ბათუმის შოთა რუსთაველის სახელმწიფო უნივერსიტეტის საჯარო მმართველობის სპეციალობის მეორე კურსის სტუდენტები აჭარის ა.რ უმაღლეს საარჩევნო კომისიას ეწვივნენ. შეხვედრაზე სტუდენტები გაეცნენ უსკოს მუშაობის არეალს, წევრების დაკომპლექტების წესს, ელექტრონული არჩევნების მნიშვნელობას, უსკოს პასუხისმგებლობასა და ანგარიშვალდებულებას. შეხვედრა სალექციო კურსის - საარჩევნო სამართლის გასვლითი ლექციის ფარგლებში ჩატარდა.
ბსუ-ს იურიდიულ და სოციალურ მეცნიერებათა ფაკულტეტის ასისტენტ პროფესორმა გიგა ფარტენაძემ „ერასმუს+“-ის გაცვლითი პროგრამის ფარგლებში ლექციები წაიკითხა მურსიას უნივნერსიტეტში (ესპანეთი). ლექციები შეეხებოდა ისეთი მნიშვნელოვან საკითხებს, როგორიცაა: ღია მმართველობა, ღია მმართველობის პარტნიორობის ფარგლებში ქვეყნის მიღწევები და მდგარი განვითარება. ასისტენტ პროფესორმა გიგა ფარტენაძემ მურსიას უნივერსიტეტის სტუდენტებს ასევე გააცნო ღია მმართველობის აქტუალური საკითხები საქართველოს გამოცდილების გათვალისწინებით. უნივერსიტეტის წარმომადგენლებთან გამართულ შეხვედრაზე დაიგეგმა სამომავალო თანამშრომლობის მიმართულებები.
ბათუმის შოთა რუსთაველის სახელმწიფო უნივერსიტეტში ჩატარდა საჯარო ლექცია და დისკუსია თემაზე: „ევროკავშირის ძირითადი ღირებულებები და გაწევრიანების პროცედურა“. ღონისძიება გახსნა ბათუმის შოთა რუსთაველის სახელმწიფო უნივერსიტეტის რექტორმა, პროფესორმა მერაბ ხალვაშმა. შეხვედრა ორგანიზებული იყო ბსუ-ს ჟან მონეს კათედრის მიერ ინგლისური ენის სასწავლო ცენტრ Eti Holding-თან თანამშრომლობით საჯარო სკოლის მოსწავლეებისთვის. ღონისძიებაში მონაწილეობა მიიღეს საჯარო სკოლის 40-მდე მოსწავლემ და მასწავლებლებმა. ჟან მონეს კათედრის ხელმძღვანელმა, პროფესორმა მალხაზ ნაკაშიძემ ისაუბრა ევროკავშირის ძირითადი ღირებულებების, ასევე ევროკავშირში გაწევრიანების პროცედურის შესახებ.
ბათუმის შოთა რუსთაველის სახელმწიფო უნივერსიტეტში USAID-ის პროგრამის „სამართლის უზენაესობის ხელშეწყობა – ეროვნულ და ადგილობრივ დონეზე“ წარდგენა გაიმართა. ღონისძიება გახსნეს USAID-ის საქართველოს მისიის დირექტორმა პიტერ ვიბლერმა, აღმოსავლეთ-დასავლეთის მართვის ინსტიტუტის ვიცე-პრეზიდენტმა მარკ დიტრიხმა, ბსუ-ს რექტორმა, პროფესორმა მერაბ ხალვაშმა, სასამართლოების, ადგილობრივი და საერთაშორისო ორგანიზაციების წარმომადგენლებმა. პროგრამის მიზანია, კანონის უზენაესობის გაძლიერება მართლმსაჯულების ინსტიტუტების დამოუკიდებლობისა და ეფექტიანობის ხელშეწყობის, საზოგადოების ყველა ფენისთვის მართლმსაჯულებაზე უკეთესი ხელმისაწვდომობის უზრუნველყოფის და ზემოაღნიშნულ ინსტიტუტებზე მოქალაქეთა და ინსტიტუციური ზედამხედველობის გაძლიერების გზით.
ბათუმის შოთა რუსთაველის სახელმწიფო უნივერსიტეტში, ჟან მონეს კათედრის ორგანიზებით იურიდიული და სოციალურ მეცნიერებათა ფაკულტეტზე უკრაინის მხარდამჭრი შეხვედრა გაიმართა. ღონისძიებაში მონაწილეობა მიიღეს ჟან მონეს კათედრის სტუდენტებმა, იურიდიული და სოციალურ მეცნიერებათა ფაკულტეტის დეკანმა ლევან ჯაყელმა და ჟან მონეს კათედრის ხელმძღვანელმა მალხაზ ნაკაშიძემ. შეხვედრის მონაწილეებმა გამოხატეს მტკიცე მხარდაჭერა უკრაინელი ხალხის, სტუდენტების, აკადემიური პერონალის მიმართ და გააპროტესტეს რუსეთის ფედერაციის მხრიდან უკრაინის წინააღმდეგ განხორციელებული აგრესია და ოკუპაცია.
