ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტში წყალ-ჭაობიანი ტერიტორიების საერთაშორისო დღისადმი მიძღვნილი სემინარი გაიმართა თემაზე: „კაცობრიობის მომავალი - ჭარბტენიანი ტერიტორიების კონსერვაციაშია, დავიცვათ ისინი ჩვენი და მომავალი თაობების საკეთილდღეოდ - შემოგვიერთდით“. მომხსენებლებმა კოლხეთის წყალ-ჭაობიანი ეკოსისტემის უნიკალური რეფუგიუმის მნიშვნელობასა და დაცვის აუცილებლობაზე ისაუბრეს

აშშ-ს სამოქალაქო კვლევებისა და განვითარების ფონდის (GRDF-Global), შოთა რუსთაველის ეროვნული სამეცნიერო ფონდის და საქართველოს სამეცნიერო-ტექნოლოგიური განვითარების ფონდის (სსგფ) პროგრამის ,,დამოუკიდებელი ექსპერტიზა და მდგრადი მეცნიერება საქართველოსთვის“ ფარგლებში გამოცხადებული ,,კვლევითი გრანტების პროგრამის“ კონკურსში პროექტმა ,,მცენარეთა საკარანტინო ბაქტერიული პათოგენის Ralstonia solanacearum-ის ქართული შტამების სრული გენომის გაშიფვრა“ გაიმარჯვა. პროექტი აშშ-ის დამოუკიდებელი ექსპერტების, დონორი ორგანიზაციების (აშშ თავდაცვისა და საფრთხის შემცირების სააგენტო - US DTRA) წარმომადგენლების შეფასების საფუძველზე დაფინანსდა. ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტის მცენარეთა დაავადებების მონიტორინგის, დიაგნოსტიკისა და მოლეკულური ბიოლოგიის განყოფილების მკვლევრები კვლევას საბაზო ორგანიზაციის ლ. საყვარელიძის სახელობის დაავადებათა კონტროლისა და საზოგადოებრივი ჯანმრთელობის ეროვნული ცენტრის წარმომადგენლებთან ერთად განახორციელებენ.

ფიტოპათოლოგიისა და ბიომრავალფეროვნების ინსტიტუტის უფროსმა მეცნიერ-თანამშრომელმა ირაკლი მიქელაძემ და მთავარმა მეცნიერ-თანამშრომელმა გალინა მეფარიშვილმა პროექტის ,,ტყის მდგრადი მართვა საქართველოში“ ფარგლებში ავსტრიაში გამართულ ხუთდღიან სასწავლო ტურში მიიღეს მონაწილეობა. პროექტი ავსტრიის განვითარების სააგენტოს (ADC) ფინანსური მხარდაჭერით განხორციელდა და მიზნად ისახავდა საქართველოში მიმდინარე სატყეო რეფორმის მხარდაჭერას. ავსტრიის სატყეო პოლიტიკის, ავსტრიის სოფლის მეურნეობის, ტყის, გარემოსა და წყლის მართვის სამინისტროს, სახელმწიფო ტყეების სამსახურისა და სხვადასხვა ორგანიზაციის წარმომადგენლებთან გამართულ შეხვედრებზე ქართველმა მკვლევარებმა უცხოელი კოლეგების გამოცდილება გაიზიარეს. გამოიკვეთა პრობლემის მოგვარებაში ბიომრავალფეროვნებისა და ფიტოპათოლოგიური დარგის მეცნიერების როლი.

ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტს ოთხდღიანი სამუშაო ვიზიტით დიდი ბრიტანეთის თავდაცვის სამინისტროს და სურსათისა და გარემოს კვლევის სააგენტოს (FERA) წარმომადგენლები რობერტ ბოლტონი და რიჩარდ ტვაიტესი ეწვივნენ. სტუმრებმა უნივერსიტეტის რექტორთან, პროფესორ ალიოშა ბაკურიძესთან, ინსტიტუტის თანამშრომლებთან და აჭარის სოფლის მეურნეობის სამინისტროს წარმომადგენლებთან გამართულ შეხვედრებზე ბოლო რამდენიმე წლის განმავლობაში განხორციელებული პროექტები შეაფასეს. 2002 წლიდან თანამშრომლობისა და კოლაბორაციის ეგიდით საერთაშორისო სამეცნიერო-ტექნიკური ცენტრის (ISTC) ორი სამეცნიერო და ერთი საკონფერენციო პროექტი განხორციელდა. სამეცნიერო პროგრამების ფარგლებში ინსტიტუტი აღიჭურვა თანამედროვე სამეცნიერო აპარატურითა და სხვა ტექნიკური საშუალებებით, შეიქმნა ახალი, მოლეკულური ბიოლოგიის ლაბორატორია, გაუმჯობესდა ინფრასტრუქტურა, მეცნიერ-თანამშრომლებმა გაიარეს სხვადასხვა სახის სამეცნიერო ტრენინგები დიდი ბრიტანეთის სამეცნიერო ცენტრებში.

ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტის მეცნიერ-თანამშრომელმა ქეთინო ნაცარიშვილმა მარცვლოვანთა ჟანგების საწვრთნელ პროგრამაში მიიღო მონაწილეობა. ექვსკვირიანი საწვრთნელი პროგრამა მიზნად ისახავდა მარცვლეულის ჟანგების ბიოლოგიის, ეკოლოგიის, ეპიდემიოლოგიის, დიაგნოზისა და დაავადების მართვის სხვადასხვა მეთოდის გაცნობასა და შესწავლას. კურსი მოიცავდა ლაბორატორიულ, სასათბურე და საველე აქტივობებს, ლექციებსა და ჯგუფურ დისკუსიებს. პროექტი მინესოტას უნივერსიტეტში (აშშ) სტეკმენ-ბორლაუგის მარცვლოვანთა ჟანგების ცენტრისა (S-BCRC) და ჟანგების მიმართ ხორბლის გამძლეობის საერთაშორისო პროგრამის (DRWW) ორგანიზებითა და მხარდაჭერით განხორციელდა.