ზედიზედ მეორედ, ბსუ-ს იურიდიული და სოციალურ მეცნიერებათა ფაკულტეტის ფსიქოლოგიის საბაკალავრო საგანმანათლებლო პროგრამის სტუდენტი დიეგო ჩხიკვაძე ევროპის ჩემპიონი გახდა. ქართველმა ფალავანმა ევროპის ბერძნულ-რომაული სტილით 23-წლამდელ მოჭიდავეთა ფინალში თურქი მუსტაფა ილდირიმი დაამარცხა. ბათუმის შოთა რუსთაველის სახელმწიფო უნივერსიტეტი ულოცავს დიეგო ჩხიკვაძეს დამსახურებულ გამარჯვებას და წარმატებებს უსურვებს!

საქართველოს წითელი ჯვრის ბათუმის ფილიალის მოხალისეებმა და ტრენერებმა ბსუ-ს სტუდენტებთან საინფორმაციო შეხვედრა გამართეს. ორგანიზაციის წარმომადგენლებმა სხვადასხვა ფაკულტეტის სტუდენტებს წითელი ჯვრის მიმდინარე პროექტები, ვორქშოფები, კლუბების სიმულაციები და აქტივობები გააცნეს. წითელი ჯვრის წევრებმა სტუდენტებს ასევე გამოცდილება გაუზიარეს და ის შესაძლებლობები გააცნეს თუ როგორ გახდნენ წითელი ჯვრის მოხალისეები, მიიღონ მხარდაჭერა და ცოდნა, რაც აქვს ორგანიზაციას ადგილობრივ თუ საერთაშორისო დონეზე.

ბსუ-ს საჯარო მმართველობის საგანმანათლებლო პროგრამის მეორე კურსის სტუდენტების პროექტი „ადაპტირებული ბათუმი“ ბათუმის მერიის კონკურსის - „შენი იდეა ბათუმს“ გამარჯვებულია. კონკურსის ხმის მიცემის დასრულების შემდეგ, მონაწილეობითი ბიუჯეტის საბჭოს სხდომაზე პირველ ეტაპზე გამოვლენილი 6 იდეიდან გამარჯვებულად 2 პროექტი დასახელდა, რომლებიც ბათუმის მერიის 2023 წლის ბიუჯეტიდან დაფინანსდება. პროექტის ავტორია ბსუ-ს სტუდენტი დათა კობალაძე და თანაავტორი ბსუ-ს კურსდამთავრებული - შოთა გურგენიძე, ასევე პროექტის ჯგუფის წევრები არიან სტუდენტები: ანეტი ბერიძე, ანამარია ბოლქვაძე, ქრისტინა სურმანიძე და ხვიჩა ცენტერაძე. ბსუ სტუდენტებს ულოცავს გამარჯვებას და უსურვებს წარმატებებს.

ბათუმის შოთა რუსთველის სახელმწიფო უნივერსიტეტის ეკონომიკისა და ბიზნესის ფაკულტეტის მესამე კურსის სტუდენტმა გოჩა შაინიძემ შერეული საბრძოლო ხელოვნების ჩემპიონატზე, GFC 19-ზე (Georgian Fighting Championship) წარმატებით იბრძოლა და სრული დომინაციით ისრაელის წარმომადგენელი დაამარცხა. GFC 19-ი თბილისში, ახალ სპორტულ სასახლეში ჩატარდა, სადაც 6 ქვეყნის 9 წარმომადგენელი მონაწილეობდა. გოჩა შაინიძე საქართველოს ჩემპიონია შერეულ ორთაბრძოლებში და შავი ზღვის თასის მფლობელი კიკბოქსინგში. ბათუმის შოთა რუსთაველის სახელმწიფო უნივერსიტეტი გოჩა შაინიძეს ულოცავს გამარჯვებას და წარმატებებს უსურვებს.

ბათუმის შოთა რუსთაველის სახელმწიფო უნივერსიტეტის „სტუდენტთა საგანმანათლებლო, კულტურულ-შემოქმედებითი და სპორტული სახის პროექტების კონკურსი - 2023’’ დასრულდა. კონკურსში მონაწილე 12 პროექტიდან დაფინასება მოიპოვა შემდეგმა 6-მა პროექტმა: „100 წერილი ბსუ-ს“, „ასტრონომიული ობიექტების რელიეფის ელემენტების სიმაღლეების განსაზღვრა ასტრონომიული ტელესკოპი FL-80640-ის საშუალებით“, „გარემოსდაცვითი ახალგაზრდული სამიტი - Environmental Youth Summit“, „დებატ კლუბი“, „სტუდენტური მედია კლუბი (Student Media Club)“, „ბსუს მოხალისეთა კლუბი - BSU Volunteer Club“.