ბათუმის შოთა რუსთაველის სახელმწიფო უნივერსიტეტის

დოქტორანტურის გზამკვლევი

მადლობა, რომ დაინტერესდით ჩვენი უნივერსიტეტის დოქტორანტურით. ქვემოთ თქვენ გაეცნობით, რას გთავაზობთ და რა უნდა გააკეთოთ, იმისათვის რომ ჩვენი უნივერსიტეტის დოქტორანტი გახდეთ.  

• როგორ დავიწყო სწავლა დოქტორანტურაში?

ბათუმის შოთა რუსთველის სახელმწიფო უნივერსიტეტში დოქტორანტურაში ჩარიცხვის ორი გზა არსებობს - მიღება და მობილობა.

• ბათუმის შოთა რუსთველის სახელმწიფო უნივერსიტეტის დოქტორანტურაში მიღებას აცხადებს აკადემიურიო საბჭო. ამ მიზნით, რექტორის ბრძანებით, იქმნება მიმღები  კომისია. გთხოვთ, ადევნოთ თვალი ჩვენს ვებგვერდს.
• სადოქტორო პროგრამაზე მიღების გამოცხადების მიზნით სადოქტორო საგანმანათლებლო პროგრამით განსაზღვრული კვლევითი  მიმართულებების ფარგლებში მზადდება სადოქტორო ნაშრომის კვლევითი პროექტის მოკლე აღწერილობა (შემდეგში კვლევითი პროექტი), დოქტორანტის სამეცნიერო ხელმძღვანელის მითითებით.
• დოქტორანტურაში სწავლისათვის, საჭიროა გქონდეთ ავტორიზებული სასწავლებლის მაგისტრის ან მაგისტრთან გათანაბრებული ხარისხი.
• თუ აღნიშნული ხარისხი უცხოური უმაღლესი დაწესებულების მიერ მოგენიჭათ, მაშინ ჯერ უნდა მიმართოთ განათლების ხარისხის განვითარების ცენტრს.

დოქტორანტობის კანდიდატს მოეთხოვება:

• საკვლევი მიმართულების შესაბამისი ნაშრომი/პუბლიკაცია ან/და სამეცნიერო-კვლევით პროექტებსა და ღონისძიებებში მონაწილეობის ან/და შესაბამის სფეროში მუშაობის არანაკლებ ორწლიანი პროფესიული გამოცდილება;
• კვლევითი პროექტის განხორციელების ინდივიდუალური ხედვა და ხელმძღვანელის თანხმობა;
• ინგლისური ენის ცოდნა არანაკლებ B2 დონეზე ან სხვა, დასავლეთევროპული (ფრანგული, გერმანული) ერთ-ერთი უცხოური ენის ცოდნა არანაკლებ B2 დონეზე და ინგლისურ ენის ცოდნა არანაკლებ B1 დონეზე; იმ შემთხვევაში, თუ დოქტორანტი სამეცნიერო კვლევის ემპირიულ ბაზად ირჩევს ინგლისურ/გერმანულ/ფრანგულ ენას, მოეთხოვება ამ უცხოური ენის C1 დონეზე ცოდნა;
• დოქტორანტობის იმ კანდიდატს, რომლისთვისაც ქართული არ არის მშობლიური ენა - ქართული ენის არანაკლებ B2 დონეზე ფლობის დამადასტურებელი სერტიფიკატი (რომლის შესაბამისობას ადგენს/აფასებს უცხო ენის საგამოცდო კომისია) ან ენის ცოდნის დონის განმსაზღვრელი ბსუ-ს მიერ ორგანიზებული გამოცდის ჩაბარება. 

•  რეგისტრაცია

დოქტორანტურაში მისაღებ კონკურსში მონაწილეობისთვის უნდა წარმოადგინოთ შემდეგი საბუთები:

ა) განცხადება (შეავსეთ და ამობეჭდეთ);

ბ) დოქტორანტობის კანდიდატის სააპლიკაციო ფორმა

გ) საკვლევი მიმართულების შესაბამისი ნაშრომი/პუბლიკაცია ან/და სამეცნიერო-კვლევით პროექტებსა და ღონისძიებებში მონაწილეობის ან/და შესაბამის სფეროში მუშაობის არანაკლებ ორწლიანი პროფესიული გამოცდილება;

დ) კვლევითი პროექტის განხორციელების ინდივიდუალური ხედვა და ხელმძღვანელის თანხმობა;

ე) მაგისტრის (ან მასთან გათანაბრებული) აკადემიური ხარისხის დამადასტურებელი დიპლომის ნოტარიულად დამოწმებული ასლი (მიმდინარე წელს კურსდამთავრებულთათვის - ცნობა აკადემიური ხარისხის მინიჭების თაობაზე, ბსუ-ს კურსდამთავრებულთათვის ბსუ-ს მიერ დამოწმებული დიპლომის ასლი);

ვ)  პირადობის მოწმობის (პასპორტის) ასლი;

ზ)  2 ფოტო სურათი ზომით 3X4–ზე და ელექტრონული ვერსია CD დისკზე;

თ)  წვევამდელის სამხედრო-სააღრიცხვო მოწმობის ასლი (ან სამხედრო ბილეთი, ასეთის არსებობის შემთხვევაში);

ი) უცხო ქვეყანაში მიღებული განათლების აღიარების დამადასტურებელი დოკუმენტის ნოტარიულად დამოწმებული ასლი (ასეთის არსებობის შემთხვევაში);

კ) სხვა დოკუმენტი, თუ ასეთს ითვალისწინებს შესაბამისი სადოქტორო პროგრამა.

გამოცდები

დოქტორნატურაში მისაღები პროცედურა ორი ნაწილისგან შედგება:

• გამოცდა უცხო ენაში;
• გამოცდის წარმატებით გავლის შემდეგ, თქვენ გაივლით გასაუბრება/გამოცდას სპეციალობაში, გასაუბრების მიზანია, უნივერსიტეტი გაეცნოს თქვენს აკადემიურ მიღწევებს, არჩეული სფეროს შესახებ ცოდნას და მოტივაციას.

გამოცდების წარმატებით გავლის შემდეგ უნივერსიტეტის ვებ. გვერდზე განთავსდება ინფორმაცია გამოცდის შედეგების შესახებ, ბსუ-ში სადოქტორო საგანმანათლებლო პროგრამაზე ჩარიცხვამდე ვალდებული ხართ  გააფორმოთ ხელშეკრულება ბსუ-თან.

• სწავლა, სწავლება და კვლევა დოქტორანტურაში

• ჩვენი დოქტორანტები არა მხოლოდ სწავლობენ სადოქტორო პროგრამებში, არამედ უშუალოდ არიან ჩართული უნივერსიტეტში მიმდინარე სწავლების პროცესში და კვლევებში.
• თითოეული სადოქტორო პროგრამა შედგება სასწავლო და კვლევითი კომპონენტისაგან და სრულდება სადისერტაციო ნაშრომის დაცვით.
• სადოქტორო პროგრამაზე სწავლის ხანგრძლივობაა 3 წელია. ეს დრო შეიძლება გაიზარდოს ხუთ წლამდე მხოლოდ აკადემიური საბჭოს გადაწყვეტილებით, სამეცნიერო ხელმძღვანელისა და დოქტორანტის დასაბუთებული წარდგინების საფუძველზე.
• სასწავლო და სამეცნიერო კომპონენტების გავლის შემდეგ შესაბამისი დარგის დეპარტამენტში დაგენიშნებათ წინასწარი დაცვა (აპრობაცია).
  
  
  დისერტაციის დაცვა

• დისერტაციაში ასახული უნდა იყოს თეორიული და/ან ექსპერიმენტული კვლევის დასაბუთებული შედეგები.
• დისერტაციის წარმატებით დაცვის შემდეგ, თქვენ მოგენიჭებათ დოქტორის აკადემიური ხარისხი და გადმოგეცემათ შესაბამისი დიპლომი.
   

• დაგვიკავშირდით

სამეცნიერო კვლევების სამსახური

science@bsu.edu.ge

გისურვებთ წარმატებებს!