ახალი ამბები

საქართველოს პარლამენტის თავმჯდომარის მოადგილე ილია ნაკაშიძე აჭარაში შშმ პირთა საკითხებზე მომუშავე ორგანიზაციების წარმომადგენლებს, ბათუმის შოთა რუსთაველის სახელმწიფო უნივერსიტეტის პროფესორ-მასწავლებლებსა და სტუდენტებს შეხვდა. ღონისძიების მონაწილეები შშმ პირთა პრობლემებს, აქტუალურ საკითხებსა და არსებულ რეკომენდაციებს გაეცნენ. შეხვედრაზე ასევე ისაუბრეს დასაქმების, ინფრასტრუქტურული პრობლემების, ეკონომიკურ-სოციალური მდგომარეობისა და შშმ პირთა საზოგადოებრივ ცხოვრებაში მეტი ჩართულობის მნიშვნელობაზე.

ბათუმის შოთა რუსთაველის სახელმწიფო უნივერსიტეტში დედამიწის საერთაშორისო დღე აშშ-ის საერთაშორისო განვითარების სააგენტოს (USAID) და CENN-ის ორგანიზებით პროგრამის „ნარჩენების მართვის ტექნოლოგია რეგიონებში, ფაზა II“ (WMTR II) ფარგლებში ნარჩენების სეპარაციის სტენდის გახსნით აღინიშნა. სეპარაციის სტენდის გახსნის ცერემონიაში მონაწილეობა მიიღეს რექტორმა მერაბ ხალვაშმა, ბათუმის მერმა ლაშა კომახიძემ, USAID-ის მისიის ეკონომიკური განვითარების ოფისის დირექტორმა ვერონიკა ლიმ და CENN-ის აღმასრულებელმა დირექტორმა ნანა ჯანაშიამ. ბსუ პირველი უმაღლესი საგანმანათლებლო დაწესებულებაა აჭარაში, სადაც ნარჩენების სეპარაციის სტენდი განთავსდა. სტუდენტებმა და მოწვეულმა სტუმრებმა სეპარაციის სტენდში სიმბოლურად განათავსეს დახარისხებული ნარჩენები.

ბსუ-ს სტუდენტური პროექტების ფარგლებში დაფინანსებული პირველი გამარჯვებული პროექტი, "ეკონომიკური დებატები - ბსუ 2019" წარმატებით დასრულდა. დებატების ტურნირი პირველად ჩატარდა მსგავსი ფორმატით და საქართველოს მასშტაბით 7 უმაღლესი საგანმანათლებლო დაწესებულების 40 სტუდენტი გააერთიანა. პროექტი 2 ნაწილს მოიცავდა - საჯარო ლექციებსა და დებატების ტურნირს.

საქართველოს საგარეო საქმეთა სამინისტროს ლევან მიქელაძის სახელობის დიპლომატიური სასწავლო და კვლევითი ინსტიტუტის და აჭარის ა.რ. ტურიზმისა და კურორტების დეპარტამენტის ორგანიზებით ბათუმის შოთა რუსთაველის სახელმწიფო უნივერსიტეტში სამდღიანი სასწავლო კურსი დაიწყო თემაზე: „ტურისტული დიპლომატია, როგორც ქვეყნის საგარეო პოლიტიკის მნიშვნელოვანი პრიორიტეტი“. დიპლომატიური კორპუსის წარმომადგენლები, საქართველოს საგარეო საქმეთა სამინისტროს თანამშრომლები და ლევან მიქელაძის სახელობის დიპლომატიური სასწავლო და კვლევითი ინსტიტუტის მკვლევარები ბსუ-ს სტუდენტებსა და ტურიზმით დაინტერესებულ პირებს ლექციებს წაუკითხავენ საქართველოს საგარეო პოლიტიკის, დიპლომატიისა (ტურისტული, ეკონომიკური, კულტურული დიპლომატიის) და საერთაშორისო სივრცეში ინტეგრირების საკითხებზე. სასწავლო კურსი დიპლომატიის ინსტიტუტის მკვლევარის, ელჩის მიხეილ უკლებას საჯარო ლექციით - „საქართველოს დიპლომატიის უახლესი ისტორია 1991 წლიდან დღემდე“ დაიწყო.

ბათუმის შოთა რუსთაველის სახელმწიფო უნივერსიტეტში ქართული ფილოლოგიის დეპარტამენტის ორგანიზებით (მოდერატორი ასოცირებული პროფესორი ნანა ტრაპაიძე) ღონისძიება „აკადემიური წერა - პროცესი და შედეგები“ გაიმართა. ბსუ-ში მიმდინარე წლიდან პირველად სასწავლო საპილოტე სასწავლო კურსი აკადემიური წერა „მუდლის“ პროგრამის გამოყენებით ხორციელდება და ორიენტირებულია ცოდნაზე, ანალიზზე, აკადემიურ კეთილსინდისიერებაზე, ანტიპლაგიატზე. ღონისძიებაზე სხვადასხვა სპეციალობის სტუდენტებმა (ჰუმანიტარული, საბუნებისმეტყველო, ეკონომიკური, სამართლის მეცნიერებების და ტურიზმის) აკადემიური წერის სასწავლო კურსის ფარგლებში სხვადასხვა თემაზე შესრულებული კვლევების შედეგები პრეზენტაციების სახით წარმოადგინეს . სტუდენტებმა კარგად წარმოაჩინეს სასწავლო პროცესში შეძენილი ცოდნა: ზეპირი მეტყველების, ანალიზის და კრიტიკული აზროვნების უნარ-ჩვევები.