საქართველოს ეკონომიკისა და მდგრადი განვითარების სამინისტროს აკრედიტაციის ცენტრის დირექტორმა პაატა გოგოლაძემ ევროინტეგრაციის ფარგლებში ბათუმის შოთა რუსთაველის სახელმწიფო უნივერსიტეტის სოციალურ მეცნიერებათა, ბიზნესისა და სამართალმცოდნეობის ფაკულტეტის სტუდენტებისათვის სემინარი ჩაატარა ვაჭრობის ტექნიკური ბარიერების საკითხზე. მომხსენებელმა ევროკავშირთან გაფორმებულ ასოცირების ხელშეკრულებასა და კავშირში საქართველოს ინტეგრაციის მიმდინარე პროცესები განიხილა. საუბრისას ყურადღება გაამახვილა ასევე ევროკავშირთან თავისუფალი ვაჭრობის პრობლემებსა და ამ მხრივ განსახორციელებელ საკანონმდებლო თუ ტექნიკურ რეფორმებზე.

ბათუმის შოთა რუსთაველის სახელმწიფო უნივერსიტეტის სოციალურ მეცნიერებათა, ბიზნესისა და სამართალმცოდნეობის ფაკულტეტის პროფესორ-მასწავლებლებისათვის ხუთდღიანი ტრენინგი გაიმართა თემაზე: „ემოციურ-ხატოვანი ფსიქოთერაპია“. ტრენერებმა დიანა ნიკოლაიშვილმა და ნინო ვერხვიაშვილმა ტრენინგის მონაწილეებს ფსიქოთერაპიის თანამედროვე მიმდინარეობა, თერაპიული მუშაობის სქემა, ხატ-წარმოდგენების ტრანსფორმაციის მეთოდები, ემოციურ-ხატოვანი თერაპიის პრაქტიკაში გამოყენების წესები (ფსიქოსომატური გამოვლინებები, კონფლიქტის გადაჭრა) გააცნეს.

საქართველოს ტექნიკური უნივერსიტეტის ასოცირებულმა პროფესორმა რატი აბულაძემ სოციალურ მეცნიერებათა, ბიზნესისა და სამართალმცოდნეობის ფაკულტეტის ეკონომიკური პოლიტიკისა და ბიზნესის ადმინისტრირების დეპარტამენტის პროფესორ-მასწავლებლებსა და სტუდენტებს პროექტი „საქართველოში ელექტრონული მთავრობის სტრატეგიის შემუშავება“ წარუდგინა. პროექტის ფარგლებში, სხვადასხვა უმაღლესი საგანმანათლებლო დაწესებულების მეცნიერებისაგან დაკომპლექტებული ჯგუფი საქართველოში ელექტრონული მთავრობის პროცესებს იკვლევს, რომლის შედეგების საფუძველზე დაგეგმილია ელექტრონული მთავრობის სტრატეგიის შემუშავება. მკვლევარებთან ერთად, კვლევაში ჩართულია ბსუ-ს მარკეტინგის სპეციალობის 10 სტუდენტი.

საარჩევნო სისტემების საერთაშორისო ფონდის (IFES) მიერ ორეგანიზებული საუკეთესო აკადემიური ნაშრომების კონკურსის მონაწილე სტუდენტებს: ინგა ბერიძეს, მირიან თაფლაძეს, მეგი ბარამიძეს, სოფო კეკელიძეს, ანა ნიქაბაძეს, მელანო აბაშიძეს, ნინი სიხარულიძეს, მალვინა პაპუნიძესა და რუსიკო ცინცაძე ზამთრის სკოლის - ,,ბაკურიანი 2014“-ის ფარგლებში ტრენინგები ჩაუტარდათ. სოციალურ მეცნიერებათა, ბიზნესისა და სამართალმცოდნეობის სპეციალობის სტუდენტები ქართველი და ამერიკელი პროფესორების დახმარებით ისეთ აქტუალურ საკითხებს გაეცნენ, როგორიცაა: კონფლიქტების მოგვარება, ეფექტური კომუნიკაცია, მედიის კრიტიკული შეფასება, გენდერული თანასწორობის პოლიტიკის ადგილობრივი და საერთაშორისო მექანიზმები, საარჩევნო სისტემები, ადგილობრივი თვითმმართველობის კომპეტენციები, სამოქალაქო საზოგადოების აქტიურობა, მონიტორინგი და ადვოკატირება, ადგილობრივ თვითმმართველობაში სამოქალაქო სექტორის ჩართულობა და სხვა. სწავლების დასასრულს ორგანიზატორებმა ტრენინგის მონაწილეებს სერტიფიკატები გადასცეს.

სოციალურ მეცნიერებათა, ბიზნესისა და სამართალმცოდნეობის ფაკულტეტის ,,დემოკრატია და მოქალაქეობის" სასწავლო კურსის სტუდენტებმა საარჩევნო სისტემების საერთაშორისო ფონდის (IFES) მიერ ორგანიზებულ აკადემიური ნაშრომების კონკურსში მიიღეს მონაწილეობა. ქვეყნის 22 უმაღლესი საგანმანათლებლო დაწესებულების მონაწილეებს შორის ბათუმის შოთა რუსთაველის სახელმწიფო უნივერსიტეტის სტუდენტები: ელზა ბარამიძე, რამინ მაჭარაშვილი, ნიკა მჟავანაძე, მირიან თაფლაძე, მარიამ ზოიძე, სოფიო კეკელიძე, ანა მიქაბაძე და მეგი ბარამიძე წარმატებული ნაშრომებისა და პრეზენტაციისთვის სიგელებით დაჯილდოვდნენ. ბათუმის გუნდის წევრები თეორიული ცოდნის გასაღრმავებლად ბაკურიანის ზამთრის სკოლაში არიან მიწვეული.