ახალი ამბები

ევროპის დღეების ფარგლებში ბათუმის შოთა რუსთაველის სახელმწიფო უნივერსიტეტმა ნასაკირალის საჯარო სკოლის მოსწავლეებსა და მასწავლებლებს უმასპინძლა. მეთერთმეტე კლასელებს რექტორი მერაბ ხალვაში შეხვდა და უნივერსიტეტის ისტორია, მიღწევები და სამომავლო გეგმები გააცნო. ბსუ-ს სოციალურ და პოლიტიკურ მეცნიერებათა ფაკულტეტის პროფესორებმა მოსწავლეებს ლექცია წაუკითხეს თემაზე: „ევროპული ღირებულებები და იდენტობა“. ღონისძიების ფარგლებში ახალგაზრდები ასევე გაეცნენ უმაღლესი საგანმანათლებლო დაწესებულების მატერიალურ-ტექნიკურ ბაზას, კაბინეტ-ლაბორატორიებს, სამრეწველო ინოვაციების ლაბორატორია ფაბლაბს და საუნივერსიტეტო ცხოვრებას. ღონისძიების დასასრულს ნასაკირალის საჯარო სკოლის მოსწავლეებს სამახსოვრო საჩუქრები გადაეცათ.

უნივერსიტეტის ორგანიზებითა და აჭარის ა.რ. საგანგებო სიტუაციების მართვის მთავარი სამმართველოს მხარდაწერით ბათუმის შოთა რუსთაველის სახელმწიფო უნივერსიტეტის სტუდენტებისათვის, პროფესორ-მასწავლებლებისა და ადმინისტრაციული პერსონალისათვის სამდღიანი ტრენინგი ჩატარდა. სწავლების მონაწილეები სახანძრო უსაფრთხოების ნორმებსა და საგანგებო სიტუაციაში მოქცევის წესებს გაეცნენ. ტრენინგი ასევე ითვალისწინებდა ბსუ-ს II კორპუსში ხანძრის იმიტაციას და სტუდენტებისა და პროფესორ-მასწავლებლების ევაკუაციას სახანძრო ტექნიკის გამოყენებით.

ბათუმის შოთა რუსთაველის სახელმწიფო უნივერსიტეტის აკადემიური საბჭოს გადაწყვეტილებით პროფესორებს: ნოდარ ჭყონიას, რევაზ დიასამიძესა და გულიკო შერვაშიძეს უნივერსიტეტის განვითარებაში შეტანილი წვლილისა და ნაყოფიერი სამეცნიერო-პედაგოგიური მოღვაწეობისთვის ბსუ-ს საპატიო ჯილდო მიენიჭათ. აკადემიური საბჭოს სხდომაზე უნივერსიტეტის რექტორმა მერაბ ხალვაშმა ღვაწლმოსილ პროფესორებს საიუბილეო თარიღი მიულოცა და შოთა რუსთაველის სახელობის მედლით დააჯილდოვა. ასევე იუბილარებს წარმატებები უსურვეს და სამახსოვრო საჩუქრები გადასცეს აჭარის ა.რ. განათლების, კულტურისა და სპორტის მინისტრმა ინგა შამილიშვილმა და მინისტრის მოადგილემ ირაკლი თავბერიძემ.

ბსუ-ს სააქტო დარბაზში გამართულ ისრაელისა და საქართველოს ანსამბლების ერთობლივ კონცერტში მონაწილეობა მიიღო უმაღლესი საგანმანათლებლო დაწესებულების ფოლკლორულმა ანსამბლმა „თირინმა“. ღონისძიება ისრაელის ორგანიზაციის - „სიცოცხლის ეტაპი“ ეგიდით გაიმართა და მიზნად ისახავდა ქართული კულტურის გაცნობას. ებრაული არაკომერციული ორგანიზაცია ახორციელებს პროექტს, რომელიც ითვალისწინებს საერთაშორისო ცეკვის, ვოკალური და მუსიკალური კონვენციის შექმნას. კულტურული ღონისძიებები ყოველწლიურად იმართება მსოფლიოს სხვადასხვა ქვეყანაში და ქმნის მხატვრულ, არტისტულ კოალიციას.

ბათუმის შოთა რუსთაველის სახელმწიფო უნივერსიტეტში საჯარო დისკუსია გაიმართა თემაზე: „ღია მმართველობა - მიღწევები და გამოწვევები“. საქართველოს იუსტიციის სამინისტროს, ინფორმაცის თავისუფლების განვითარების ინსტიტუტის (IDFI), მონაცემთა გაცვლის სააგენტოსა (DEA/MoJ), USAID-ის წარმომადგენლებმა ღია მმართველობა საქართველოს პრიორიტეტული მიმართულებები და ღია მმართველობა საქართველოს 2018-2019 წლების სამოქმედო გეგმის სავარაუდო ვალდებულებები განიხილეს. 2018 წლის 17-19 ივლისს ღია მმართველობის პარტნიორობის მეხუთე გლობალურ სამიტს საქართველო, თავმჯდომარე ქვეყანა უმასპინძლებს, სადაც განიხილება ქვეყნის ეროვნული სამოქმედო გეგმა.