საქართველოს მეცნიერებათა ეროვნული აკადემიის წევრ-კორესპონდენტის, ისტორიის მეცნიერებათა დოქტორის, მსოფლიოში აღიარებულ ეთნოლოგის, პროფესორ ვახტანგ შამილაძის 80 წლის იუბილესადმი მიძღვნილი საიუბილეო სხდომა ჩატარდა ბათუმის შოთა რუსთაველის სახელმწიფო უნივერსიტეტში. ღონისძიებაზე რექტორის მოვალეობის შემსრულებელმა მერაბ ხალვაშმა, პროფესორ-მასწავლებლებმა, საქართველოს მეცნიერებათა ეროვნული აკადემიის წევრებმა, მკვლევრებმა და საზოგადოების წარმომადგენლებმა კიდევ ერთხელ გაიხსენეს აკადემიკოსის სასწავლო-სამეცნიერო მიღწევები და საზოგადოებრივ-პოლიტიკური საქმიანობა.

„ბათუმობის“ სახალხო დღესასწაულს მიეძღვნა VI საერთაშორისო კონფერენცია „ბათუმი - წარსული და თანამედროვეობა“. სამეცნიერო სესიაზე მეცნიერები 60-მდე მოხსენებას წარმოადგენენ ზღვისპირა ქალაქის ისტორიაზე, თანამედროვეობაზე, ტურიზმისა და ურბანული განვითარების ტენდენციებზე. მკვლევარები ორი დღის განმავლობაში ისეთ მნიშვნელოვან საკითხებს განიხილავენ, როგორიცაა: „ბათუმის ეკოლოგიური პრობლემები და მისი გადაჭრის გზები“, „ოსმალთა მიერ ბათუმის ოკუპაცია და ქართველი მწერლები“, „ტურიზმის განვითარების სახელმწიფო პოლიტიკის ფორმირების თავისებურებანი“, „არქეოლოგიური გათხრები და აღმოჩენები ფიჭვნარის ნაქალაქარზე“, „ქართველ მუჰაჯირთა სოფლები თურქეთის შავიზღვისპირეთში“ და სხვ. საერთაშორისო კონფერენცია ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის კვლევითი ინსტიტუტის ორგანიზებითა და ქალაქ ბათუმის მერიის მხარდაჭერით ტარდება.

სამხრეთ-დასავლეთ საქართველოს ოსმალთაგან განთავისუფლების ბრძოლის წინამძღოლის სელიმ ხიმშიაშვილის ტრაგიკული აღსასრულიდან 200 წლისადმი მიძღვნილი საერთაშორისო სამეცნიერო კონფერენცია გაიხსნა ბათუმის შოთა რუსთაველის სახელმწიფო უნივერსიტეტში. სესიის მონაწილეებს უნივერსიტეტის რექტორის მოვალეობის შემსრულებელი, ასოცირებული პროფესორი მერაბ ხალვაში, საქართველოს მეცნიერებათა ეროვნული აკადემიის ვიცე-პრეზიდენტი, აკადემიკოსი როინ მეტრეველი, აკადემიკოსი გურამ ლორთქიფანიძე, ნიკო ბერძენიშვილის ინსტიტუტის დირექტორი როინ მალაყმაძე, სტამბოლის ქართველთა კულტურის ცენტრის თავმჯდომარე სეზენ-გონენჩ ოქჩანი, სტამბოლის ქართველთა სათვისტომოს წარმომადგენელი მუსტაფა იაქუთი (გურამ ხიმშიაშვილი) და ქუთაისის აკაკი წერეთლის სახელმწიფო უნივერსიტეტის პროფესორი ავთანდილ ნიკოლაიშვილი მიესალმნენ. კონფერენციაზე ქართველმა და თურქმა მკვლევრებმა მოხსენებები წარმოადგინეს სელიმ ხიმშიაშვილი ცხოვრებასა და მოღვაწეობაზე.

ფაშიზმზე გამარჯვების 70 წლისადმი მიძღვნილი სამეცნიერო სესია გაიმართა ბათუმის შოთა რუსთაველის სახელმწიფო უნივერსიტეტში. ნიკო ბერძენიშვილის ინსტიტუტის მკვლევარებმა, ისტორიის, არქეოლოგიისა და ეთნოლოგიის დეპარტამენტის პროფესორ-მასწავლებლებმა და აჭარის ხარიტონ ახვლედიანის სახელობის მუზეუმის მეცნიერ-თანამშრომლებმა მოხსენებები წარმოადგინეს მეორე მსოფლიო ომის საკითხებზე. კონფერენციის მონაწილეებმა ისეთი მნიშვნელოვანი საკითხები განიხილეს, როგორიცაა „აჭარა მეორე მსოფლიო ომის წლებში“, „მეორე მსოფლიო ომი და თურქეთის მიერ მიტაცებული ქართული ტერიტორიების დაბრუნების საკითხი“, „ჰიტლერის გეგმები მსოფლიოს პოლიტიკური რუკის შეცვლაში“, „ბათუმის შოთა რუსთაველის სახელმწიფო პედაგოგიური ინსტიტუტის წარგზავნილები მეორე მსოფლიო ომში“ და „მეორე მსოფლიო ომში მონაწილე ქალები აჭარიდან“. სამეცნიერო სესია ბათუმის შოთა რუსთაველის სახელმწიფო უნივერსიტეტისა და აჭარის ხარიტონ ახვლედიანის სახელობის მუზეუმის ორგანიზებით ჩატარდა.

შოთა რუსთაველის ეროვნული სამეცნიერო ფონდის “სტამბოლის ქართული სავანის ეპისტოლური და მემუარული მემკვიდრეობის” სამეცნიერო გრანტის ფარგლებში ნიკო ბერძენიშვილის ინსტიტუტის თანამშრომლები (როინ მალაყმაძე, შუშანა ფუტკარაძე, შორენა ფუტკარაძე) მივლინებით თურქეთში იმყოფებოდნენ. მკვლევარები ქალაქ სტამბოლში 16 დღის განმავლობაში სტამბოლის ქართველ კათოლიკეთა ეკლესია–მონასტერთან არსებულ ბიბლიოთეკასა და არქივში მუშაობდნენ. ჩატარდა არსებული ლიტერატურის აღწერა-კატალოგიზაცია და დიგიტალიზაცია, აღიწერა 4 000-მდე ერთეული. აღმოჩნდა ბევრი ქართული მეცნიერებისათვის უცნობი უცხოენოვანი წიგნი საქართველოს შესახებ. არქივში ასევე გამოვლინდა მიხეილ თამარაშვილის, მიქელ თარხნიშვილის, ხასან ხინიკაძის, ვიქტორ ნოზაძის წერილები და საქართველოს დამოუკიდებელი რესპუბლიკის მიერ დიპლომატიური მისიის ხელმძღვანელისათვის, ს. გოგოლაშვილისათვის სტამბოლში გაგზავნილი საქმიანი ქაღალდები.