2026 წლის 23 ივნისს მძიმე დანაკლისი განიცადა ბათუმის შოთა რუსთაველის სახელმწიფო უნივერსიტეტმა. გარდაიცვალა ცნობილი ქართველი მათემატიკოსი, ბათუმის შოთა რუსთაველის სახელმწიფო უნივერსიტეტის ზუსტ მეცნიერებათა და განათლების ფაკულტეტის მათემატიკის დეპარტამენტის წევრი, ფიზიკა-მათემატიკის მეცნიერებათა კანდიდატი _ შალვა ბახტაძე.

შალვა ბახტაძე დაიბადა 1952 წლის 29 მარტს შუახევის რაიონის სოფელ ცინარეთში. 1969 წელს დაამთავრა შუახევის რაიონის უჩამბის საშუალო სკოლა, 1973 წელს კი - ბათუმის შოთა რუსთაველის სახელობის სახელმწიფო პედაგოგიური ინსტიტუტის ფიზიკა-მათემატიკის ფაკულტეტის მათემატიკის სპეციალობა.

1973-1974 წლებში მუშაობდა შუახევის რაიონის სოფელ ბრილის საშუალო სკოლის დირექტორის მოადგილედ და მასწავლებლად, 1974-1975 წლებში მუშაობდა შუახევის განათლების განყოფილებაში, 1975-1976 წლებში იმყოფებოდა სამხედრო სამსახურში. შალვა ბახტაძე 1976-1979 წლებში მუშაობდა ბარათაულის საშუალო სკოლის დირექტორად და მათემატიკის მასწავლებლად, ხოლო 1979-1983 წლებში დაბა შუახევის საშუალო სკოლის დირექტორად და მასწავლებლად.

შალვა ბახტაძემ თბილისის ივანე ჯავახიშვილის სახელობის უნივერსიტეტის მიზნობრივი ასპირანტურის დასრულების შემდეგ, 1990 წელს დაიცვა საკანდიდატო დისერტაცია სპეციალობით - „გეომეტრია და ტოპოლოგია“ მოიპოვა ფიზიკა-მათემატიკის მეცნიერებათა კანდიდატის ხარისხი.

1986 წლიდან დღემდე უწყვეტად მუშაობდა ბათუმის შოთა რუსთაველის სახელმწიფო უნივერსიტეტში უფროსი მასწავლებლის, დოცენტის და ასოცირებული პროფესორის თანამდებობზე. 1991 წლიდან 2005 წლამდე კი, უწყვეტად გახლდათ ბსუ -ს ფიზიკა-მათემატიკის ფაკულტეტის დეკანი.

იგი წლების განმავლობაში კითხულობდა ლექციებს ანალიზურ გეომეტრიაში, გეგმილურ გეომეტრიაში, ალგებრულ ტოპოლოგიაში, დიფერენციულ გეომეტრიაში, ტოპოლოგიურ ჯგუფებში, მათემატიკურ ლოგიკაში, უმაღლეს მათემატიკაში, წრფივ ალგებრაში, ანალიზურ გეომეტრიაში და სხვ. მისი ინტერესების სფერო გახლდათ „ალგებრული ტოპოლოგია“. გამოქვეყნებული აქვს 30-მდე სამეცნიერო ნაშრომი, სახელმძღვანელო „მათემატიკა (უმაღლეს სასწავლებლებში შემსვლელთათვის)“, გამოსაცემად მზად ჰქონდა მონოგრაფია _ „კომპაქტურ ტოპოლოგიურ სივრცეთა წყვილებისათვის პროექციული (ჭოღოშვილის) და სპეციალური ჰომოლოგიების შესახებ“.

 პროფესორ შალვა ბახტაძეს დიდი წვლილი მიუძღვის მომავალი თაობის აღზრდაში. ახალგაზრდებისა და მათემატიკის განსაკუთრებული სიყვარული, შრომისმოყვარეობა და მისივე ორგანიზატორული ნიჭი გახდა ბევრი ახალგაზრდის პედაგოგიური პროფესიით და მეცნიერებით დაინტერესების ინსპირაცია.

მოღვაწეობის პერიოდში ბატონმა შალვა ბახტაძემ თავი გამოიჩინა, როგორც სამშობლოზე, პროფესიასა და საქმეზე შეყვარებულმა ადამიანმა, მეცნიერმა, ახალგაზრდა თაობის ჭეშმარიტმა აღმზრდელმა და გზამკვლევმა...

წავიდა ჩვენგან ღირსეული პიროვნება, სულით ძლიერი, დიდი მოაზროვნე და მომავლის მჭვრეტელი, ერთგული კოლეგა, საუკეთესო მეგობარი, მოქალაქე, მეუღლე, მამა და ბაბუა.

შალვა ბახტაძის სახელი მარად დარჩება მეგობრების, კოლეგებისა და სტუდენტების მეხსიერებაში.

ბათუმის შოთა რუსთაველის სახელმწიფო უნივერსიტეტი

ზუსტ მეცნიერებათა და განათლების ფაკულტეტი

მათემატიკის დეპარტამენტი