ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტი ტურიზმისა და სასტუმრო აღჭურვილობის მე-14 საერთაშორისო გამოფენაში - „EBIT - 2023’’ მონაწილეობს. ფაკულტეტის სტუდენტებმა და პროფესორ-მასწავლებლებმა დამთვალიერებლებს საუნივერსიტეტო ცხოვრება, სერვისები, ტურიზმის საგანმანათლებლო პროგრამა გააცნეს და ტურისტული პროდუქტები წარუდგინეს. ვიზიტორებს ასევე შესაძლებლობა მიეცათ, VR-სათვალის საშუალებით ვირტუალურად ემოგზაურათ საქართველოს სხვადასხვა კუთხეში, გაცნობოდნენ ქვეყნის ტურისტულ პოტენციალს, რესურსებსა და მარშრუტებს. გამოფენა 3 დღეს გაგრძელდება და მასში 85-მდე ადგილობრივი და საერთაშორისო ტურისტული კომპანია მონაწილეობს.

18-19 მაისს ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტმა ვროცლავის ბიზნეს უნივერსიტეტთან ერთად, მონაწილეობა მიიღო „Erasmus Mundus Design Measures“ საგრანტო პროექტის ფარგლებში, თბილისში, ევროპის უნივერსიტეტში გამართულ სამუშაო შეხვედრებში ერთობლივი სამაგისტრო პროგრამის „ნელი ტურიზმის მენეჯმენტის“ განსახორციელებლად. ერთობლივ სამაგისტრო პროგრამას 6 ქვეყნის 7 უნივერსიტეტი ამზადებს. ბსუ პროექტის ასოცირებული პარტნიორია, აზერბაიჯანის, თურქეთის და ჩეხეთის უნივერსიტეტებთან ერთად.

ბსუ-ს ტურიზმის ფაკულტეტის ასისტენტ პროფესორებმა ნარგიზ ფალავანდიშვილმა და თამარ ბერიძემ 12-13 მაისს მონაწილეობა მიიღეს ლატვიის სიცოცხლის მეცნიერებათა და ტექნოლოგიების უნივერსიტეტში გამართულ ყოველწლიურ საერთაშორისო კონფერენციაში „ეკონომიკური მეცნიერება სოფლის განვითარებისთვის“. მომხსენებლებმა სესიის მონაწილეებს გააცნეს ტურიზმის დარგში მიმდინარე სიახლეები და ინდივიდუალური კვლევის შედეგები. ასისტენტ პროფესორმა თამარ ბერიძემ კონფერენციაზე მოხსენება წარადგინა თემაზე: „ინვესტიციები ადამიანისეულ კაპიტალში და მისი ეფექტიანობის შეფასება (ტურიზმი, სოფლის მეურნეობა), ასისტენტ პროფესორმა ნარგიზ ფალავანდიშვილმა - „საერთაშორისო ბრენდულ სასტუმროებში დატვირთვასა და მომგებიანობას შორის განსხვავების ანალიზი კოვიდ 19-ით გამოწვეულ პანდემიამდე და პანდემიის შემდგომ პერიოდში“.

ისტორიულ ტაო-კლარჯეთში ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის ტრადიციული სასწავლო-პრაქტიკული ტური მოეწყო. 60-მდე სტუდენტმა სამდღიანი მოგზაურობის ფარგლებში ხახულის, ოშკის, იშხანის, ოთხთას, პარხალის, დოლისყანის, ტბეთის და შატბერდის ტაძრები და სამონასტრო კომპლექსები მოინახულეს. ტური კულტურული ტურიზმისა და საექსკურსიო საქმის სასწავლო კურსების ფარგლებში განხორციელდა და მიზნად ისახავდა სტუდენტების ცოდნის გაღრმავებას და პროფესიული უნარ-ჩვევების გამომუშავებას. სასწავლო-პრაქტიკული ტური ბსუ-ს ადმინისტრაციის მხარდაჭერით 10 წელია ხორციელებდა და მომავალშიც გაგრძელდება.

საქართველოს საერთაშორისო ინვესტორთა ასოციაციის ოფისში ბათუმის შოთა რუსთაველს სახელმწიფო უნივერსიტეტის ტურიზმის ფაკულტეტის სტუდენტებთან შეხვედრა გაიმართა. „ტურიზმისა და სასტუმრო აღჭურვილობის რიგით მე-14 საერთაშორისო გამოფენა EBIT 2023’’ საორგანიზაციო პროცესში ტურიზმის ფაკულტეტის 60-მდე სტუდენტი ჩაერთო და ერთი თვის განმავლობაში აქტიურ მონაწილეობას მიიღებენ გამოფენის დაგეგმვა-განხორციელების პროცესში. საერთაშორისო გამოფენა მიმდინარე წლის 19-21 მაისს გაიმართება.