ბათუმის შოთა რუსთაველის სახელმწიფო უნივერსიტეტი ღრმა მწუხარებას გამოთქვამს საბუნებისმეტყველო მეცნიერებათა და ჯანდაცვის ფაკულტეტის ქიმიის დეპარტამენტის პროფესორის ირინა ბეჟანიძის გარდაცვალები გამო და სამძიმარს უცხადებს ოჯახს, კოლეგებსა და სტუდენტებს.
პროფესორი ირინა ბეჟანიძე იყო ქიმიის მეცნიერებათა კანდიდატი და მრავალი წლის განმავლობაში მოღვაწეობდა როგორც პროფესორი, მკვლევარი და მენტორი. მისი აკადემიური გზა მოიცავდა მნიშვნელოვან პოზიციებსა და პროექტებს სხვადასხვა მიმართულებით. განსაკუთრებული ადგილი ეკავა მის საქმიანობაში ბუნებრივი რესურსების რაციონალური გამოყენების, ნარჩენების ეკოლოგიურად უსაფრთხო გადამუშავებისა და მდგრადი განვითარების მიმართულებებს. მნიშვნელოვანი წვლილი შეიტანა მემბრანული ტექნოლოგიების განვითარებასა და გარემოსდაცვითი ინოვაციების დანერგვაში. მისი საქმიანობა მოიცავდა ეკოლოგიურად სუფთა და უნარჩენო ტექნოლოგიების შექმნას, ბუნებრივი წყლების გაუმჯობესების მეთოდებსა და ნარჩენების გადამუშავების თანამედროვე მიდგომებს.
ირინა ბეჟანიძემ 1977 წელს დაამთავრა ოდესის სახელმწიფო უნივერსიტეტი ქიმიის სპეციალობით, ხოლო 1983 წელს დაიცვა დისერტაცია ლენინგრადის (ამჟამად სანქტ-პეტერბურგის) სახელმწიფო უნივერსიტეტში, სპეციალობით კოლოიდური ქიმია და მალევე გახდა საბჭოთა და შემდეგ უკვე დამოუკიდებელი საქართველოს წამყვანი სამეცნიერო-კვლევითი ცენტრების წევრი. მისი პროფესიული გზა მოიცავდა მრავალ საერთაშორისო თანამშრომლობას და აქტიურ მონაწილეობას საერთაშორისო სამეცნიერო კონფერენციებში.
ირინა ბეჟანიძე 2009 წლიდან პროფესორის სტატუსით ასწავლიდა ბათუმის შოთა რუსთაველის სახელმწიფო უნივერსიტეტში, სადაც ასობით სტუდენტმა მიიღო განათლება მისი ხელმძღვანელობით. მრავალწლიანი გამოცდილების პარალელურად, ირინა ბეჟანიძე აქტიურად ხელმძღვანელობდა საბაკალავრო, სამაგისტრო და სადოქტორო ნაშრომებს, მონაწილეობდა სამეცნიერო საგრანტო პროექტებსა და სამეცნიერო ღონისძიებების ორგანიზებაში. მის მიერ გამოქვეყნებული ნაშრომები მნიშვნელოვან წვლილს შეადგენს ქიმიისა და ეკოლოგიური ინოვაციების განვითარებაში.
იგი გამოირჩეოდა მაღალი პროფესიონალიზმით, კოლეგიალობით, განსაკუთრებული პასუხისმგებლობით მომავალი თაობის მეცნიერთა ფორმირებისადმი, ადამიანური სითბოთი და მაღალი პროფესიული სტანდარტებით. მისი დამოკიდებულება თანამშრომლობის პატივისცემისა და მხარდაჭერის მაგალითი იყო აკადემიური საზოგადოებისათვის.
პროფესორ ირინა ბეჟანიძის შეუდრეკელი შრომისუნარიანობა სამუდამოდ დარჩება, როგორც კოლეგების, ისე მეგობრებისა და სტუდენტების მეხსიერებაში. მისი მემკვიდრეობა დარჩება სამეცნიერო ნაშრომებსა და იმ ადამიანებში, რომელთაც მისი ხელმძღვანელობით პროფესიული და პიროვნული განვითარება დაიწყეს.
| უკან |
