელმწიფო უნივერსიტეტისა და „სამოქალაქო განათლების ცენტრის - Civic Education Centre” ორგანიზებით, სამართალმცოდნეობის სპეციალობის სტუდენტებისათვის გაიმართა ტრენინგი თემაზე - „ქვეყნის შიგნით ადგილნაცვალ პირთა სამართლებრივი დაცვის ხელის შემშლელი ფაქტორი“. სწავლება მიზნად ისახავდა სტუდენტებისთვის ქვეყანაში გადაადგილების აქტუალური სამართლებრივი საკითხებისა და საქართველოს მაგალითზე ქვეყნის შიგნით ადგილნაცვალ პირთა სამართლებრივი დაცვის ხელისშემშლელი ფაქტორების გაცნობას. ტრენინგში მონაწილეეებს გადაეცათ სერტიფიკატები.

ბათუმის შოთა რუსთაველის სახელმწიფო უნივერსიტეტის იურიდიული ფაკულტეტის სტუდენტების მონაწილეობით საიმიტაციო დარბაზში იმიტირებული სასამართლო პროცესი ჩატარდა. ღონისძიება მიზნად ისახავდა მომავალი იურისტებისათვის სასამართლო პროცესში გამოსვლის გამოცდილების მიღებასა და პრაქტიკული უნარ-ჩვევების გაღრმავებას. იმიტირებულ სასამართლო პროცესში 12 ნაფიცი მსაჯული არის ჩართული. მესამე ეტაპი ივნისში გაიმართება და გამარჯვებულ გუნდებს სამახსოვრო საჩუქრები გადაეცემათ. შეჯიბრი იურიდიული ფაკულტეტის სტუდენტური თვითმმართველობის ორგანიზებით იმართება.