16 ნოემბერს საქართველოს მეცნიერებათა ეროვნული აკადემიის ეროვნულ პრობლემათა შემსწავლელი მუდმივმოქმედი კომისიის სხდომაზე მოხსენებით წარსდგა ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ქართველოლოგიის ცენტრის მკვლევართა ჯგუფი. მოხსენების თემა: „შავშთა, კლარჯთა და ტაოელთა შენახული ენისა და კულტურის კომპლექსური კვლევის შედეგები“ - მომხსენებელი პროფესორი მამია ფაღავა. თანამომხსენებლები: პროფესორი მალხაზ ჩოხარაძე, პროფესორი ზაზა შაშიკაძე, პროფესორი ჯემალ კარალიძე, პროფესორი რამაზ ხალვაში, პროფესორი ნუგზარ მგელაძე, პროფესორი მაია ბარამიძე.

11-12 ნოემბერს ბსუ-ს ჰუმანიტარულ მეცნიერებათა ფაკულტეტის დეკანმა, ასოცირებულმა პროფესორმა თეონა ბერიძემ და პროფესორმა მაია კიკვაძემ მონაწილეობა მიიღეს თურქეთის ქალაქ სტამბულში თურქულ-გერმანული უნივერსიტეტისა და Astana Publications-ს ორგანიზებით გამართულ მეორე საერთაშორისო სიმპოზიუმის მუშაობაში მოხსენებით - „LANGUAGE POLICY AND PERSPECTIVES OF LEARNING A NEW LANGUAGE”. სიმპოზიუმის მიმდინარეობისას შედგა სამუშაო შეხვედრა თურქულ-გერმანული უნივერსიტეტის რექტორთან, პროფესორ ჯემალ ილდიზთან, სადაც განიხილეს უნივერსიტეტების მომავალი პარტნიორობისა და ერთობლივი სასწავლო-სამეცნიერო პროექტების განხორციელების შესაძლებლობები. ორ უმაღლეს საგანმანათლებლო დაწესებულებას შორის თანამშრომლობის შემდგომი განვითარება დადებითად აისახება ფაკულტეტზე მოქმედი პროგრამების სასწავლო პროცესის გაუმჯობესებასა და უნივერსიტეტის ინტერნაციონალიზაციაზე.

ბსუ-ში მეცნიერების საერთაშორისო დღის ფარგლებში, ვინსენტ ფილაკის სახელმძღვანელოს „კონვერგენტული ჟურნალისტიკა“ პირველი ქართული თარგმანის და სტუდენტური ჟურნალის „მედიალაბორატორია“ წარდგენა გაიმართა. ჟურნალისტიკის უახლესი სახელმძღვანელო „კონვერგენტული ჟურნალისტიკა: შესავალი (წერა და პროდიუსირება მედიაში)“ ბათუმის შოთა რუსთაველის სახელმწიფო უნივერსიტეტმა „ციფრული მედიისა და ივოვაციების“ სამაგისტრო პროგრამის ფარგლებში გამოსცა“. 21-ე საუკუნის პრაქტიკული ჟურნალისტიკის ინოვაციური სახელმძღვანელოს თითოეული თავი დაწერილია შესაბამისი სფეროს ექსპერტის მიერ და ასახავს თანამედროვე ჟურნალისტიკის სხვადასხვა ასპექტის პრაქტიკულ და საკვანძო უნარებს.

ბათუმის შოთა რუსთაველის სახელმწიფო უნივერსიტეტი ევროპის ჟურნალისტიკის ტრენინგების ასოციაციის (EJTA) სრულუფლებიანი წევრი გახდა. 17-20 ოქტომბერს ვენაში გამართულ European Journalism Training Association-ის კონფერენციაზე ბსუ-ს რექტორის მოადგილემ, პროფესორმა თამარ სირაძემ და ციფრული მედია და ინოვაციების სამაგისტრო პროგრამის ხელმძღვანელმა, პროფესორმა ინგა შამილიშვილმა ბათუმის შოთა რუსთაველის სახელმწიფო უნივერსიტეტი წარადგინეს, როგორც ასოციაციის ახალი წევრი. კენჭისყრის შედეგად, ბსუ ასოციაციის სრულუფლებიანი წევრი გახდა, რაც მედია სკოლის განვითარებისა და წარმატებისკენ გადადგმული კიდევ ერთი მნიშვნელოვანი ნაბიჯია.

16-18 ოქტომბერს, საქართველოს ტექნიკურ უნივერსიტეტში გამართულ Horizon Europe Proposal Writing Camp for Georgia პროექტის „წერისა და კონსულტაციის ბანაკის“ სამუშაო შეხვედრებში მონაწილეობა მიიღეს ბსუ-ს ჰუმანიტარულ მეცნიერებათა ფაკულტეტის ხარისხის უზრუნველყოფის სამსახურის უფროსმა, ასოცირებულმა პროფესორმა ივდით დიასამიძემ, ასისტენტ პროფესორმა ლია დავითაძემ და ასოცირებულმა პროფესორმა ხათუნა ბერიძემ. ბანაკის სპიკერებმა მათიას ვურხმა და ანელი როუზმა მონაწილეებს „ჰორიზონტი ევროპას" სტანდარტებით გათვალისწინებული საპროექტო წინადადებების შექმნის დეტალები გააცნეს. სამუშაო შეხვედრის მონაწილეებმა იმუშავეს როგორც ინდივიდუალურ, ასევე ჯგუფურ რეჟიმში, ასევე გამარჯვებული პროექტების წარმომადგენლებმა საკუთარი წარმატების ისტორიის შესახებ ისაუბრეს და პოტენციურ აპლიკანტებს საკუთარი გამოცდილებები გაუზიარეს.