ბათუმის შოთა რუსთაველის სახელმწიფო უნივერსიტეტში უსინათლოთა და მცირე მხედველ ადამიანთა გადაადგილების, ორიენტაციისა და საყოფაცხოვრებო უნარების განვითარების ტრენინგი მიმდინარეობს. ტრენინგის ფარგლებში, მრავლობითი დარღვევის მქონე მცირემხედველი და უსინათლო ბავშვების ადრეული ჩარევის სპეციალისტები, ბსუ-ს განათლების ფაკულტეტის პროფესორ-მასწავლებლები და ფსიქოლოგიის სპეციალობის სტუდენტები ეუფლებიან ტექნიკას, რომელიც უსინათლო ბავშვებთან მუშაობისას, მათი დამოუკიდებლობისა და სოციალიზაციის გასაზრდელად გამოადგებათ. გაკვეთილები მოიცავს როგორც თეორიულ, ასევე პრაქტიკულ ცოდნას.

ბათუმის შოთა რუსთაველის სახელმწიფო უნივერსიტეტში ილიას სახელმწიფო უნივერსიტეტისა და საქართველოს პორტიჯის ასოციაციის ერთობლივი პროექტის ფარგლებში ჩატარდა ტრენერთა ტრენინგი „ინკლუზიური სკოლამდელი განათლება“. სამდღიანი სწავლება მიზნად ისახავდა საქართველოს სხვადასხვა უნივერსიტეტში ინკლუზიური სკოლამდელი განათლების სასერტიფიკატო კურსების მომზადებასა და დანერგვას. ტრენინგში საქართველოს პორტიჯის ასოციაციის, ილიას სახელმწიფო უნივერსიტეტის, აკაკი წერეთლის სახელმწიფო უნივერსიტეტის, იაკობ გოგებაშვილის სახელობის თელავის სახელმწიფო უნივერსიტეტის, სამცხე-ჯავახეთის სახელმწიფო უნივერსიტეტისა და გორის სასწავლო უნივერსიტეტის წარმომადგენლებთან ერთად მონაწილეობდა ბსუ-ს განათლების ფაკულტეტის ასოცირებული პროფესორი ნანა მაკარაძე.

2017 წლის 22-24 ივლისს ბათუმის შოთა რუსთაველის სახელმწიფო უნივერსიტეტში სამუშაო ვიზიტით იმყოფებოდა „ERASMUS+“-ის პროექტის „კურიკულუმის რეფორმა სამოქალაქო განათლებისა და დემოკრატიული პრინციპების განვითარების ხელშეწყობისათვის ისრაელსა და საქართველოში (CURE)“ კოორდინატორი, გორდონის განათლების აკადემიური კოლეჯის საერთაშორისო ურთიერთობების, პროგრამებისა და მულტიკულტურული განათლების ცენტრის დირექტორი რონდა სოფერი. სტუმარს შეხვედრები ჰქონდა უნივერსიტეტის რექტორთან და ადმინისტრაციასთან, საგრანტო პროექტში ჩართულ პერსონალთან და სტუდენტებთან. ვიზიტის მიზანი პროექტის ფარგლებში განხორციელებული და მიმდინარე სამუშაოების მონიტორინგი იყო. ბსუ-დან პროექტში ჩართულმა პერსონალმა პროექტის კოორდინატორთან გაიარა კონსულტაციები და მიიღო რეკომენდაციები განსახორციელებელ აქტივობებთან დაკავშირებით. რეკომენდაციები ეხებოდა პროექტის როგორც შინაარსობრივ, ასევე ფინანსურ საკითხებს.

„ერაზმუს+“-ის პროექტის „კურიკულუმის რეფორმა სამოქალაქო განათლებისა და დემოკრატიული პრინციპების განვითარების ხელშეწყობისათვის ისრაელსა და საქართველოში (CURE)“ ფარგლებში, კენტერბერის ქრისტეს ეკლესიის უნივერსიტეტში (გაერთიანებული სამეფო) კონსორციუმის მესამე საერთაშორისო შეხვედრა გაიმართა. ხუთდღიან შეხვედრაში ბათუმის შოთა რუსთაველის სახელმწიფო უნივერსიტეტის რექტორი მერაბ ხალვაში და განათლების ფაკულტეტის დეკანი მადონა მიქელაძე მონაწილეობდნენ. ღონისძიებაზე წარმოდგენილი იყო პროექტის ფარგლებში შემუშავებული მოდულები, რიდერები და სამომავლო გეგმები.

განათლების ფაკულტეტის ასოცირებულმა პროფესორმა ნანა მაკარაძემ და უფროსმა მასწავლებელმა ნინო მიქელაძემ მონაწილეობა მიიღეს „ერაზმუს+“-ის საგრანტო პროექტის „კურიკულუმის რეფორმა სამოქალაქო განათლებისა და დემოკრატიული პრინციპების განვითარების ხელშეწყობისათვის ისრაელსა და საქართველოში (CURE)“ფარგლებში, სამცხე-ჯავახეთის სახელმწიფო უნივერსიტეტში გამართულ კონსორციუმის მესამე სამუშაო შეხვედრაში. ორდღიან შეხვედრაზე წარმოდგენილი იყო პარტნიორი უნივერსიტეტების ინსტიტუციური მენეჯერების ანგარიშები პროექტის ფარგლებში ჩატარებული სამუშაოების, სტუდენტთა მიერ უკვე შესრულებული და უახლეს მომავალში განსახორციელებელი აქტივობების შესახებ.