2023-2024 სასწავლო წელს, ბსუ-ს ზუსტ მეცნიერებათა და განათლების ფაკულტეტის ლექტორ-მასწავლებელთა კორპუსს შეემატა ახალი კადრები განათლების, კომპიუტერული მეცნიერებების, ფიზიკისა და უცხოური ენების მიმართულებით. კონკურსის წესით შერჩეულ ლექტორ-მასწავლებლებს ბსუ-ს ზუსტ მეცნიერებათა და განათლების ფაკულტეტის დეკანი პროფესორი ლელა თურმანიძე შეხვდა და თანამედროვე საგანმანათლებლო სივრცის პრიორიტეტები, სწავლების ხარისხის უზრუნველყოფის მექანიზმები, ბსუ-ს რეგულაციები და საუნივერსიტეტო სერვისები გააცნო.

ბათუმის შოთა რუსთაველის სახელმწიფო უნივერსიტეტმა 3-4 ოქტომბერს „ერასმუს+“-ის პროგრამის პროექტის Hein 4.0 ფარგლებში, კონფერენციას უმასპინძლა. კონფერენციაზე პროექტის მონაწილე ინსტიტუციებმა ევროპიდან, უკრაინიდან და საქართველოდან შეაჯამეს პროექტის შედეგები, საზოგადოებას გაუზიარეს გამოცდილება და ისაუბრეს პროექტის შედეგების მდგრადობის მექანიზმებზე. „ერასმუს+“-ის პროექტი „საქართველოსა და უკრაინის უსდ-ების როლის გაძლიერება ინდუსტრიულ ტრანსფორმაციაში ინდუსტრიული პარადიგმა 4.0-ის მეშვეობით - Hein 4.0“ მიზნად ისახავს უნივერსიტეტის შესაძლებლობების გაძლიერებას ინდუსტრია 4.0 პარადიგმის საშუალებით, ასევე მრეწველობასა და ბიზნესში ინოვაციური ტექნოლოგიების დანერგვის ხელშეწყობას.

ბათუმის შოთა რუსთაველის სახელმწიფო უნივერსიტეტს გაეროს ბავშვთა ფონდის ახლად დანიშნული წარმომადგენელი საქართველოში იასპერ მოლერი ეწვია. ბსუ-ს რექტორთან მერაბ ხალვაშთან გამართულ გაცნობითი ხასიათის შეხვედრაზე იასპერ მოლერმა ბსუ-ს ბავშვთა უფლებების ცოდნის ცენტრის მიღწევებსა და სამომავლო გეგმებზე ისაუბრა. ვიზიტის ფარგლებში ასევე შედგა შეხვედრა ბსუ-ს ზუსტ მეცნიერებათა და განათლების ფაკულტეტის პროფესორ-მასწავლებლებთან და სტუდენტებთან. გაეროს ბავშვთა ფონდის (UNICEF) მხარდაჭერით, ბსუ-ში შეიქმნა ბავშვთა უფლებების ცოდნის ცენტრი. Unicef-ის, მხარდაჭერით, ბსუ-ში განხორციელდა 3 პროექტი: „ბავშვთა უფლებების ცოდნის ცენტრად დაფუძნება ინკლუზიური და ბავშვთა უფლებებზე ორიენტირებული ცოდნის დამოკიდებულებებისა და პრაქტიკის დასანერგად“, „კვლევა ფსიქიკური ჯანმრთელობის ხარისხიანი სერვისებზე ახალგაზრდების ხელმისაწვდომობის შესახებ“ და „უნივერსიტეტის შესაძლებლობების გაძლიერება ინკლუზიური სკოლამდელი და ზოგადი განათლების მხარდასაჭერად“.

„ერაზმუს+“-ის CBHE პროგრამის ფარგლებში, პროექტის „ინოვაციები კურიკულუმში სოციალური ჩართულობის მხარდასაჭერად“ (Curriculum Innovation for Social Inclusion (CISI) კონსორციუმის შემაჯამებელი შეხვედრა ტარდება ბათუმის შოთა რუსთველის სახელმწიფო უნივერსიტეტში. კორსორციუმის სამდღიან შეხვედრაზე ქართველი და უცხოელი მონაწილეები შეაჯამებენ პროექტის შედეგებს და დაგეგმავენ კონსორციუმის პარტნიორი ორგანიზაციების სამომავლო თანამშრომლობას. პროგრამის ფარგლებში, პარტნიორ ქართულ უნივერსიტეტებში დაინერგა ახალი კურსები, რომლებიც მომავალ მასწავლებლებს საშუალებას მისცემს შეიძინონ ცოდნა და უნარები, თუ როგორ იმუშაონ განვითარების სხვადასხვა დარღვევის მქონე მოსწავლეებთან.

ბათუმის შოთა რუსთაველის სახელმწიფო უნივერსიტეტში საქართველოს მათემატიკოსთა კავშირის XIII საერთაშორისო კონფერენცია გაიხსნა. ექვსდღიან კონფერენციაში მონაწილეობს საქართველოსა და უცხოეთის უნივერსიტეტებისა და სამეცნიერო-კვლევითი დაწესებულებების 300-მდე მეცნიერი. წარმოდგენილი სამეცნიერო მოხსენებები ხელს შეუწყობს ინფორმაციის გავრცელებას, თანამშრომლობის გაძლიერებას, საქართველოში მიმდინარე მათემატიკური კვლევებისა და ქვეყნის ცნობადობის ამაღლებას. საუკეთესო ნაშრომები გამოქვეყნდება საერთაშორისო ჟურნალში „Journal of Mathematical Sciences” (Springer).