ევროკავშირის კვლევისა და ინოვაციის პროგრამის „ჰორიზონტი 2020“-ის პროექტის „ციფრული ინოვაციების დანერგვა სკოლებში რეგიონული ინოვაციური ჰაბებისა და მენტორინგის მოდელის საშუალებით“ („iHubs4Schools - Accelerating Digital Innovation in Schools through Regional Innovation Hubs and a Whole-School Mentoring Model“, პროექტის ნომერი - H2020-SC6-TRANSFORMATIONS-2020) ფარგლებში 2023 წლის 26-27 აპრილს, ტალინის უნივერსიტეტში (ესტონეთი) ჩატარდა კონსორციუმის წევრების მორიგი შეხვედრა, რომელშიც ბსუ-დან პროექტში ჩართული 4 პერსონალი მონაწილეობდა: ასოცირებული პროფესორი თათია ნაკაშიძე-მახარაძე, რექტორის მოადგილე, პროფესორი თამარ სირაძე, აჭარის განათლებისა და სპორტის სამინისტროს განათლების დეპარტამენტის უფროსი სპეციალისტი ნინო ნაკაშიძე, ასოცირებული პროფესორი მადონა მიქელაძე.

ბსუ „USAID-ის საბაზისო განათლების პროგრამის“ ფარგლებში იდეატორთა კლუბებს ახორციელებს. ბათუმის შოთა რუსთაველის სახელმწიფო უნივერსიტეტის პედაგოგიკურ მეცნიერებათა დეპარტამენტის ორგანიზებით ქედის მუნიციპალიტეტის სოფელ ძენწმანის საჯარო სკოლაში მოქმედი „იდეატორთა კლუბის“ მორიგი სამუშაო შეხვედრა გაიმართა. კლუბის ბიზნეს-პარტნიორია „კერკი - მშრალი ხილის საწარმო“. შეხვედრაში კლუბის ხელმძღვანელი, ბსუ-ს პედაგოგიკურ მეცნიერებათა დეპარტამენტის ხელმძღვანელი, ასოცირებული პროფესორი ნატო შეროზია, ზოგადი განათლების დაწყებითი საფეხურის მასწავლებლის მომზადების ინტეგრირებული საბაკალავრო-სამაგისტრო საგანმანათლებლო პროგრამის IV კურსის სტუდენტები - ქეთევან მახაჭაძე და მელანო ანანიძე, ძენწმანის საჯარო სკოლის მასწავლებელი ეთერ სურმანიძე და დაწყებითი კლასების მოსწავლეები მონაწილეობდნენ.

აშშ-ის ელჩმა კელი დეგნანმა, ბსუ-ს რექტორმა მერაბ ხალვაშმა, აჭარის ა.რ. სოფლის მეურნეობის მინისტრმა ზაზა შავაძემ და განათლების, კულტურისა და სპორტის მინისტრმა მაია ხაჯიშვილმა ბათუმის შოთა რუსთაველის სახელმწიფო უნივერსიტეტის პროფესიული პროგრამების მართვისა და უწყვეტი განათლების ცენტრის ბაზაზე აგრარული ექსტენციის ცენტრი გახსნეს. ცენტრის დაარსების მიზანია სოფლის მეურნეობის დარგების მხარდაჭერა, საზოგადოებისათვის აგრარული ექსტენციის მიწოდებაში უნივერსიტეტის როლის და მონაწილეობის გაძლიერება ბსუ-ს აკადემიური პირების და კვლევითი ცენტრების ბაზებზე განხორციელებული კვლევების ექსტენციის სხვადასხვა პროგრამებად შემუშავების და განხორციელების მეშვეობით.

ბათუმის შოთა რუსთაველის სახელმწიფო უნივერსიტეტის საფინანსო სერვისების პროგრამის სტუდენტებს ამავე მიმართულების საგანმანათლებლო პროგრამის წარმატებულმა კურსდამთავრებულმა და ლიბერთი ბანკის თანამშრომელმა ხატია შამანაძემ ბანკნოტებისა და მონეტების ფორმირებისა და სალაროს გახსნა-დახურვის პროცედურების მასტერკლასი ჩაუტარა. ხატია შამანაძემ სტუდენტებს საკუთარი გამოცდილებაც გაუზიარა და ღონისძიების დასასრულს აქტუალურ შეკითხვებს უპასუხა.

ბათუმის შოთ რუსთველის სახელმწიფო უნივერსიტეტი პროფესიული პროგრამების მართვისა და უწყვეტი განათლების ცენტრის სტუდენტებს ბსუ-ს სტუდენტთა კარიერული განვითარების, კულტურისა და სპორტის დეპარტამენტის წევრები შეხვდნენ და მიაწოდეს ინფორმაცია „ბსუ-ს სტუდენტური დღეები 2023’’-ის შესახებ . სტუდენტური დღეების ფარგლებში სტუდენტები ფაკულტეტების მიხედვით ეჯიბრებიან ერთმანეთს სპორტული, კულტურული და ინტელექტუალური აქტივობების სხვადასხვა სახეობაში. გამარჯვებული სტუდენტები დაჯილდოვდებიან თასებით, ფასიანი პრიზებით და შემეცნებითი საექსკურსიო ტურებით. ყველაზე მეტ სახეობაში გამარჯვებულ ფაკულტეტს კი გადაეცემა „ბსუ-ს სტუდენტური დღეები 2023’’-ის გრან-პრი.