7-18 სექტემბერს, ბათუმის შოთა რუსთაველის სახელმწიფო უნივერსიტეტს იგორ სიქორსკის სახელობის კიევის პოლიტექნიკური ინსტიტუტის, სასწავლო-სამეცნიერო მექანიკისა და მანქანათმშენებლობის ინსტიტუტის მანქანათმშენებლობის ტექნოლოგიის კათედრის პროფესორი, ბორის ვორონცოვი ეწვია. ვიზიტი 2025 წელს ბსუ-სა და  უკრაინის ეროვნულ ტექნიკურ უნივერსიტეტთან გაფორმებული მემორანდუმის ფარგლებში შედგა და მას შემდეგ უმაღლესი საგანმანათლებლო დაწესებულებები აქტიურად ახორციელებენ აკადემიურ და სამეცნიერო თანამშრომლობას.

პროფესორი ბორის ვორონცოვი გაეცნო ბსუ-ს ტექნოლოგიური ფაკულტეტის კათედრების საქმიანობასა და თანამედროვე ლაბორატორიებს, ასევე საქართველოს უნივერსიტეტებში ქარის ტურბინებთან დაკავშირებულ მიმდინარე კვლევებს და საინფორმაციო ტექნოლოგიებს, რომლებიც ტურბინებისა და მათი კომპონენტების დაპროექტების, კვლევისა და წარმოების პროცესში გამოიყენება.

ბსუ-ის ტექნოლოგიური ფაკულტეტის დეკანის, პროფესორ გაიოზ ფარცხალაძის, პროფესორ გოჩა ჩავლეშვილის, დოქტორანტებისა და სტუდენტების მონაწილეობით ჩატარდა კონსტრუქციების კომპიუტერული მოდელირებისა და ავტომატიზებული დაპროექტების წინასწარი სიმულაციები. ასევე გაიმართა სამუშაო შეხვედრები კომპიუტერული პროგრამა LIRA-ს წარმომადგენლებთან, პროფესორ ვლადიმერ ვორონცოვის ჩართულობით.

მემორანდუმის ფარგლებში უკვე განხორციელდა არაერთი აკადემიური აქტივობა, მათ შორის მხარეთა მონაწილეობა საერთაშორისო სამეცნიერო კონფერენციებში, სამეცნიერო-კვლევითი ჟურნალების სარედაქციო საქმიანობაში ჩართულობა და სხვა ერთობლივი აკადემიური ინიციატივები.

აღნიშნული აკადემიური თანამშრომლობა ხელს შეუწყობს კვლევითი პოტენციალის განვითარებას, ცოდნისა და გამოცდილების გაზიარებას და პარტნიორული ურთიერთობების გაძლიერებას.