ბსუ-ს აგრარული და მემბრანული ტექნოლოგიების ინსტიტუტში მთავარმა მეცნიერ თანამშრომელმა, ასოცირებულმა პროფესორმა ნინო კიკნაძემ ბსუ–ს ქიმიის, ფარმაციის, ეკოლოგიის სპეციალობის სტუდენტებთან ერთად, მოსწავლეებს უმასპინძლა. ღონისძიება მიზნად ისახავდა საბუნებისმეტყველო მეცნიერებების პოპულარიზაციას. ქიმიის სპეციალობის სტუდენტებმა ლაურა ქორჩილავამ, მარიამ რუხაძემ, ანი შავაძემ, ლელა ჩოგაძემ, გოჩა მგელაძემ, რაულ კოჩალიძემ, თორნიკე ტარიელაძემ ჩაატარეს სადემონსტრაციო ცდები ქიმიაში, სკოლების მოსწავლეთა აქტიური ჩართულობით.

ბათუმის შოთა რუსთაველის სახელმწიფო უნივერსიტეტის აგრარული და მემბრანული ტექნოლოგიების ინსტიტუტის მემბრანული ტექნოლოგიების მთავარმა მეცნიერ თანამშრომელმა რაულ გოცირიძემ ხელვაჩაურის მუნიციპალიტეტის სოფელ თხილნარის #1 საჯარო სკოლაში ჩაატარა ლექცია-დისკუსია თემაზე: „წყალი-სიცოცხლის ფორმირების წყარო“. მომხსენებელმა ისაუბრა წყლის არაორდინალურ და ანომალიურ თვისებებზე: მის მაღალი სითბოტევადობის, სიმკვრივის თავისებურებებზე, შემადგენლობაზე, ზედაპირულ დაჭიმულობასა და სიბლანტეზე, წყლისგან გამოწვეულ დაავადებებსა და წყლის რესურსების დაცვისა და მოფრთხილების აუცილებლობაზე.

ბსუ-ს აგრარული და მემბრანული ტექნოლოგიების ინსტიტუტი პროექტის „უნივერსიტეტი-სკოლას’’ ფარგლებში გამართულ შეხვედრებზე სკოლის მოსწავლეებს აცნობენ ინსტიტუტის მემბრანული ტექნოლოგიების განყოფილების სამეცნიერო მიმართულების კვლევით პროექტებს. მორიგ შეხვედრაზე ინსტიტუტის მკვლევრებმა ბათუმის N 8, N3, N10 საჯარო სკოლის მე-11 და მე-12 კლასის მოსწავლეებს თხევადი ნარევების დაყოფის ერთერთი მოწინავე მეთოდი - მემბრანული ფილტრაციის ტექნოლოგიები წარუდგინეს.

პროექტის „უნივერსიტეტი - სკოლას“ ეგიდით, აგრარული და მემბრანული ტექნოლოგიების ინსტიტუტის პროექტის „ნავთობითა და ნავთობპროდუქტებით დაბინძურებული წყლების გაწმენდა სორბციული მეთოდით“ ფარგლებში, გაიმართა ღონისძიება - ნარევების დაყოფის მეთოდების დემონსტრირება. ინსტიტუტის უფროსმა მეცნიერ თანამშრომელმა ნარგიზ მეგრელიძემ და მეცნიერ თანამშრომელმა რუსლან დავითაძემ საჯარო სკოლის მოსწავლეებს გააცნეს ნარევების დაყოფის მეთოდები, რომელიც ეფუძნება ნარევების დაყოფას ნივთიერებათა ფიზიკურ თვისებების შორის განსხვავებულობას (განსხვავებულ ხსნადობას, სიმკვრივეს, ფერს, შთანთქმის უნარიანობას, გავრცელების სიჩქარეს და ა.შ.). პროექტის მიზნად ისახავს ნარევების დაყოფის მეთოდების გაღრმავებული სწავლების გზით სისტემური ცოდნის კონსტრუირებას ბუნებაში მიმდინარე სორბციული პროცესების შესახებ, ბუნებრივ მოვლენებს შორის მიზეზ-შედეგობრივი კავშირების გამოვლენასა და საბოლოოდ სამყაროს ერთიანობის აღქმის ფორმირებას.