ახალი ამბები
16.05.2019

შუახევის მუნიციპალიტეტში გამწვანების აქცია „განაახლე ტყე“ გაიმართა. აქციაში მუნიციპალიტეტის ახალგაზრდებთან და აჭარის მთავრობის თავმჯდომარესთან თორნიკე რიჟვაძესთან ერთად მონაწილეობა მიიღო ბათუმის შოთა რუსთაველის სახელმწიფო უნივერსიტეტის აგრარული მიმართულების სტუდენტებმა, რექტორმა მერაბ ხალვაშმა და პროფესორ-მასწავლებლებმა. სოციალური კამპანიის ფარგლებში ნიგაზეულის ტყის ტერიტორიაზე ბათუმის შოთა რუსთაველის სახელმწიფო უნივერსიტეტის სათბურში გაზრდილი კავკასიური ნაძვის 400-მდე ნერგი დაირგა.

ბათუმის შოთა რუსთაველის სახელმწიფო უნივერსიტეტში გერმანული ენის თვის ფარგლებში სტუდენტებისათვის, მასწავლებლებისათვის, მოსწავლეებისა და მშობლებისათვის საინფორმაციო შეხვედრა ჩატარდა. გერმანული ენის თვე გერმანიის, ავსტრიის, შვეიცარიის საელჩოების და კულტურის სფეროს ინსტიტუტების ორგანიზებით იმართება. ერთი თვის განმავლობაში დაგეგმილი პროექტები ეძღვნება გერმანულ ენასა და გერმანულენოვანი ქვეყნების კულტურას. ინიციატივის „სამი ქვეყანა - ერთი ენა“ ფარგლებში გაიმართება ღონისძიებები სხვადასხვა ასაკის სტუმრებისათვის, კითხვის, კინოს მოყვარულებისა და ფეხბურთის გულშემატკივრებისათვის.

ბათუმის შოთა რუსთაველის სახელმწიფო უნივერსიტეტში III საერთაშორისო კვირეულის ეგიდით, ევროპის დღე გაიმართა. ევროპის დღე უნივერსიტეტის რექტორმა მერაბ ხალვაშმა და აჭარის ა.რ. განათლების, კულტურისა და სპორტის მინისტრმა ინგა შამილიშვილმა გახსნეს. ღონისძიება მიზნად ისახავდა ევროპული ღირებულებების პოპულარიზაციასა და ახალგაზრდებში ცნობიერების ამაღლებას. ევროპის დღის ფარგლებში მოწყობილ გამოფენაში საკუთარი ქვეყნები წარმოაჩინეს ბსუ-ში გაცვლითი პროგრამის მონაწილე სტუდენტებმა, აკადემიურმა და ადმინისტრაციულმა პირებმა საფრანგეთის რენე 1-ის უნივერსიტეტიდან, პოლონეთის სილეზიის ტექნოლოგოური უნივერსიტეტიდან, პოლონეთის კვიძინის უნივერსიტეტიდან, პოლონეთის ფიზიკური აღზრდის საუნივერსიტეტო სკოლიდან და ლიეტუვას ვიტაუტას მაგნუს უნივერსიტეტიდან.

ბათუმის შოთა რუსთაველის სახელმწიფო უნივერსიტეტის სააქტო დარბაზში ცნობილი ქართველი კომპოზიტორის, საქართველოს სახალხო არტისტის, ღირსების ორდენის კავალერის ვაჟა აზარაშვილის შემოქმედებითი საღამო გაიმართა. საღამოზე, კომპოზიტორმა და ბსუ-ს მუსიკალური ბენდის წევრებმა პოპულარული მუსიკალური ნაწარმოებები შეასრულეს. კონცერტის დასრულების შემდეგ მუსიკოსმა სტუდენტების შეკითხვებს უპასუხა.