დღეს, ბათუმის შოთა რუსთაველის სახელმწიფო უნივერსიტეტში საქართველოს ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ვიქტორ დოლიძე უნივერსიტეტის სტუდენტებს და პროფესორ-მასწავლებლებს შეხვდა.
შეხვედრას, რომელიც ევროკავშირში უვიზო მიმოსვლასთან დაკავშირებულ საკითხებს შეეხებოდა ბსუ-ს რექტორი მერაბ ხალვაში და აჭარის ა.რ განათლების, კულტურისა და სპორტის მინისტრი ინგა შამილიშვილი ესწრებოდნენ.
ევროკავშირის სადამკვირვებლო მისიის საინფორმაციო ანალიტიკური ანგარიშების განყოფილების ხელმძღვანელმა დოქტორმა კაუპო კანდიმ ბათუმის შოთა რუსთაველის სახელმწიფო უნივერსიტეტის სტუდენტებისათვის საჯარო ლექცია წაიკითხა. საუბარი ევროკავშირის სადამკვირვებლო მისიის საქმიანობას, მანდატის ფარგლებში განხორციელებულ საქმიანობას და სამომავლო გეგმებს შეეხებოდა.
პოლონეთის რესპუბლიკის ელჩი საქართველოში მარიუშ მაშკიევიჩი ბათუმის შოთა რუსთაველის სახელმწიფო უნივერსიტეტს ეწვია. დიპლომატმა უმაღლესი საგანმანათლებლო დაწესებულების რექტორთან მერაბ ხალვაშთან გამართულ შეხვედრაზე საქართველოსა და პოლონეთს შორის არსებულ ურთიერთობებზე ისაუბრა. დაიგეგმა ერთობლივი საგანმანათლებლო-სამეცნიერო პროექტებისა და გაცვლითი პროგრამების განხორციელება. მხარეთა შეთანხმებით, ბსუ-ში გაიხსნება ქართულ-პოლონური ურთიერთობების კაბინეტი და უნივერსიტეტის პოლონელი არქიტექტორის ალექსანდრე შიმკევიჩის სახელობის მემორალური დაფა გაიხსნება.
ბათუმის შოთა რუსთაველის სახელმწიფო უნივერსიტეტმა ინტელექტუალურ შეჯიბრს „Quidditch: Intellectual Competition for Schools“ უმასპინძლა. სკოლის მოსწავლეებს ბსუ-ს რექტორი მერაბ ხალვაში და აჭარის განათლების, კულტურისა და სპორტის მინისტრი ინგა შამილიშვილი მიესალმნენ და წარმატებები უსურვეს. შეჯიბრი ინგლისურ ენაზე კომპანიის „ინგლისური წიგნი საქართველოში“ ორგანიზებით მიმდინარეობს და რეგიონების მიხედვით სამი სერიისაგან შედგება. თითოეული სკოლა წარმოდგენილია ერთი ან რამდენიმე გუნდით, რომელიც დაკომპლექტებულია X-XII კლასის ხუთი მოსწავლისგან. თითოეული სერიის გამარჯვებული გუნდის ყველა წევრს კომპანია „ინგლისური წიგნი საქართველოში“ გადასცემს ელექტრონულ მკითხველებს. ასევე თამაშის პროცესში მონაწილეები დაჯილდოვდებიან წამახალისებელი პრიზებით. სუპერ პრიზი „საზაფხულო სკოლა დიდ-ბრიტანეთში“ გადაეცემა სუპერ ფინალის გამარჯვებულ გუნდს, რომელიც გაიმართება 25 მარტს თბილისში.
შემოქმედებითი საღამო „მიმალული მუზები“ გაიმართა ბათუმის შოთა რუსთაველის სახელმწიფო უნივერსიტეტში. ღონისძიება სტუდენტთა ნახატების გამოფენით დაიწყო და პოეზიის საღამოთი დასრულდა. მთელი დღის განმავლობაში უმაღლესი საგანმანათლებლო დაწესებულების ეზოში სხვადასხვა ფაკულტეტის რვა სტუდენტის 35-მდე ნახატი იყო წარმოდგენილი. ღია სივრცეში გამართულ პოეზიის საღამოზე მკითხველს ბსუ-ს ხუთმა სტუდენტმა საკუთარი პოეზია გააცნო. მუსიკალური ნომრებით მაყურებლის წინაშე სამედიცინო მიმართულების სტუდენტებით დაკომპლექტებული ჯგუფი „მედიქალ ბენდი“ წარსდგა. ღონისძიება სტუდენტური ასოციაციისა და სტუდენტთა მხარდაჭერისა და მომსახურების სამსახურის მხარდაჭერით ჩატარდა.
