საერთაშორისო ტურისტულ გამოფენაში ,,ექსპო ბათუმი - 2015” ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტმა ტრადიციულად მიიღო მონაწილეობა. უმაღლესი საგანმანათლებლო დაწესებულების სტუდენტებმა და პროფესორ-მასწავლებლებმა დამთვალიერებლებს უნივერსიტეტის სასწავლო-საგანმანათლებლო პროგრამები, სტუდენტური ცხოვრება გააცნეს და ტურისტული პროდუქტები წარუდგინეს. სამდღიანი საერთაშორისო ტურისტული გამოფენა ,,ექსპო ბათუმი - 2015” სასტუმრო „შერატონ ბათუმში“ იმართება და მასში 9 ქვეყნის 195-მდე კომპანია არის წარმოდგენილი.

უნივერსიტეტში ტურიზმის ფაკულტეტისა და ნორვეგიის ტელემარკის უნივერსიტეტის ორგანიზებით ორდღიანი სამუშაო სემინარი გაიმართა. ღონისძიების ფარგლებში მომზადდა ახალი საგრანტო პროექტი ,,ნორვეგიაში, საქართველოსა და ყირგიზეთში რეგიონული ტურიზმის მდგრადი განვითარებისა და ინტეგრაციის სფეროში განათლება”, რომელიც წარდგენილი იქნება ნორვეგიის საერთაშორისო განათლების ცენტრში. პროქტის ხანგრძლივობა 4 წელია, ხოლო ბიუჯეტი 6 მილიონ ნორვეგიულ კრონს შეადგენს. პროექტს საქართველოში კოორდინირებას ბსუ-ს ტურიზმის ფაკულტეტი გაუწევს. მასში ჩართულია ქუთაისის აკაკი წერეთლის სახელმწიფო უნივერსიტეტი და ბათუმის საზღვაო აკადემია.

6-12 მაისს ტურიზმის ფაკულტეტის სტუდენტებისათვის მუგლას უნივერსიტეტის პროფესორმა ონურ აკბულტმა თემაზე: ,,მსოფლიო ტურიზმის განვითარების თანამედროვე ტენდენციები და ბოდრუმის გამოცდილება“ მასტერკლასი ჩაატარა. ონურ აკბულტი ტურიზმის ფაკულტეტს მევლანას გაცვლითი პროგრამის ფარგლებში სტუმრობდა.

სასწავლო-პრაქტიკული ხასიათის ტური ისტორიულ ტაო-კლარჯეთში - ასე ეწოდა ტურიზმის ფაკულტეტის სტუდენტთა ორდღიან მოგზაურობას ისტორიულ ტაოში. ფაკულტეტის 70 სტუდენტმა იშხნის, ოშკის, ხახულის, ოთხთას, პარხალის, დოლისყანის ტაძრები და სამონასტრო კომპლექსები მოინახულეს, კულტურულ ტურიზმსა და საექსკურსიო საქმეში პროფესიული უნარ-ჩვევების პირველი გამოცდა იქ, ისტორიულ საქართველოში ჩააბარეს.

სასტუმრო ,,DIVAN ბათუმის“ გენერალური მენეჯერი ბულენთ ავქუთ სუზერი ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის სტუდენტებს შეხვდა. სასტუმროს გენერალურმა მენეჯერმა ახალგაზრდებს საერთაშორისო ბრენდი ,,,DIVAN ბათუმი“ წარუდგინა და ტურიზმის ფაკულტეტთან პარტნიორობის სტრატეგიის მნიშვნელობასთან ერთად დასაქმების შესაძლებლობებზე ესაუბრა. ივლისში 10 სტუდენტი ბოდრუმში სასტუმრო „DIVAN“-ის ქსელში ორთვიან პრაქტიკას გაივლის და ანაზღაურებას მიიღებს 500 აშშ დოლარის ოდენობით. დღემდე თანამშრომლობის ფარგლებში სხვადასხვა საერთაშორისო ბრენდის კომპანიებში ტურიზმის ფაკულტეტის 200-მდე სტუდენტია დასაქმებული. სასტუმრო ,,DIVAN“ ბათუმი მეოთხე საერთაშორისო ბრენდია, რომელთანაც ბსუ-ს ტურიზმის ფაკულტეტი აქტიურად თანამშრომლობს.