სასტუმროთა ქსელის პარტნიორი, მასპინძლობის ინდუსტრიის გერმანელი ექსპერტი, პროფესორი შტეფან გერჰარდი თანამშრომლობის მიზნით ბსუ-ს ტურიზმის ფაკულტეტს უკვე მეორედ ეწვია. ერთი კვირის განმავლობაში გერმანელი ექსპერტი მასტერკლასებს ჩაატარებს „საერთაშორისო სასტუმროს მენეჯმენტის” მიმართულებით. გერმანელი ექსპერტი ტურიზმის ფაკულტეტის 10 სტუდენტს შეარჩევს, რომლებიც დეკემბერში გერმანიაში გაემგზავრებიან და მისივე მხარდაჭერით ერთი კვირის განმავლობაში ბერლინსა და ჰამბურგში ბრენდული სასტუმროების საქმიანობას გაეცნობიან. შტეფან გერჰარდი სასტუმროთა ქსელის „აროზა“ პარტნიორია გერმანიაში, შვეიცარიაში, ავსტრიასა და იტალიაში.

კომპანიის VRex Immersive დირექტორმა ნიკოლოზ როსტომაშვილმა და დამფუძნებელმა ნიკოლოზ გოგოჭურმა ბსუ-ს ტურიზმის ფაკულტეტის სტუდენტებს საქართველოს ინოვაციებისა და ტექნოლოგიების სააგენტოს ტექნოლოგიური კონკურსი „ჰაკატური“ წარუდგინეს.
ჰაკათონი გაიმართება 19,20, 21 ოქტომბერს, სადაც ბსუ-ს სტუდენტებს, სხვა უმაღლესი სასწავლო დაწესებულების სტუდენტებთან ერთად შესაძლებლობა ექნებათ, ჩაერთონ საქართველოს მასშტაბით 10 რეგიონში მიმდინარე ონლაინ ჰაკათონში და წარმოადგინონ ტურიზმის სფეროში არსებული პრობლემების მოგვარების ინოვაციური გზები.
ჰაკათონის მიზანია ინფორმაციული და ინოვაციური ტექნოლოგიებით დაინტერესებული ახალგაზრდებისთვის პროფესიული განვითარებისა და რეალიზაციის პრაქტიკული შესაძლებლობების შექმნა.

1-12 აგვისტოს ტურიბას უნივერსიტეტში ჩატარდა საზაფხულო სკოლა - „ქალაქი, როგორც მდგრადი ტურიზმის დანიშნულების ადგილი“, რომელშიც მონაწილეობდა ტურიზმის ფაკულტეტის სტუდენტი ელენე აბაშიძე. საზაფხულო სკოლის პროექტის ფარგლებში სტუდენტებმა მიიღეს ცოდნა და პრაქტიკული უნარები ურნაბული განვითარების საკითხებსა და კულტურულ-სოციალური ღონისძიებების ორგანიზებაში. საზაფხულო სკოლა ლატვიის სახელმწიფო განათლების განვითარების სააგენტოს მხარდაჭერით და საერთაშორისო ტურიზმის ფაკულტეტის ინიციატივით განხორციელდა. საზაფხულო სკოლაში ასევე მონაწილეობდნენ ინდუსტრიის პროფესიონალები, რომლებმაც ლექციების, დისკუსიებისა და სასწავლო ტურების მეშვეობით, გააცნეს სტუდენტებს მდგრადი ურბანული განვითარების საკითხები.

ბსუ-ს ტურიზმის ფაკულტეტის სტუდენტმა მირიან ქათამაძემ 2018 წლის 1-29 აგვისტოს შჩეცინში გამართულ 28-ე საერთაშორისო საზაფხულო სკოლაში მიიღო მონაწილეობა. ერთთვიანი პროგრამა მოიცავდა როგორც პოლონური ენის კურსს, სემინარებს ქვეყნის ეკონომიკის, პოლიტიკის და კულტურის შესახებ, ასევე ექსკურსიებს, კონცერტებსა და პოეზიის საღამოებს. სტუდენტთა საერთაშორისო შეხვედრაზე ქართველმა სტუდენტებმა საქართველო ეროვნული ფოლკლორით წარმოადგინეს. საზაფხულო სკოლა ყოველწლიურად ტარდება და მასში 30 ქვეყნის პარტნიორი უნივერსიტეტებიდან 250-მდე სტუმარი ღებულობს მონაწილეობს.

ბსუ-ს ტურიზმის ფაკულტეტის სტუდენტებმა და დეკანის მოადგილემ დინარა ფაღავამ 14-28 ივნისს საფრანგეთში, ქალაქ პუატიეს უნივერსიტეტის მიერ ორგანიზებულ საერთაშორისო სემინარში მიიღეს მონაწილეობა. ორკვირიანი პროგრამა ითვალისწინებდა მასწავლებელებისთვის სწავლების ინოვაციური და დისტანციური მეთოდების გაცნობას. სტუდენტები დაესწრნენ 60-საათიან ლექციათა კურსს ფრანგულ ენაში და მონაწილეობა მიიღეს კულტურულ ღონისძიებებში. ყოველწლიური საზაფხულო სკოლა მიზნად ისახავს უცხოური გამოცდილების გაზიარებასა და ინტერნაციონალიზაციის ხელშეწყობას.