ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტს „მერიოტის“ სასტუმრო ქსელის აღმოსავლეთ ევროპის ადამიანურ რესურსების რეგიონული დირექტორი სერჯიო სნაიდერი და სასტუმრო „შერატონ ბათუმის“ გენერალური მენეჯერი აპოსტოლოს პაპატოლიოსი სტუმრობდნენ. სტუმრები ტურიზმის ფაკულტეტის სტუდენტებს შეხვდნენ და აჭარაში სასტუმრო ბიზნესის განვითარების პერსპექტივებსა და სასტუმროში დასაქმების შესაძლებლობებზე ესაუბრეს. დელეგაციის წევრებმა შეხვედრის ფარგლებში განიხილეს თანამშრომლობისა და სტუდენტთა სტაჟირების შესაძლებლობები აღმოსავლეთ ევროპის მერიოტის ქსელის სასტუმროებში.

მიგრაციის საერთაშორისო ორგანიზაციის (IOM) წარმომადგენლებმა ევროკავშირის მიერ დაფინანსებული SBMMG-ის პროექტის ფარგლებში, ბათუმის შოთა რუსთველის სახელმწიფო უნივერსიტეტის სტუდენტებისათვის ტრენინგი ჩაატარეს თემაზე: „ინფორმირებული მიგრაცია, უსაზღვრო შესაძლებლობები“. სწავლება დისკუსიისა და როლური თამაშების ფორმატში წარიმართა და ახალგაზრდები გაეცნენ ისეთ აქტუალურ თემებს, როგორიცაა: უვიზო მიმოსვლა ევროპაში, თავშესაფარი ევროკავშირის წევრს ქვეყნებში, სწავლა საზღვარგარეთ, დროებითი შრომითი მიგრაცია.

ბათუმის შოთა რუსთაველის სახელმწიფო უნივერსიტეტის „ერაზმუს+”-ის აკადემიური და ადმინისტრაციული პერსონალის გაცვლითი პროგრამების ფარგლებში პოლონელი და რუმინელი პროფესორები ტურიზმის ფაკულტეტის სტუდენტებს შეხვდნენ და საჯარო ლექციები წაიკითხეს ტურიზმის აქტუალურ თემებზე: „კულინარიული ტურიზმი“ და „ტურიზმის სატრანსპორტო უზრუნველყოფა“. შეხვედრა მიზნად ისახავდა სტუდენტებისთვის ტურიზმის ინდუსტრიის სიახლეების გაცნობას, უნივერსიტეტებს შორის ურთიერთობების გაღრმავებას და სამომავლო ერთობლივი საზაფხულო სკოლის ორგანიზებას.

ტურიზმის ფაკულტეტმა ბათუმის შოთა რუსთაველის სახელმწიფო უნივერსიტეტის საერთაშორისო კვირეულს უმასპინძლა. ექვსი ქვეყნის ოცდაათამდე წარმომადგენელმა ფაკულტეტის სტუდენტებთან ერთად, ღონისძიების ფარგლებში კულტურულ-შემეცნებითი პერფომანსები წარმოადგინეს. ღონისძიების მიზანს ცალკეული ერების კულტურული მემკვიდრეობის გაცნობა და ადგილობრივ და უცხოელ სტუდენტებს შორის სამომავლო ურთიერთობების გაღრმავება წარმოადგენდა. საერთაშორისო კვირეულში ჩართულები იყვნენ სტუდენტები: ყირგიზეთიდან, აზერბაიჯანიდან, თურქეთიდან, ესპანეთიდან, პოლონეთიდან, რუმინეთიდან და გერმანიიდან.