ბავშვთა უფლებების დაცვის კვირეულის ფარგლებში ბათუმის შოთა რუსთაველის სახელმწიფო უნივერსიტეტის ფსიქოლოგიის კლინიკის, ფსიქოლოგიის სპეციალობის მაგისტრატურისა და ბაკალავრიატის სტუდენტებმა ბათუმის მერვე საჯარო სკოლის მერვე კლასის მოსწავლეებისათვის ტრენინგი ჩაატარეს თემაზე: „არა - ძალადობას!“. 19 ნოემბრის, ბავშვთა მიმართ ძალადობის პრევენციის საერთაშორისო დღისადმი მიძღვნილი ღონისძიება პერმანენტულ ხასიათს ატარებს და 30 ნოემბრამდე გაგრძელდება. აქცია სოციალურ და პოლიტიკურ მეცნიერებათა ფაკულტეტის პროექტის „ადვოკატირება ბავშვთა და ახალგაზრდების დასაცავად’’ ფარგლებში ტარდება. პროექტს ბათუმის შოთა რუსთაველის სახელმწიფო უნივერსიტეტი, საქართველოს საზოგადოებრივი ჯანდაცვის ფონდი „სთეფ ფორვარდი’’ და „თანაზიარი’’ ევროკავშირის მხარდაჭერით ახორციელებს.

არჩევნებისა და საარჩევნო პროცესის აქტუალური საკითხებისადმი მიძღვნილი სამეცნიერო კონფერენცია გაიმართა ბათუმის შოთა რუსთაველის სახელმწიფო უნივერსიტეტში. საქართველომ დამოუკიდებლობის მოპოვების შემდეგ, საარჩვენო პროცესთან დაკავშირებით მნიშვნელოვანი გზა განვლო, შემუშავდა მნიშვნელოვანი სამართლებრივი ბაზა, ინსტიტუციონალური უზრუნველყოფის მექანიზმები, ჩამოყალიბდა შესაბამისი პოლიტიკური კულტურა, დაიხვეწა საარჩევნო პროცესის წარმართვის ტექნოლოგიები და განვითარდა პოლიტიკური სუბიექტების სტრატეგიული და ტაქტიკური მიმართულებები.

საერთაშორისო გაცვლითი პროგრამის ერაზმუს+ის ფარგლებში გამართულ საერთაშორისო კვირეულში მიიღეს მონაწილეობა ბსუ-ს სტრატეგიული განვითარებისა და საგარეო ურთიერთობათა დეპარტამენტის უფროსის მოადგილემ ნანა ყურშუბაძემ და სოციალურ და პოლიტიკურ მეცნიერებათა ფაკულტეტის ასოცირებულმა პროფესორმა ირაკლი გორგილაძემ. 16-22 ოქტომბერს, ლიუბლინის მეწარმოებისა და ადმინისტრირების საუნივერსიტეტო კოლეჯში (პოლონეთი) ჩატარებული კვირეული სხვადასხვა ქვეყნის უნივერსიტეტების აკადემიურ, ადმინისტრაციულ პერსონალთან შეხვედრას, საჯარო ლექციების წაკითხვასა და ვორქშოფებში მონაწილეობას ითვალისწინებდა.

ბათუმის შოთა რუსთაველის სახელმწიფო უნივერსიტეტში შშმ პირთა ცხოვრების ადეკვატური სტანდარტის დამკვიდრების, განათლების ხელმისაწვდომობის და თანამედროვე ტექნოლოგიების დანერგვის მიზნით, შვედი სპეციალისტების ვიზიტი გაიმართა. შეხვედრა სოციალურ და პოლიტიკურ მეცნიერებათა ფაკულტეტის დეკანის ქეთევან ბერიძის და ფსიქოლოგიის სპეციალობის სტუდენტების ორგანიზებით გაიმართა.

ჩრდილოეთ დაკოტას უნივერსიტეტის პროფესორმა ჟულია გრივიმ ბათუმის შოთა რუსთაველის სახელმწიფო უნივერსიტეტის ფსიქოლოგიის სპეციალობის სტუდენტებისათვის საჯარო ლექცია წაიკითხა თემაზე: „აშშ-ში შეზღუდული შესაძლებლობების მქონე პირთა მიმართ არსებული სერვისების ზოგადი მიმოხილვა“. სტუმარმა ახალგაზრდებს გააცნო აშშ-ში შშმპ მუშაობის გამოცდილება, მიღწევები და არსებულ პრობლემები. პროფესორმა ჟულია გრივიმ ყურადღება გაამახვილა ასევე თვითადვოკატირების როლსა და შშმ პირებთან მუშაობისას პიროვნებაზე ორიენტირებულ ფსიქოთერაპიულ მიდგომებზე. მომხსენებელმა ასევე ისაუბრა, სასჯელაღსრულებით სისტემაში ფსიქოლოგის ჩართულობასა და რაიდთერაპიული ტექნიკების გამოყენებაზე.