ახალი ამბები

ბათუმის შოთა რუსთაველის სახელმწიფო უნივერსიტეტის სტუდენტური თეატრის დასმა მაყურებელს მორიგი სპექტაკლი შესთავაზა. უნივერსიტეტის სცენაზე ფრანგული პიესის „ოჯახური იდილიის“ პრემიერა შედგა. რეჟისორები გიორგი ფირცხალაიშვილი და როინ დვალი პიესაზე არაპროფესიონალ მსახიობებთან ერთად ორი თვის განმავლობაში მუშაობდნენ. სხვადასხვა ფაკულტეტის სტუდენტებმა: მარიამ ქიქავამ, თამუნა გორგოშაძემ, ნინო ჩხიკვაძემ, მიხეილ ჯინჭარაძემ და ირაკლი ქათამაძემ ერთმოქმედებიან პიესაში ფრანგული ოჯახის სასიყვარულო ისტორიები წარმოადგინეს. სპექტაკლი ბსუ-ს სტუდენტთა მომსახურებისა და მხარდაჭერის სამსახურის კულტურის ცენტრის ორგანიზებით გაიმართა.

შიდსთან ბრძოლის საერთაშორისო დღე ბათუმის შოთა რუსთაველის სახელმწიფო უნივერსიტეტში რამდენიმე ღონისძიებით აღინიშნა. შოთა რუსთველის დარბაზში გამართულ კონფერენციაზე უმაღლესი საგანმანათლებლო დაწესებულების პროფესორ-მასწავლებლებმა, სტუდენტებმა, დაავადებათა კონტროლის, საზოგადოებრივი ჯანმრთელობის ეროვნული ცენტრისა და აჭარის საზოგადოებრივი ჯანდაცვის ცენტრის წარმომადგენლებმა მოხსენებები წარმოადგინეს დაავადების წინააღმდეგ ბრძოლის გზებსა და სხვა აქტუალურ საკითხებზე. მომხსენებლებმა ყურადღება გაამახვილეს ისეთ თემებზე, როგორიცაა: „აივ/შიდსი - საკითხის პრობლემატურობა“, „აივ-გადაცემის გზები“, „ზიანის შემცირება“ და „C ჰეპატიტით დაავადებულ პირთა დიაგნოსტიკა აჭარში“. სესიის დასრულების შემდეგ გაიმართა ვიქტორინა, ვორქ-შოფი თემაზე: „ნიმუშის აღება სკრინინგული ტესტირებისათვის’’, HIV და C ჰეპატიტის ნებაყოფლობითი სკრინინგი და მობილური ლაბორატორია - HIV და C ჰეპატიტის ნებაყოფლობითი სკრინინგი.

ბათუმის შოთა რუსთაველის სახელმწიფო უნივერსიტეტის სტუდენტების ნახატების გამოფენა გაიხსნა „აჭარწიგნის“ წიგნების მაღაზიაში. დამთვალიერებელს ათი დღის განმავლობაში შესაძლებლობა ექნება გაეცნონ ახალგაზრდა თვითნასწავლი მხატვრების 50 ნამუშევარს. ღონისძიება მიზნად ისახავდა სტუდენტების პროფესიული განვითარების ხელშეწყობასა და მათი შემოქმედების პოპულარიზაციას. გამოფენა უმაღლესი საგანმანათლებლო დაწესებულების სტუდენტური ასოციაციისა და სტუდენტთა სამეცნიერო ცენტრის ორგანიზებით მოეწყო.

სტუდენტური თვითმმართველობის ორგანიზებით ბათუმის შოთა რუსთაველის სახელმწიფო უნივერსიტეტის მხიარულთა და საზრიანთა გუნდების შიდა ჩემპიონატი გაიმართა. პირველობისათვის უმაღლესი საგანმანათლებლო დაწესებულების ოთხი ფაკულტეტის გუნდი იბრძოდა. ეკონომიკისა და ბიზნესის ფაკულტეტის, ტექნოლოგიური, ტურიზმის და იურიდიული ფაკულტეტების მხიარულმა და საზრიანმა სტუდენტებმა საკუთარი შესაძლებლობები „მისალმების“ ნომინაციაში გამოავლინეს. კომპეტენტური ჟიურის შეფასებით, საუკეთესოდ ეკონომიკისა და ბიზნესის ფაკულტეტის გუნდი დასახელდა, მეორე ადგილზე ჰუმანიტარული ფაკულტეტი გავიდა, ხოლო მესამეზე - ტურიზმის ფაკულტეტი. უნივერსიტეტის რექტორის მოვალეობის შემსრულებელმა მერაბ ხალვაშმა სტუდენტებს გამარჯვება მიულოცა, წარმატებები უსურვა და დადებითად შეაფასა უმაღლესი საგანმანათლებლო დაწესებულების ნაკრებ "პორტო ფრანკოს" მონაწილეობა საქართველოს მან-სან-კან-ის რეგიონალურ ლიგაში. ბსუ-ს გუნდმა 21 ნოემბერს გამართულ ნახევარფინალში გაიმარჯვა და 17 დეკემბერს, ივანე ჯავახიშვილის სახელობის თბილისის სახელმწიფო უნივერსიტეტში დაგეგმილ ფინალურ შეხვედრაში მიიღებს მონაწილეობას.

შშმ პირთა საერთაშორისო დღე ბათუმის შოთა რუსთაველის სახელმწიფო უნივერსიტეტის სოციალურ და პოლიტიკურ მეცნიერებათა ფაკულტეტის სტუდენტებმა და პროფესორ-მასწავლებლებმა ბათუმის #6 საჯარო სკოლის შეზღუდული შესაძლებლობების მქონე მოსწავლეებთან ერთად აღნიშნეს. ზოგადსაგანმანათლებლო დაწესებულების აღსაზრდელები ბსუ-ში არსებული ცეკვის მოყვარულთა წრის გაკვეთილს დაესწრნენ, სწრაფი კვების ობიექტის მუშაობაში ჩაერთნენ, მოსწავლე-ახალგაზრდობის სასახლეში გობელენზე მუშაობის სპეციფიკას გაეცნენ და მხატვრულ კითხვაში მიიღეს მონაწილეობა. 2 დეკემბერს სტუდენტები ბათუმის #2 საჯარო სკოლას ეწვივნენ და შშმ მოსწავლეებს ბათუმის საჯარო ბიბლიოთეკასთან არსებული ამერიკული კუთხე წარუდგინეს. ღონისძიების დასასრულს პროექტის მონაწილეებს ფასიანი საჩუქრები გადაეცა, ხოლო ბსუ-ს სწრაფი კვების ობიექტმა მასპინძლობა გაუწია. პროგრამა მიზნად ისახავდა შეზღუდული შესაძლებლობების მქონე მოსწავლეების საზოგადოებაში ეფექტურად ჩართვას და მათთვის ტექნოლოგიების ხელმისაწვდომობის გაცნობიერებას.