ახალი ამბები

ტურიზმის ფაკულტეტმა ერთობლივი პროექტის ,,ნორვეგიაში, საქართველოსა და ყირგიზეთში ტურიზმის მდგრადი განვითარებისა და ინოვაციების სფეროში განათლება“ განხორციელების მესამე ეტაპი დაიწყო. პროექტით გათვალისწინებულია ტურიზმის ფაკულტეტის 6 სტუდენტის სწავლება (ერთი სემესტრი) ნორვეგიის ტელემარკის უნივერსიტეტში ,,ტურიზმის მენეჯმენტის“ სპეციალობაზე. კონკურსი გაიმართა შემდეგი პირობებით: ინგლისურ ენაში ტესტირება, კომუნიკაციის უნარი, კულტურათაშორისი კომუნიკაციის უნარი და საშუალო აკადემიური მოსწრების მაჩვენებელი. კონკურსში მონაწილეობა 62 სტუდენტმა მიიღო, მათგან პირველ ეტაპზე 16 სტუდენტი გადავიდა. ჯგუფთან 7 აპრილიდან 12 აპრილამდე ნორვეგიის ტელემარკის უნივერსიტეტის პროფესორებმა თემურ აბესაძემ და ფრუდე ლიენგიმ ტრენინგები ჩაატარეს და 6 საუკეთესო კონკურსანტი შეარჩიეს. სტუდენტები: მინდია კურცხალიძე, ანა ჯაფარიძე, ანა სანიკიძე, ვახტანგ გვენეტაძე, ირმა დოლიძე და გიორგი გელაძე სწავლას ნორვეგიაში 20 აგვისტოდან განაგრძობენ. უნივერსიტეტის რექტორმა, პროფესორმა ალიოშა ბაკურიძემ და ტურიზმის ფაკულტეტის დეკანმა როსტომ ბერიძემ სტუდენტებს გამარჯვება მიულოცეს და წარმატებები უსურვეს.

დედაენის დღისადმი მიძღვნილი ღონისძიებები ბათუმის შოთა რუსთაველის სახელმწიფო უნივერსიტეტის სტუდენტებმა და პროფესორ-მასწავლებლებმა მსვლელობით დაიწყეს და ეროვნულ-განმათავისუფლებელი მოძრაობის ლიდერის ილია ჭავჭავაძის ძეგლი გვირგვინით შეამკეს. ღონისძიების ფარგლებში შოთა რუსთაველის დარბაზში კონფერენცია გაიმართა თემაზე: „14 აპრილი – დედაენის დღეა“. მონაწილეებმა 1978 წლის 14 აპრილს განვითარებული მოვლენები გაიხსენეს და შეაფასეს. ენათმეცნიერებმა და სტუდენტებმა მოხსენებები წარმოადგინეს ქართული ენის პრობლემატიკაზე, მისი სწავლებისა და უფლებების დაცვის საკითხებზე. ასევე შედგა ემერიტუს-პროფესორ მერი ცინცაძის მონოგრაფიის „ქართულად ხსნილად უბნობდი“ და ნანა ცეცხლაძისა და მზია ხახუტაიშვილის წიგნის „სტილისტიკის“ განხილვა. შეხვედრის დასასრულს სტუდენტებისათვის გაიმართა ვიქტორინა „რა ენა წახდეს...“.

ბათუმის შოთა რუსთაველი სახელმწიფო უნივერსიტეტში ახალგაზრდული უმაღლესი საბჭოს ორგანიზებით საერთაშორისო სავაჭრო პალატის პროექტ ICC Youth Georgia-ს პრეზენტაცია ჩატარდა. პროგრამა მიზნად ისახავს წარმატებული, აქტიური სტუდენტების ჩართვას ბიზნეს პროექტებში, ახალგაზრდებისათვის გამოცდილების გაზიარებას, პროფესიული უნარ-ჩვევების განვითარების ხელშეწყობას, დასაქმებასა და ახალგაზრდული ინიციატივების მხარდაჭერას. საუკეთესო სტუდენტური პროექტები კომპანიის მხარდაჭერით განხორციელდება. საერთაშორისო სავაჭრო პალატის ახალგაზრდულ პროექტში ქვეყნის შვიდი უმაღლესი საგანმანათლებლო დაწესებულების სტუდენტები არიან ჩართული.

იუსტიციის სახლის აღმასრულებელი დირექტორის მოადგილემ ირაკლი ლომიძემ, იუსტიციის სამინისტროს ანალიტიკური დეპარტამენტის წარმომადგენელმა ლაშა მორგოშიამ, ინფორმაციის თავისუფალი განვითარების ინსტიტუტის (IDFI) თავმჯდომარემ ლევან ავალიშვილმა და ახალგაზრდა იურისტთა ასოციაციის წარმომადგენელმა სულხან სალაძემ ბათუმის შოთა რუსთაველის სახელმწიფო უნივერსიტეტის სტუდენტებისა და პროფესორ-მასწავლებლებისათვის კონსულტაცია გამართეს ღია და მონაწილეობითი საჯარო მმართველობის საკითხებზე. საქართველოს იუსტიციის სამინისტროს მიერ ორგანიზებული შეხვედრა მიზნად ისახავდა საზოგადოების ინფორმირებულობასა და მის ჩართვას მთავრობის ორწლიანი ერთიანი სამოქმედო გეგმის შემუშავებაში. კონსულტაციის მონაწილეებმა წინა წლებში განხორციელებული პროექტები შეაჯამეს და გამჭვირვალე, ღია მმართველობის ხელშემწყობი პრიორიტეტები განიხილეს.

ევროპის აკადემიური ცენტრის პრეზენტაცია გაიმართა ბათუმის შოთა რუსთაველის სახელმწიფო უნივერსიტეტში. ევროპის აკადემიური ცენტრის დამფუძნებლებმა ეთერ სანაიამ და ბექა ქანთარიამ სხვადასხვა სპეციალობის სტუდენტებს გაცვლითი პროგრამები, ევროპასა და ამერიკის შეერთებულ შტატებში მიმდინარე გაეროს მოდელირების პროგრამები, მადრიდის, ლონდონის, პრაღის საზაფხულო სკოლებისა და სტაჟირების პროექტები წარუდგინეს. ორგანიზაცია ახალგაზრდებს ასევე სთავაზობს ტრენინგ-კურსების გავლას, სწავლის გაგრძელებას უცხოეთის უმაღლეს საგანმანათლებლო დაწესებულებებში, დისტანციურ სწავლებასა და მონაწილეობის მიღებას საერთაშორისო კონფერენციებში.