კონფერენციები

27- 28 ივნისს ბსუ-ს ზუსტ მეცნიერებათა და განათლების ფაკულტეტის პედაგოგიურ მეცნიერებათა დეპარტამენტის ორგანიზებით, გაიმართება კონფერენცია „ინკლუზიური განათლება საქართველოში - მიღწევები, გამოწვევები და პერსპექტივები - 2024“. კონფერენციაში მონაწილეობა შეუძლია ყველა დაინტერესებულ პირს, ვინც ქართულ აკადემიურ სფეროს წარმოუდგენს ინკლუზიურ განათლებასთან დაკავშირებული სამეცნიერო კვლევის შედეგებს. ინკლუზიურ განათლებასთან დაკავშირებული ეროვნული კონფერენცია საშუალებას მისცემს პროცესში ჩართულ დაინტერესებულ მხარეებს - მკვლევრებს, მასწავლებლებს, დამსაქმებლებს, საგანმანათლებლო დაწესებულებების ადმინისტრაციის, არაასამთავრობო ორგანიზაციებისა და სახელმწიფო უწყებების წარმომადგენლებს იმსჯელონ ინკლუზიური განათლების აქტუალურ საკითხებსა და მტკიცებულებაზე დაფუძნებული მიდგომით, ხელი შეუწყონ ინლუზიური განათლების ხარისხის გაუმჯობესებასა და ზოგადად, ინკლუზიური საზოგადოების განვითარებას.

საქართველოს განათლების, მეცნიერებისა და ახალგაზრდობის სამინისტრო, აჭარის ა.რ. განათლების, კულტურისა და სპორტის სამინისტრო, საქართველოში იაპონიის საერთაშორისო თანამშრომლობის სააგენტო და გაეროს ბავშვთა ფონდი საქართველოში, ბათუმის შოთა რუსთაველის სახელმწიფო უნივერსიტეტთან პარტნიორობით მართავს ადრეული განათლებისა და ზრუნვის მესამე საერთაშორისო კონფერენციას „ინკლუზიური სისტემები, სერვისები და პრაქტიკები თითოეული ბავშვისთვის”.

5-7 ივლისს, ბათუმის შოთა რუსთაველის სახელმწიფო უნივერსიტეტში ბათუმის სახელმწიფო საზღვაო აკადემიის პარტნიორობით დოქტორანტებისათვის საერთაშორისო საზაფხულო სკოლა - მეორე International Excellence School-ი გაიმართება. საზაფხულო სკოლა მიზნად ისახავს უმაღლესი განათლების ინტერნაციონალიზაციის ხელშეწყობას. მეორე საერთაშორისო Excellence school-ის თემატიკაა „ინტერსექტორული თანამშრომლობა, ტექნოლოგიების ტრანსფერი და ინოვაცია“.

ორდუს უნივერსიტეტისა (თურქეთი) და ბათუმის შოთა რუსთაველის სახელმწიფო უნივერსიტეტის (საქართველო) ორგანიზებით, ბათუმში გაიმართება საერთაშორისო კონგრესი ინტეგრირებული სოციალური კვლევისა და ინტერდისციპლინარული კვლევების მიმართულებით. კონგრესი ჩატარდება 2024 წლის 30 მაისიდან 1 ივნისის ჩათვლით ბათუმში, სასტუმრო ბესტ ვესტერნ პრემიერში. მონაწილეობის მისაღებად რეგისტრაციის ბოლო ვადაა: 2024 წლის 15 მაისი.

10-11 მაისს, ყოვლადწმიდა ღვთისმშობლის წილხვდომილობისა და წმიდა ანდრია პირველწოდებულის საქართველოში შემოსვლის ეროვნულ დღესასწაულთან დაკავშირებით, ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის, ქალაქ ბათუმის მერიის კულტურის ცენტრისა და კონსტანცას ოვიდიუსის უნივერსიტეტის სამი მონოთეისტური რელიგიისა და კანონიკური სამართლის შესწავლის კვლევის ცენტრის ორგანიზებით გაიმართება საერთაშორისო სამეცნიერო კონფერენცია - „ჩვენი სულიერების ბალავარი“ - XIII.