სლოგანით „შენთვის წვეთი სხვისთვის სიცოცხლეა“ ბათუმის შოთა რუსთაველის სახელმწიფო უნივერსიტეტში სისხლის დონაციის აქცია გაიმართა. აქტივობაში, რომლის მიზანი უანგარო დონორობის დამკვიდრება და პოპულარიზებაა, მონაწილეობა მიიღეს ბსუ-ს სტუდენტებმა და პროფესორ-მასწავლებლებმა. აქცია იურიდიული ფაკულტეტის სტუდენტების ორგანიზებითა და სტუდენტური თვითმმართველობის მხარდაჭერით ჩატარდა.
ბათუმის შოთა რუსთაველის სახელმწიფო უნივერსიტეტის იურიდიული ფაკულტეტის პირველი კურსის სტუდენტები პროექტით “ეპოქა და სამართალი” ესტუმრნენ დაბა შუახევის სკოლას, სადაც მე-10-11-12 კლასელებთან ჩაატარეს ინფორმაციული სახის ტრენინგი თემებზე: ილია ჭავჭავაძის მკვლელობა და “ჯინსების თაობა”. ტრენინგს თან ერთვოდა იმიტირებული სასამართლო პროცესი, დისკუსია და სხვა აქტივობები. შეხვედრის ბოლოს კი მოსწავლეებს პროექტში მონაწილეობისთვის გადაეცათ სერთიფიკატები. ტრენინგები ჩატარდება შუახევის, ხელვაჩაურისა და ქობულეთის მუნიციპალიტეტებში, მათ შორის, ჩაქვსა და გონიოში.
თანამშრომლობის მემორანდუმის ფარგლებში ბათუმის შოთა რუსთაველის სახელმწიფო უნივერსიტეტის იურიდიულ ფაკულტეტს ერთკვირიანი სასწავლო ვიზიტით ასტანას ჰუმანიტარული და სამართლის უნივერსიტეტის საერთაშორისო და სამოქალაქო სამართლის მიმართულებების 8 სტუდენტი ეწვია. სტუდენტებს ბსუ-ს იურიდიული ფაკულტეტის პროფესორები წაუკითხავენ ლექციებს ქართული და საერთაშორისო სამართლის აქტუალურ საკითხებზე. კურსის დასასრულს, მონაწილეებს გადაეცემათ სერტიფიკატები.
ასტანაში, ყაზახეთის იურიდიულ ჰუმანიტარული უნივერსიტეტის, OSCE-სა სოროსის ფონდის ორგანიზებით გაიმართა III საერთაშორისო ახალგაზრდული იურიდიული ფორუმი „ადამიანის უფლებათა დაცვის მექანიზმი“. ოთხდღიან ფორუმში უკრაინის, ყაზახეთის, ბელორუსიის, ყირგიზეთის გუნდებთან ერთად, მონაწილეობა მიიღეს ბათუმის შოთა რუსთაველის სახელმწიფო უნივერსიტეტის იურიდიული ფაკულტეტის სტუდენტებმა - სალომე კარალიძემ, მარიამ ორაგველიძემ და ნიკა სვანიძემ. პირველ ეტაპზე პროექტი გააგზავნა 46 ჯგუფმა, რომელთაგანა 6 გადავიდა ფორუმის მეორე ეტაპზე. ნახევარფინალში თემის პრეზენტაციის შემდეგ, უნივერსიტეტის გუნდი „GEORGIANS” 4 რჩეულ გუნდს შორის მოხვდა და მეორე საპრიზო ადგილი მოიპოვა. სტუდენტები საერთაშორისო ხარისხის დიპლომებითა და ფულადი პრიზებით დაჯილდოვდნენ.
ბათუმის შოთა რუსთაველის სახელმწიფო უნივერსიტეტში გაიმართა დოკუმენტური ფილმის ჩვენება „წითელი ჩემოდნის თავგადასავალი“. ღონისძიების დასასრულს იურიდიული ფაკულტეტისა და სოციალურ და პოლიტიკურ მეცნიერებათა ფაკულტეტის სტუდენტებმა მიგრაციის თემაზე გამართულ დისკუსიაში მიიღეს მონაწილეობა და უკანონო შრომითი მიგრაციის საკითხებთან ერთად, ტრეფიკინგის საფრთხეებზე იმსჯელეს. ფილმის ჩვენება გაიმართა მიგრაციის საერთაშორისო ორგანიზაციის - გაეროს სააგენტოს მიერ, მიგრაციის თემაზე გლობალური ფილმების ფესტივალის ფარგლებში.
