ამერიკული საზღვაო ფრეგატის ,,ჯონ ჰოლის“ ეკიპაჟის წევრებისაგან შემდგარმა როკ-ჯგუფმა ,,ფლეგშიფმა“ უნივერსიტეტის სააქტო დარბაზში კონცერტი გამართა. სტუდენტებთან ერთად კონცერტს ამერიკის შეერთებული შტატების ელჩი საქართველოში ჯონ ბასი, კულტურის ატაშე საულ ჰერნანდესი და ქართველი და ამერიკელი სამხედრო პირები ესწრებოდნენ.
ქართული ენის დღეს რსუ-მ ტრადიციულად სამეცნიერო სესია მიუძღვნა. ქართული ფილოლოგიის დეპარტამენტის პროფესორ-მასწავლებლებმა საჯარო სკოლებსა და უმაღლეს სასწავლებლებში ქართული ენის სწავლებისა და უფლებების დაცვის პრობლემეტიკაზე ისაუბრეს. უნივერსიტეტის სტუდენტები დედა ენის დღის აღსანიშნავად ილია ჭავჭავაძის ძეგლთან შეიკრიბნენ, 1978 წლის 14 აპრილის სახალხო გამოსვლები შეაფასეს და ძეგლი ყვავილებით შეამკეს.
შოთა რუსთაველის დარბაზში სტუდენტთა სამეცნიერო ცენტრის პრეზენტაცია გაიმართა. სასწავლო-შემოქმედებითი გაერთიანების მიზანია სამეცნიერო მუშაობის პოპულარიზაცია და ინტელექტუალური პოტენციალის ზრდა. ცენტრი სტუდენტებს დაეხმარება სამეცნიერო საქმიანობისათვის საჭირო უნარ-ჩვევების განვითარებასა და ნაშრომების გამოქვეყნებაში. ასევე უზრუნველყოფს მათ მონაწილეობას სამეცნიერო კონფერენციებსა და სამეცნიერო-საგრანტო პროექტებში.
შოთა რუსთაველის სახელმწიფო უნივერსიტეტის რექტორმა, პროფესორ-მასწავლებლებმა და სტუდენტებმა პატივი მიაგეს 1989 წლის 9 აპრილს მთავრობის სასახლის წინ საქართველოს დამოუკიდებლობისათვის დაღუპულ გმირებს. 9 აპრილის ამსახველი ფოტოების ჩვენების შემდეგ კიდევ ერთხელ გაიხსენეს ამ დღეს განვითარებული მოვლენები, სანთლები დაანთეს და მემორიალი ტიტებით შეამკეს.
რსუ-ს რექტორი, პროფესორი ალიოშა ბაკურიძე საქმიანი ვიზიტით გერმანიას, საბერძნეთსა და იტალიას ეწვია. ხელი მოეწერა ურთიერთთანამშრომლობის მემორანდუმს რომუალდო დელ ბიანკოს ფონდთან. მომზადდა მემორანდუმი ინდიანაპოლისის, ათენის და მიუნხენის ლუდვიგ მაქსიმილიანის უნივერსიტეტებთან გასაფორმებლად. დაიგეგმა სტუდენტთა და პროფესორ-მასწავლებელთა გაცვლითი პროგრამები, ერთობლივი სამეცნიერო კონფერენციები, სიმპოზიუმები და შემოქმედებითი ღონისძიებები.
