ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტს მასპინძლობის ინდუსტრიის გერმანელი ექსპერტი, სასტუმროთა ქსელის პარტნიორი, პროფესორი შტეფან გერჰარდი ეწვია. ბატონმა შტეფანმა ტურიზმის ფაკულტეტის სტუდენტებისთვის მასტერკლასები ჩაატარა თემებზე: „საერთაშორისო სასტუმროს მენეჯმენტი“ და „საერთაშორისო სასტუმრო ინდუსტრიის განვითარება“. შეხვედრის დასასრულს, პროფესორმა სტუდენტებისთვის შეკითხვებს უპასუხა. ვიზიტის ფარგლებში, დაიგეგმა სამომავლო გეგმები და თანამშრომლობის მიმართულებები. მომავალი სასწავლო წლიდან გერმანელი ექსპერტი ეტაპობრივად ეწვევა ტურიზმის ფაკულტეტს და სტუდენტებს ლექცია-სემინარებს ჩაუტარებს, ხოლო წარჩინებული სტუდენტებისთვის გერმანიაში მასპინძლობის ინდუსტრიაში პრაქტიკების ორგანიზებას უზრუნველყოფს.

ბათუმის შოთა რუსთველის სახელმწიფო უნივერსიტეტში საერთაშორისო კონფერენცია „თავისუფალი ბაზრის იდეების წარმოდგენა - ევროპული ღირებულებები საქართველოსთვის“ გაიმართა. ქართველმა და უცხოელმა მომხსენებლებმა სამეცნიერო სტატიები წარმოადგინეს ისეთ აქტუალურ საკითხებზე, როგორიცაა: საქართველოს ეკონომიკური არჩევანი და შანსი; არსებული ეკონომიკური თეორიების დადებითი და უარყოფითი მხარეები; ილია ჭავჭავაძის მემკვიდრეობა, მისი ეკონომიკა და საქართველოს ევროპული გზა, კაპიტალიზმის მორალი და კერძო საკუთრება. საერთაშორისო კონფერენცია ორი თვის განმავლობაში ევროპის სხვადასხვა ქალაქში გაიმართება და მისი მიზანია ბაზრის მუშაობის სპეციფიკის შესწავლა.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის ბაზაზე Erasmus+CGHE-ის პროექტის „უმაღლესი განათლების ინტერდისციპლინური რეფორმა ტურიზმის მენეჯმენტის და გამოყენებითი გეოინფორმაციის სასწავლო პროგრამაში“ ფარგლებში, გეოსაინფორმაციო და ტურიზმის ტექნოლოგიების ცენტრი შეიქმნა. ცენტრი მოამზადებს სპეციალისტებს გეოსაინფორმაციო ტექნოლოგიების გამოყენებით კულტურულ მემკვიდეობასა და ტურიზმში, არქიტექტურული და ისტორიული ძეგლების დოკუმენტირებაში, და თანამედროვე გეოვიზუალური ტექნოლოგიების გამოყენებით უზრუნველყოფს სასწავლო კურსების - კულტურული ტურიზმის, საექსკურსიო საქმის, კულტურული მემკვიდრეობის მენეჯმენტის განვითარებას.

ტრადიციულად, უკვე მეექვსედ სასწავლო-პრაქტიკული ტური მოეწყო ისტორიულ ტაო-კლარჯეთში. ტურიზმის ფაკულტეტის 60 სტუდენტმა ხანძთის, თბეთის, შატბერდის, ხახულის, ოშკის, იშხნის, ოთხთას, პარხალის ტაძრები და სამონასტრო კომპლექსები მოინახულა. ახალგაზრდებმა კულტურულ ტურიზმსა და საექსკურსიო საქმეში პროფესიული უნარ-ჩვევების პირველი გამოცდა იქ, საზღვრებს მიღმა დარჩენილ ისტორიულ საქართველოში ჩააბარეს. ფაკულტეტის მენეჯმენტი ბსუ-ს ადმინისტრაციის მხარდაჭერით მსგავსი ტიპის აქტივობას სამომავლოდაც გეგმავს.

საქართველოს, ყირგიზეთსა და ნორვეგიას შორის განათლების სფეროში თანამშრომლობის პროექტის „მდგრადი ტურიზმი: სოფლად მეწარმეობა და კულტურული მემკვიდრეობა” ფარგლებში, ყირგიზი სტუდენტები საკვალიფიკაციო ნაშრომის კვლევით კომპონენტს ერთი თვის განმავლობაში ბსუ ტურიზმის ფაკულტეტზე შეასრულებენ. ტურიზმის ფაკულტეტის დეკანმა, პროფესორმა როსტომ ბერიძემ სტუმრებს ფაკულტეტის აკადემიური პერსონალი, ინფრასტრუქტურა და განვითარების სტრატეგიები გააცნო. საინფორმაციო შეხვედრაზე სტუმრებმა ფაკულტეტის სტუდენტებს ყირგიზეთის ტურისტულ რესურსებსა და პერსპექტივებზე ესაუბრეს.