ბათუმის შოთა რუსთაველის სახელმწიფო უნივერსიტეტის განათლების ფაკულტეტის დაწყებითი განათლების საბაკალავრო საგანმანათლებლო პროგრამის მეოთხე სასწავლო წლის სტუდენტი თამუნა სურმანიძე ბათუმის მერიის ლუკა ასათიანის სახელობის სტიპენდიანტია. „ლუკა ასათიანის სახელობის სტიპენდია წარმატებული სტუდენტებისათვის“ ქვეპროგრამას ბათუმის მერია განახორციელებს და სტიპენდია გაიცემა წელიწადში ორჯერ. ვულოცავთ თამუნას სურმანიძეს გამარჯვებას და ვუსურვებთ წარმატებებს.

თანამშრომლობის მემორანდუმი გაფორმდა გერმანიის მაგდებურგის ოტო ფონ გერიკის უნივერსიტეტს, ბათუმის შოთა რუსთაველის სახელმწიფო უნივერსიტეტს, საქართველოს ტექნიკურ უნივერსიტეტს და ქუთაისის სახელმწიფო უნივერსიტეტს შორის. ხელშეკრულება მიზნად ისახავს ერთობლივი სადოქტორო პროგრამისა და სამეცნიერო კვლევების წარმოებას პროფესიული განათლების სფეროში. მხარეთა შეთანხმებით, დაიგეგმა ერთობლივი პროექტებისა და პროგრამების განხორციელება.

ბათუმის შოთა რუსთაველის სახელმწიფო უნივერსიტეტის აკადემიური პერსონალის პროფესიული განვითარების პროგრამის ფარგლებში 16-20 აპრილს განათლების ფაკულტეტის პროფესორებისთვის RESULT სისტემის ტრენინგი ჩატარდა. აკადემიური პერსონალი გაეცნო RESULT სისტემას, მის კომპონენტებსა (სასწავლო პროცესის აგება, წარმართვა და შეფასება) და დანერგვის საშუალებებს. პროფესორებს შესაძლებლობა მიეცათ ასევე RESULT სისტემის დანერგვისათვის საჭირო უნარ-ჩვევების განვითარებისა: ვიდეო-ლექციის ჩაწერა, კურსის შესაბამისი კვლევითი ამოცანების აგება, სტუდენტების ინსტრუქტაჟი, კვლევითი შეხვედრების (სემინარების) წარმართვა, სტუდენტების ინდივიდუალური და გუნდური შეფასება. დაიგეგმა RESULT სისტემის დანერგვა.

ბათუმის შოთა რუსთაველის სახელმწიფო უნივერსიტეტში მრავლობითი დარღვევის მქონე უსინათლო და მცირემხედველ 7 წლამდე ასაკის ბავშვთა ადრეული ჩარევის სპეციალისტები მომზადდნენ. ტრენინგის ფარგლებში, ბსუ-ს განათლების ფაკულტეტის პროფესორ-მასწავლებლები, დაწყებითი განათლებისა და ფსიქოლოგიის სპეციალობის სტუდენტები, სხვადასხვა სარეაბილიტაციო ცენტრის თანამშრომლები და საჯარო სკოლების მასწავლებლები დაეუფლნენ ტექნიკას, რომელიც მრავლობითი დარღვევის მქონე მხედველობადაქვეითებულ ბავშვებთან მუშაობისას გამოადგებათ.

გერმანული საერთაშორისო ორგანიზაცია არბაითერ-სამარიტერ-ბუნდს-ის (ASB) ეგიდით, ბათუმის შოთა რუსთაველის სახელმწიფო უნივერსიტეტში პროექტი „ჩვენ მზად ვართ! განათლება უსაფრთხოებისათვის“ განხორციელდა. პროგრამის ფარგლებში დაწყებითი განათლების საგანმანათლებლო პროგრამის სტუდენტებისათვის შემუშავდა და დაინერგა ახალი სასწავლო კურსი „კატასტროფების რისკების შემცირება ინკლუზიური მიდგომით“, თანამშრომლებისათვის ჩატარდა ტრენინგი და ბსუ-ს ბიბლიოთეკაში გაიხსნა საგანმანათლებლო მასალით აღჭურვილი რესურსცენტრი. ASB-ს პროექტების შეფასების ჯგუფი და პროექტ „ჩვენ მზად ვართ! განათლება უსაფრთხოებისათვის“ კოორდინატორი პროფესორ-მასწავლებლებსა და სტუდენტებს შეხვდნენ. ღონისძიების მიზანი იყო ახლად დანერგილი სასწავლო კურსის ეფექტიანობის შეფასება და საგანმანათლებლო რესურსების მიზნობრივად გამოყენების მონიტორინგი.