ახალი ამბები

ბათუმის შოთა რუსთაველის სახელმწიფო უნივერსიტეტში მაინცის უნივერსიტეტის პროფესორ მარკუს ბონერის ღია ლექციები და ვორკშოფი ტარდება თემაზე: „ხარისხი და მეთოდოლოგიური მიდგომები პროფესიულ განათლებაში“. პროფესორი მარკუს ბონერი ორი დღის განმავლობაში ბსუ-ს პროფესორ-მასწავლებლებსა და პროფესიული განათლების დარგის სპეციალისტებს ისეთ აქტუალურ საკითხებს გააცნობს, როგორიცაა: პროფესიული საგანმანათლებლო სფეროს ხარისხის მართვა, სასწავლო პროცესის მართვა, სწავლება-სწავლის მეთოდოლოგია. ღონისძიება ბსუ-ს პროფესიული პროგრამების მართვის და უწყვეტი განათლების ცენტრისა და გერმანიის თანამშრომლობის საზოგადოების GIZ-ის ორგანიზებით იმართება.

4-6 ოქტომბერს, ოდესაში, „ჰორიზონტ 2020-ის“ საგრანტო პროექტის „ცოდნის და აკადემიური კულტურის მიმოცვლა ჰუმანიტარულ მეცნიერებებში: ევროპა და შავი ზღვის რეგიონი, XVIII ს. მეორე ნახევარი - XXI საუკუნე“ ეგიდით გამართულ საერთაშორისო კონფერენციაში მონაწილეობა მიიღეს ბათუმის შოთა რუსთაველის სახელმწიფო უნივერსიტეტის პროფესორ-მასწავლებლებმა: თამარ სირაძემ, მარინე აროშიძემ, მანუჩარ ლორიამ, დალი დობორჯგინიძემ და დოქტორანტმა ანასტასია მახარაძემ. კონფერენციის ფარგლებში გაიმართა საგრანტო პროექტის სამუშაო შეხვედრა და დაიგეგმა მეორე საზაფხულო სკოლის „თარგმანის როლი მეცნიერების განვითარებაში - 2020“ ბათუმის შოთა რუსთაველის სახელმწიფო უნივერსიტეტში ჩატარება.

ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტის დეკანმა, პროფესორმა გიზო ფარცხალაძემ მონაწილეობა მიიღო 1-5 ოქტომბერს, ყაზახეთში, ქალაქ ნურსულთანში ERASMUS+-ის საგრანტო პროექტის „InnoCENS Project“-ის ფარგლებში გამართულ კონსორციუმის წევრი უნივერსიტეტების წარმომადგენელთა და საერთაშორისო მრჩეველთა საბჭოს წევრთა შეხვედრაში. პროგრამის 30-მა ქართველმა, შვედმა, ფინელმა, ესპანელმა, ბელორუსმა, სომეხმა, ყაზახმა მონაწილემ შეაჯამა პროექტის სამწლიანი მუშაობის შედეგები.

დიდი ბრიტანეთის ელჩი ჯასტინ მაკკენზი სმიტი ბრიტანული სეზონის ფარგლებში ბათუმის შოთა რუსთაველის სახელმწიფო უნივერსიტეტის სტუდენტებს შეხვდა. დიპლომატიური კორპუსის წარმომადგენელმა ბრიტანეთსა და საქართველოს შორის განსაკუთრებულ მეგობრულ ურთიერთობაზე ისაუბრა და ყურადღება გაამახვილა ეთობლივი გაცვლითი პროგრამების ამოქმედებასა და სტაჟირების პროგრამის განხორციელებაზე. შეხვედრის დასასრულს დიდი ბრიტანეთის ელჩმა სტუდენტების შეკითხვებს უპასუხა.

ბათუმის შოთა რუსთაველის სახელმწიფო უნივერსიტეტში ნატოს გენერალური მდივნის მოადგილის როუზ გიოტმიოლერის ვიზიტი შედგა. ვიზიტის ფარგლებში საგარეო საქმეთა სამინისტროს ნატოსა და ევროკავშირის შესახებ საინფორმაციო ცენტრის დირექტორი თამარ წულეისკირი ბსუ-ს რექტორს მერაბ ხალვაშს შეხვდა და მადლობა გადაუხდა ღონისძიების მასპინძლობისა და ცენტრის აქტიური მხარდაჭერისთვის.