ახალი ამბები

შოთა რუსთაველის დარბაზში საერთაშორისო სადოქტორო სკოლის „დიგიტალური ჰუმანიტარია’’ პირველი შესარჩევი ტური დაიწყო. საერთაშორისო პროექტს გოეთეს სახელობის უნივერსიტეტი ბათუმის შოთა რუსთაველის სახელმწიფო უნივერსიტეტთან და ივანე ჯავახიშვილის სახელობის თბილისის სახელმწიფო უნივერსიტეტთან ერთად ახორციელებს. პროექტის მიზანია ჰუმანიტარულ მეცნიერებებში კვლევის უახლესი მეთოდების შემოტანა, დანერგვა და ახალგაზრდა სამეცნიერო კადრების მომზადება, რაც ხელს შეუწყობს საქართველოში დიგიტალური ჰუმანიტარიის განვითარებას. ღონისძიების ფარგლებში ასევე გაიხსნა დიგიტალური ჰუმანიტარიის ცენტრი.

დღეს, ბათუმის შოთა რუსთაველის სახელმწიფო უნივერსიტეტში, გაეროს ბავშვთა ფონდის ხელშეწყობით და ევროკავშირის დაფინანსებით აჭარაში ბავშვთა დაცვის მიმართვიანობის პროცედურების დანერგვასთან დაკავშირებით შეხვედრა გაიმართა. შეხვედრის მონაწილეებს ბსუ-ს რექტორი მერაბ ხალვაში მიესალმა და ბავშვთა მიმართ ძალადობის პრევენციასა და მიმართვიანობის პროცედურების აჭარის რეგიონში დანერგვის მნიშვნელობაზე ისაუბრა.

ბათუმის შოთა რუსთაველის სახელმწიფო უნივერსიტეტს საქართველოს პარლამენტის მეცნიერებისა და განათლების კომიტეტის თავმჯდომარე მარიამ ჯაში აჭარის ა.რ. განათლების, კულტურისა და სპორტის მინისტრთან ინგა შამილიშვილთან ერთად ეწვია. საკანონმდებლო ორგანოს წარმომადგენელმა საგამოცდო ცენტრი, საუნივერსიტეტო სტომატოლოგიური კლინიკა „ბსუ დენტი“, სამრეწველო ინოვაციური ლაბორატორია „ფაბლაბი“, მინერალოგიისა და ზოოლოგიის კაბინეტები რექტორთან მერაბ ხალვაშთან ერთად დაათვალიერა. ვიზიტის ფარგლებში მარიამ ჯაში უნივერსიტეტის აკადემიურ და ადმინისტრაციულ პერსონალს შეხვდა და განათლების სისტემაში მიმდინარე საკანონმდებლო ცვლილებები გააცნო. ყურადღება გაამახვილა, სწავლების ინტერნაციონალიზაციაზე, პროფესიული და უმაღლესი განათლების კავშირის გაღრმავებაზე, განათლების მიმართულების ხარისხობრივ გაუმჯობესებასა და წარმოჩენის აუცილებლობაზე.

დღეს სასტუმრო „შერატონში“ ა(ა)იპ „მრავალეროვანი საქართველო დემოკრატიული ღირებულების განმტკიცებისთვის“ და ბათუმის შოთა რუსთაველის სახელმწიფო უნივერსიტეტის ორგანიზებით „გაეროს ახალგაზრდული ასამბლეა 2017“ გაიხსნა. ახალგაზრდული ფორუმი უნივერსიტეტის რექტორმა მერაბ ხალვაშმა გახსნა, დელეგატებს მიესალმა და გაეროში ახალგაზრდების როლსა და მნიშვნელობაზე ისაუბრა. ფორუმში რეგიონის 500-მდე მოსწავლე და სტუდენტი მონაწილეობს.

დღეს, ბათუმის შოთა რუსთაველის სახელმწიფო უნივერსიტეტმა ხელვაჩაურის მუნიციპალიტეტის 10 საჯარო სკოლის 25-მდე მოსწავლეს უმასპინძლა. პროექტის „ცოდნა წარმატებული მომავლისთვის“ ფარგლებში უნივერსიტეტის რექტორის მოადგილეები: ნათია წიკლაშვილი, თამარ სირაძე და პრესსამსახურის უფროსი ნინო დოლიძე სკოლის მოსწავლეებს შეხვდნენ, უნივერსიტეტის მისია, პრიორიტეტები, სწავლის პირობები, სამომავლო გეგმები გააცნეს და მომავალი სტუდენტების შეკითხვებს უპასუხეს. სკოლის მოსწავლეებმა უნივერსიტეტის ინფრასტრუქტურა დაათვალიერეს, ასევე ბსუ-ს სამრეწველო ინოვაციურ ლაბორატორიაში ადგილზევე გაეცნენ 3D პრინტერითა და ლაზერული ჭრის აპარატით დამზადებულ ნამუშევრებს, მონაწილეობა მიიღეს „შეზღუდული შესაძლებლობის მქონე პირთა უფლებებისათვის“ ლოგოს დამზადების პროცესში, რომელიც ორგანიზაციას უნივერსიტეტისგან საჩუქრად გადაეცა. ღია კარის დღე სკოლის მოსწავლეებისთვის „აიპ შეზღუდული შესაძლებლობის მქონე პირთა უფლებებისთვის“ და ბათუმის შოთა რუსთაველის სახელმწიფო უნივერსიტეტს შორის გაფორმებული მემორანდუმის ფარგლებში განხორციელდა.