10-21 ოქტომბერს ტურიზმის ფაკულტეტის სტუდენტებისათვის გერმანელმა ექსპერტმა კურტ ჰეინც რეიცმა ,,მსოფლიო ტურიზმის განვითარების თანამედროვე ტენდენციები და ქართული რეალობა“ საკითხების ირგვლივ მასტერკლასი ჩაატარა.
ბატონი რეიცი წლებია რაც აქტიურად თანამშრომლობს ტურიზმის ფაკულტეტთან. 2010 წლიდან კი ის ბათუმის შოთა რუსთაველის სახელმწიფო უნივერსიტეტის საპატიო დოქტორია.

საქართველოს საპატრიარქოს მევენახეობისა და მეღვინეობის ეროვნული სამეცნიერო ცენტრის ექსპერტთა ჯგუფმა, დავით თამარაშვილის ხელმძღვანელობით ტურიზმის ფაკულტეტის სტუდენტებისათვის თემაზე ,,ქართული ღვინო და ტურიზმი“ მასტერკლასი ჩაატარეს. სტუდენტებმა სასარგებლო ინფორმაცია მიიღეს: მევენახეობა მეღვინეობის, ღვინის დაყენების ტრადიციული ტექნოლოგიის, ფალსიფიცირებული ღვინის წარმოების აღმოფხვრისა და ეკოლოგიურად სუფთა, ნატურალური ღვინის წარმოების ხელშეწყობის, ღვინის დაგემოვნების და კარგი ღვინის გამორჩევის მეთოდების, ღვინის ბიზნესის, საქართველოში ღვინის ტურიზმის განვითარების პერსპექტივების შესახებ.

ტურიზმის ფაკულტეტის ადმინისტრაცია, ბსუ-ს ბიბლიოთეკის დირექტორი და ხარისხის უზრუნველყოფის სამსახური ტურიზმის ფაკულტეტის პირველკურსელებს შეხვდნენ და მათ უნივერსიტეტის ძირითადი მარეგულირებელი აქტები, საგანმანათლებლო პროგრამების განხორციელების წესი და სტრუქტურა გააცნეს.
2014-2015 სასწავლო წელს ტურიზმის ფაკულტეტზე 150 პირველ კურსელი და 93 მობილობით გადმოსული სტუდენტი ჩაირიცხა.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის სტუდენტები სასწავლებლად ნორვეგიაში გაემგზავრნენ. ახალგაზრდები ტელემარკის უნივერსიტეტში ერთობლივი პროექტის - ,,ნორვეგიაში, საქართველოსა და ყირგიზეთში ტურიზმის მდგრადი განვითარებისა და ინოვაციების სფეროში განათლება“ ფარგლებში ისწავლიან. ტურიზმის ფაკულტეტის 6 სტუდენტი ერთი სემესტრის განმავლობაში ტურიზმის მენეჯმენტის სპეციალობას დაეუფლება, ხოლო ეკოლოგიის სპეციალობის სამი მაგისტრანტი 2-წლიან სასწავლო კურსს გაივლის. კონკურსში მონაწილეობა 110-მა სტუდენტმა მიიღო. პირველ ეტაპზე გადასული 15 სტუდენტიდან გამარჯვებულები ნორვეგიის ტელემარკის უნივერსიტეტის პროფესორებმა - ფრუდე ლენგმა და თემურ აბესაძემ ტრენინგის ჩატარების შემდეგ შეარჩიეს. სტუდენტები რექტორმა, ადმინისტრაციის ხელმძღვანელმა, დეკანებმა, ტურიზმის ფაკულტეტის პროფესორ-მასწავლებლებმა და მშობლებმა გააცილეს.

გერმანიის, რუმინეთის, მაკედონიის უმაღლესი საგანმანათლებლო დაწესებულებების ტურიზმის ფაკულტეტის დეკანები ბათუმის შოთა რუსთაველის სახელმწიფო უნივერსიტეტის რექტორს, პროფესორ ალიოშა ბაკურიძეს და ბსუ-ს ტურიზმის ფაკულტეტის დეკანს როსტომ ბერიძეს შეხვდნენ. ვიზიტის ფარგლებში დაიგეგმა ოთხი ქვეყნის ერთობლივი სამაგისტრო პროგრამის ამოქმედება ტურიზმის მენეჯმენეტის მიმართულებით. პროგრამული აკრედიტაციის გავლის შემდეგ სტუდენტები მობილობის ფარგლებში პარტნიორ უნივერსიტეტებში ერთი სემესტრის განმავლობაში ისწავლიან.