ხელვაჩაურის რაიონის სხვადასხვა სკოლის მოსწავლეები ფაბ ლაბ ბსუ-ს ეწვივნენ და ლაბორატორიის მუშაობას და თანამედროვე ტექნოლოგიებს ადგილზე გაეცნენ.
ახალგაზრდებმა ლაზერულ მჭრელებზე და 3D პრინტერებზე მუშაობის შესახებ ინფორმაცია უშუალოდ, ფაბ ლაბის მენეჯერებისგან მიიღეს და ნამუშევრები დაათვალიერეს.

პარიზში გამართულ მე-18 სამეცნიერო ფორუმში „ეკონომიკისა და ბიზნესის მენეჯმენტი“ (ICEBM), მონაწილეობა მიიღო ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტის ინჟინერიისა და მშენებლობის დეპარტამენტის ასისტენტ-პროფესორმა ქეთევან გოლეთიანმა. ქართველმა მომხსენებელმა ფორუმის ფარგლებში ჩატარებულ მეცნიერების, ინჟინერიისა და ტექნოლოგიის მსოფლიო აკადემიის კონფერენციაზე მოხსენება წაიკითხა თემაზე: „საქართველოს სატრანსპორტო-ლოგისტიკური სისტემების კონკურენტუნარიანობის გაზრდა და განვითარების პერსპექტივები თანამედროვე ეტაპზე“. ასისტენტ პროფესორმა ქეთევან გოლეთიანმა საკუთარი მოსაზრებები წარმოადგინა ასევე სამეცნიერო სესიის ფარგლებში გამართულ დისკუსიებში, სემინარებსა და სხვა სამეცნიერო ღონისძიებებში. სამეცნიერო კონფერენცია გაიმართა პარიზში (საფრანგეთი) მეცნიერების, ინჟინერიის და ტექნოლოგიის მსოფლიო აკადემიის (WASET) ორგანიზებით.

24-25 ნოემბერს ქალაქ ბაქოში, აზერბაიჯანის არქიტექტურისა და მშენებლობის უნივერსიტეტში ტექნოლოგიური ფაკულტეტის დეკანი გიზო ფარცხალაძე და ხარისხის უზრუნველყოფის სამსახურის უფროსი გოჩა ჩავლეშვილი მიწვეულნი იყვნენ საერთაშორისო სამეცნიერო კონფერენციაზე „ეკოლოგია და ენერგო ეფექტურობა თანამედროვე მშენებლობაში“. სამეცნიერო ფორუმზე პროფ. გ. ფარცხალაძემ და ასოც.პროფ. გ.ჩავლეშვილმა წარადგინეს მოხსენება თემაზე: „ცენტრალურად შეკუმშული ელემენტების მდგრადობის პრობლემები მასალის მუშაობის დრეკად პლასტიკურ არეში“, რომელიც დაიბეჭდა კონფერენციის მასალებში.

ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტის მეორე კურსის სტუდენტი ბესიკ ჩხიკვაძე ევროპის ჩემპიონია შოტოკან კარატეში. პირველობამ სტარტი ბათუმში აიღო და მასში მსოფლიოს 35 ქვეყნის 1400 წარმომადგენელი მონაწილეობდა. სპორტსმენმა ფინალურ შეხვედრებში ყაზახ, თურქ, აზერბაიჯანელ მეტოქეებს სძლია და ევროპის ჩემპიონის ტიტული მოიპოვა. ბესიკ ჩხიკვაძე ასპარეზობას ფოთში დაგეგმილ საქართველოს ნაკრების შესარჩევ ტურნირში განაგრძობს. ბათუმის შოთა რუსთაველის სახელმწიფო უნივერსიტეტი ჩემპიონს ულოცავს გამარჯვებას და უსურვებს წარმატებებს.

დეკანის არჩევნები გაიმართება 2016 წლის 12 დეკემბერს, ტექნოლოგიურ ფაკულტეტზე 209-ე აუდიტორიაში.