ბსუ მეცხრედ მასპინძლობს ბათუმის საზაფხულო უნივერსიტეტს ,,ბირთვული უსაფრთხოების რეჟიმი გაჭიანურებული კრიზისის პირობებში: წარსულის გაკვეთილები, მიმდინარე გამოწვევები და მომავლის ხედვა”. სამი დღის განმავლობაში ბათუმის საზაფხულო უნივერსიტეტის მონაწილეები საქართველოდან, დიდი ბრიტანეთიდან, შვედეთიდან, ჰოლანდიიდან, ტაივანიდან, ავსტრიიდან და უკრაინიდან განიხილავენ გლობალური უსაფრთხოების, საგარეო პოლიტიკის, ბირთვული გაუვრცელებლობის რეჟიმის, არსებული კრიზისის და გამოწვევების საკითხებს.
სესიებს წარუძღვებიან საერთაშორისო ექსპერტები ბრიტანეთის სამეფო კოლეჯიდან, სტოკჰოლმის უნივერსიტეტიდან, შვედეთის რადიაციული უსაფრთხოების სააგენტოდან, უკრაინის საერთაშორისო ურთიერთობების უნივერსიტეტიდან, თბილისის სახელმწიფო უნივერსიტეტის ფიზიკის ინსტიტუტიდან.
მონაწილეები არიან დარგის წამყვანი ექსპერტები და ბსუ-ს პერსონალი. უმთავრესი აქცენტი გაკეთდება ბირთვული უსაფრთხოების რეჟიმის შენარჩუნების მნიშვნელობაზე არსებული საერთაშორისო გაჭიანურებული კრიზისის პირობებში. მოხდება წარსულის გაკვეთილების გადააზრება, მიმდინარე გამოწვევების შეფასება და მომავლის ხედვის პროგნოზირება.
საზაფხულო უნივერსიტეტი მიზნად ისახავს უნივერსიტეტების შესაბამისი ფაკულტეტების პროფესორებსა და სფეროს ექსპერტებს შორის კომპეტენციის ამაღლებას საერთაშორისო უსაფრთხოებისა და ბირთვული გაუვრცელებლობის საკითხში, რათა მათ ახალი ცოდნა და არსებული საერთაშორისო სასწავლო რესურსები გამოიყენონ თავიანთი პროგრამების მოსამზადებლად, სასწავლო და კვლევით პროცესებში. ასევე ღონისძიების მიზანია შავი ზღვის რეგიონში სფეროს სპეციალისტების ქსელის ჩამოყალიბება და მისი განვითარების ხელშეწყობა.
ყოველწლიური ბათუმის მეცხრე საზაფხულო უნივერსიტეტი "ბირთვული უსაფრთხოება და გაუვრცელებლობა: გლობალური გამოწვევები და შესაძლებლობები" ბსუ-ს პარტნიორობით, თავდაცვისა და უსაფრთხოების საკითხებში სამოქალაქო საბჭოს (თბილისი, საქართველო) ორგანიზებით, შვედეთის საგარეო საქმეთა სამინისტროსა და შვედეთის რადიაციული უსაფრთხოების სააგენტოს მხარდაჭერით ტარდება.
პროგრამა| უკან |
