აჭარის ა/რ საარქივო სამმართველოში შეხვედრა გაიმართა პირველი ქართველი კოსმოსური ობიექტის გენერალურ კონსტრუქტორის - საქართველოს მეცნიერებათა ეროვნული აკადემიის აკადემიკოსის, სამხედრო მეცნიერებათა დოქტორის, გენერალ-მაიორის ელგუჯა მეძმარიაშვილის პირადი ფონდის მასალების შეესახებ. შეხვედრაში ტექნოლოგიური ფაკულტეტის წარმომადგენლებმა მიიღეს მონაწილეობა. ელგუჯა მეძმარიაშვილის სამეცნიერო მოღვაწეობისა და ღვაწლის შესახებ ისაუბრეს ტექნოლოგიური ფაკულტეტის დეკანის მოადგილემ გურანდა შამილიშვილმა და ინჟინერიისა და მშენებლობის დეპარტამენტის მასწავლებელმა ზურა კალანდარიშვილმა და უნივერსიტეტის საპატიო დოქტორს სიმბოლურ საჩუქრად ფაბლაბში დამზადებული „კოსმოსური ხომალდი’’ გადასცეს.

10, 11, 12 მარტს, საქართველოს ტექნიკური უნივერსიტეტის ემერიტუს- პროფესორმა, საერთაშორისო ტექნიკური ასოციაციების კავშირის ექსპერტმა, ენერგეტიკის ნაციონალური აკადემიის წევრმა არჩილ მოწონელიძემ ტექნოლოგიური ფაკულტეტის მაგისტრატურის სამოქალაქო და სამრეწველო მშენებლობის საგანმანათლებლო პროგრამის სტუდენტებისათვის დაიწყო სასწავლო კურსის წაკითხვა „ჰიდროტექნიკური ნაგებობების კონსტრუქციებში.
სტუდენტებს საშუალება ჰქონდათ დეტალური ინფორმაცია მიეღოთ თანამედროვე ჰიდროტექნიკურ ნაგებობათა კონსტრუქციების, ენერგეტიკული აღჭურვილობის, დაპროექტების, მშენებლობისა და ექსპლუატაციის საკითხებზე. ლექციის დასასრულს დისკუსია გაიმართა.

ბათუმის შოთა რუსთაველის სახელმწიფო უნივერსიტეტში, ა/რ სოფლის მეურნეობის მინისტრმა ლაშა კომახიძემ და აგროსერვის ცენტრის დირექტორმა გოჩა ბერიძემ რექტორთან, მერაბ ხალვაშთან ერთად აგრარული მიმართულების სტუდენტებისათვის სტაჟირების პროგრამის პრეზენტაცია გამართეს. 6-თვიანი, ანაზღაურებადი სტაჟირების მიზანი სოფლის მეურნეობაში კვალიფიციური კადრების მომზადება და პროფესიული განვითარების ხელშეწყობაა.

ტექნოლოგიური ფაკულტეტის სტუდენტთა დასაქმების პროგრამის ფარგლებში, სამშენებლო კომპანიამ „ჰაიდელბერგცემენტ კავკასუსის“ ლაბორატორიის სპეციალისტის პოზიციის დასაკავებლად კონკურსი გამოაცხადა. დამსაქმებელმა ორგანიზაციამ კონკურსში მონაწილე მშენებლობისა და არქიტექტურის საგანმანათლებლო პროგრამების 30-მდე სტუდენტს შორის უპირატესობა მშენებლობის საგანმანათლებლო პროგრამის მეოთხე კურსის სტუდენტ რობერტ კონცელიძეს მიანიჭა. კომპანია „ჰაიდელბერგცემენტ კავკასუსი“ ბათუმის შოთა რუსთაველის სახელმწიფო უნივერსიტეტთან აქტიურად თანამშრომლობს, ხელს ეწყობს ტექნოლოგიური მიმართულების სტუდენტების დასაქმებასა და პროფესიულ განვითარებას.

ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტის დეკანი, პროფესორი გიზო ფარცხალაძე საქართველოს მეცნიერებათა ეროვნულ აკადემიის სტიპენდიანტია. აკადემიამ სტიპენდიანტები ცხრა მიმართულებით კონკურსის წესით გამოავლინა. კონკურსში მონაწილეობა საქართველოში მოღვაწე დოქტორის აკადემიური ხარისხის ან მასთან გათანაბრებული სამეცნიერო ხარისხის მქონე, 50 წელამდე ასაკის საერთაშორისო დონეზე აღიარებული სამეცნიერო ნაშრომების ავტორს შეეძლო. პროფესორმა გიზო ფარცხალაძემ გამარჯვება გამოყენებითი მექანიკის, მანქანათმშენებლობის, ენერგეტიკისა და მართვის პროცესების განყოფილებაში მოიპოვა, სპეციალობით: „გამოყენებითი მექანიკა-კატასტროფების რისკის კვლევა“.