ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტმა 1921 წლის 18-20 მარტს ბათუმის განმათავისუფლებელ ბრძოლაში დაღუპულთა ხსოვნისადმი მიძღვნილი სამეცნიერო ონლაინ სემინარი ჩაატარა. ისტორიისა და არქეოლოგიის განყოფილების ხელმძღვანელმა, უფროსი მეცნიერ თანამშრომელ ოლეგ ჯიბაშვილმა მოხსენება წაიკითხა 1921 წლის თებერვალ-მარტში, ბათუმის ირგვლივ განვითარებულ მოვლენებზე, ხოლო, აჭარის ა.რ. უმაღლესი საბჭოს წევრმა, არქეოლოგმა ირაკლი ჩავლეიშვილმა ისაუბრა საბჭოთა პერიოდში დაკარგული ბათუმისათვის დაღუპულთა საძმო საფლავის მოძიებასა და გმირთა ნეშტების ხელმეორედ პატივით დაკრძალვაზე.

ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის დირექტორმა როინ მალაყმაძემ ონლაინ ლექცია ჩაატარა თემაზე: „1921 წლის 25 თებერვალი“. მომხსენებელმა საბჭოთა ოკუპაციაზე, 100 წლის წინ განვითარებულ მოვლენებზე ისაუბრა და გაიხსენა სამშობლოს შეწირული მამულიშვილები. შეხვედრას ესწრებოდნენ მეცნიერები, ახალგაზრდები, პედაგოგები, საზოგადოების წარმომადგენლები საქართველოდან და თურქეთიდან.

თანამშრომლობის მემორანდუმი გაფორმდა ბათუმის შოთა რუსთაველის სახელმწიფო უნივერსიტეტს, თბილისის სახელმწიფო კონსერვატორიას, ბათუმის ხელოვნების უნივერსიტეტსა და გალობის უმაღლეს სასწავლებელს შორის. ხელშეკრულება მიზნად ისახავას ბსუ-ს ნიკო ბერძენიშვილის ინსტიტუტის არქივში დაცული მუსიკალური ფონდის შესწავლასა და დაცვა-პოპულარიზაციას. აქტიურად მიმდინარეობს ინსტიტუტის ფონდში შემონახული არამატერიალური კულტურული მემკვიდრეობის უნიკალური ნიმუშების დამუშავება-გაციფრება. პროექტი ხორციელდება საქველმოქმედო ფონდ „ქართული გალობის“ ფინანსური მხარდაჭერით.

ბსუ-ს ნიკო ბერძენიშვილის ინსტიტუტის ფოლკლორის, დიალექტოლოგიისა და ემიგრანტული ლიტერატურის კვლევის განყოფილების მთავარი მეცნიერ-თანამშრომელი ნაილე მიქელაძე, განყოფილების საკვლევი პროექტის ფარგლებში, მიმდინარე წლის 15-31 აგვისტოს ეწეოდა საველე საქმიანობას ბეშუმში, ლოდიძირში, შქერნალსა და უჩხოში. მკვლევარმა ჩაიწერა თემატურად და ჟანრობრივად მდიდარი ფოლკლორული მასალა. კვლევის შედეგები აისახება შესაბამის სამეცნიერო კონფერენციებსა თუ სტატიებში.

ბათუმის შოთა რუსთაველის სახელმწიფო უნივერსიტეტის ნინო ბერძენიშვილის ინსტიტუტის ფოლკლორის, დიალექტოლოგიისა და ემიგრანტული ლიტერატურის კვლევის განყოფილების მთავარმა მეცნიერ თანამშრომელმა ნარგიზ ახვლედიანმა ინდივიდუალური ექსპედიცია ჩაატარა. მკვლევარმა კურორტ ბახმაროს საზაფხულო იალაღებზე, შედრეკილში, მაჭახელას ხეობასა (სოფელი ქვედა ჩხუტუნეთი) და ხელვაჩაურის მუნიციპალიტეტის სოფელ ორთაბათუმში საველე სამუშაოები ჩაატარა. ნარგიზ ახვლედიანმა ადგილობრივი მცხოვრებლებისგან ჩაიწერა საინტერესო ფოლკლორულ-დიალექტოლოგიური და ეთნოგრაფიული მასალა.