აკაკი წერეთლის სახელობის ბათუმის საჯარო ბიბლიოთეკაში ბსუ-ს იურიდიული და სოციალურ მეცნიერებათა ფაკულტეტის საზოგადოებრივ და პოლიტიკურ მეცნიერებათა დეპარტამენტის ასოცირებული პროფესორების, ლაშა ბაჟუნაიშვილის და ირაკლი გორგილაძის სახელმძღვანელოს „ევროპული ერთობა. იდეა, პოლიტიკა, ინტეგრაცია“ წარდგენა გაიმართა. პრეზენტაციის შემდეგ ასოცირებულმა პროფესორმა ლაშა ბაჟუნაიშვილმა ბათუმის საჯარო სკოლის მოსწავლეებისა და პედაგოგებისთვის ჩაატარა საჯარო ლექცია და დისკუსია თემაზე „ევროპული იდეა: მშვიდობა და განვითარება თაობებისთვის“. ლექციის დასრულების შემდეგ მომხსენებელმა მოსწავლეების აქტუალურ შეკითხვებს უპასუხა.

E-PSY-ის, „ერაზმუს+“-ის ინსტიტუციური თანამშრომლობის პროექტის „ფსიქოლოგიური კონსულტაციის ცენტრების გახსნა სტუდენტებისთვის საქართველოს უმაღლეს საგანმანათლებლო დაწესებულებებში“ ფსიქიკური ჯანმრთელობის ევროპული კვირეულის ფარგლებში შეხვედრა გაიმართა თემაზე: „სკოლამდელი ინკლუზიური განათლება და მომავლის ბაღი“. ღონისძიების მონაწილეებმა იმსჯელეს უნივერსიტეტისა და ბაღის როლზე მომავალი სპეციალისტების ჩამოყალიბებაში, ასევე, ბაღში არსებულ გამოწვევებსა და მათი გადაჭრის გზებზე. შეხვედრაში მონაწილეობა მიიღეს ბსუ-ს პროფესორ-მასწავლებლებმა, ბათუმის ბაღების გაერთიანების დირექტორმა დავით დიასამიძემ, საბავშვო ბაღის გამგეებმა და ფსიქოლოგებმა. ღონისძიების მონაწილეებს მიესალმნენ ბსუ-ს რექტორის მოადგილე თამარ სირაძე, ფსიქოლოგიის დეპარტამენტის ხელმძღვანელი რუსუდან კეჭეყმაძე და ბსუ-ს ფსიქოლოგიის კლინიკის კოორდინატორი ქეთევან ბერიძე.

E-PSY-ის ფსიქიკური ჯანმრთელობის ევროპული კვირეულის ფარგლებში, ბსუ-ს იურიდიული და სოციალურ მეცნიერებათა ფაკულტეტის ფსიქოლოგიის მიმართულების პირველი კურსის სტუდენტებთან სამხარაულის ექსპერტიზის ეროვნული ბიუროს აჭარის დეპარტამენტში შეხვედრა გაიმართა. ექსპერტი, ფსიქოლოგი თამარ ქამადაძე ახალგაზრდებს ესაუბრა ფსიქოლოგის როლის მნიშვნელობაზე, სხვადასხვა მიმართულებით სამიზნე ჯგუფებთან ეფექტური და კომპეტენტური ჩართულობის აუცილებლობაზე.

ფსიქიკური ჯანმრთელობის ევროპული კვირეულის ფარგლებში, ბსუ-ს იურიდიული და სოციალურ მეცნიერებათა ფაკულტეტის ფსიქოლოგიის მიმართულების პირველი კურსის სტუდენტებმა (ხელმძღვანელები, ასისტენტ პროფესორები - გურანდა შამილიშვილი და მაია თოიძე) კინოჩვენება მოაწყვეს. ისმფ-ის კინოკლუბში შედგა გამორჩეული რეჟისორის ინგმარ ბერგმანის ფილმის „პერსონა” ჩვენება. ადამიანის საზრისის, ეგზისტენციალური პრობლემების საოცრად ღრმა ფსიქოლოგიური, ფილოსოფიური და გენიალური ნაფიქრი 1966 წელს შეიქმნა და მასში წამოჭრილი ფსიქოლოგიური აასპექტებით დღემდე აქტუალობას არ კარგავს. ღონისძიების მსვლელობისას სტუდენტებმა და პროფესორ-მასწავლებლებმა ფსიქოლოგიური თვალსაზრისით შეაფასეს ფილმი და იმსჯელეს მასში წამოჭრილ ფუნდამენტურ პრობლემებსა და საკითხებზე, რომელიც ორიგინალურ, მძაფრ ფსიქოლოგიურ ჭრილშია გადაწყვეტილი და გვიჩვენებს ადამიანის, როგორც პერსონის, როგორც პიროვნების სულის ლაბირინთებს.

ბათუმის შოთა რუსთველის სახელმწიფო უნივერსიტეტის იურიდიული და სოციალურ მეცნიერებათა ფსიქოლოგიის დეპარტამენტის პროფესორ-მასწავლებლებმა და სტუდენტებმა მონაწილეობა მიიღეს სიმპოზიუმში თემაზე: „გენდერი და თანამედროვე ტენდენციები“. სიმპოზიუმის მონაწილეებმა განიხილეს გენდერთან დაკავშირებული აქტუალური და მნიშვნელოვანი საკითხები. ღონისძიება სასტუმრო გალოგრეში საქართველოს სტუ-ს გენდერული თანასწორობის კვლევითი ცენტრის ორგანიზებით გაიმართა.